ޢީދު އަލި، މިއީ ދީނީ އަދި ޤައުމީ ބޮޑު މަސައްކަތެއްކަމަށް ސެޓެލްކޯގެ މެނޭޖިންގ ޑިރެކްޓާ ޙުސައިން ފަހުމީ ވިދާޅުވެއްޖެއެވެ.

އެމްޑީ ފަހުމީ މިއަދު އެކްސްގައި ކުރި ޕޯސްޓެއްގައި ވިދާޅުވެފައިވަނީ، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އިސްނެންގެވުމުގެ މަތިން، މި އަހަރުގެ ފިޠުރު ޢީދަށް ރާއްޖޭގެ ރަށްތައް ދިއްލުމަށް ކުރެވެމުންދާ މި މަސައްކަތުގެ ސަބަބުން ޢީދުގެ އުފާވެރިކަން ހުރިހާ ރައްޔިތުންނަށް ލިބިގެންދާނެ ކަމަށެވެ.

އޭގެ ތެރެއިން މި މަސައްކަތުގެ ސަބަބުން އެއްބައިވަންތަކަމާއި އެކުވެރިކަން ފަދަ އިސްލާމީ ރިވެތި ސިފަތައް ދިރުވައި އާލާވެގެންދާނެ ކަމަށްވެސް އެމްޑީ ފަހުމީ ވިދާޅުވިއެވެ.

އެމްޑީ ފަހުމީ ވިދާޅުވީ، މި ކުރެވިިގެންދިޔަ ފަންނުވެރި އަދި ކަވި މަސައްކަތް ރާވައި، މުޅި ގައުމަށް މީގެ އުފާވެރިކަން ގެނެސްދިނުމަށް ކުރެވޭ މަސައްކަތުގައި ލީޑަރޝިޕް ނަގައި، މި މަސައްކަތް ރާވާ ހިންގަން ލިބުމަކީ ސްޓެލްކޯގެ މުވައްޒަފުންނަށާއި މުޅި ކުންފުންޏަށްވެސް ލިބިގެންދިޔަ ވަރަށް ބޮޑު ފަޚުރެއް ކަމަށެވެ.

މިދިޔަ އަހަރުގެ ބޮޑު އީދުވެސް ކުލަގަދަކޮށް ފާހަގަކުރުމަށްޓަކައި މާލެ ސިޓީ ކައުންސިލުން އިސްގަނައިގެން ކުލަ ބޮކިތަކުން މާލެތެރެ ޒީނަތްތެރިކޮށް، ތަކުބީރުގެ އަޑުއިވޭގޮތަށް ސްޕީކަރުތައް ހަރުކޮށް ހިންގި ހަރަކާތަށް ގިނަ ބައެއް ތައުރީފު ވަނީ ލިބިފައެވެ.

ރައީސް ޑރ.މުއިއްޒުގެ ވެރިކަމުގައި ކުލަގަދަކޮށް އީދު ފާހަގަކުރައްވާނެ ކަމަށް އެމަނިކުފާނު ވައުދުފުޅު ވެފައިވާއިރު، މި ވައުދުފުޅު ފުއްދެވުމުގެ ގޮތުން އީދު ފާހަގަކުރުމަށް 50،100،000 ރުފިޔާ ބަޖެޓްގައި ހިމަނުއްވާފައިވާކަން ފާހަގަކޮށްލެވެއެވެ.