ލ.އިސްދޫ އިޙްތިސާސްގެ މައްސަލައިގެ ސަބަބުން އުފެދޭ ނުތަނަވަސްކަން ހައްލުކޮށްދިނުމަށް އަިސްދޫ ކައުންސިލުން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އަރިހުން އެދެފިއެވެ.

އިސްދޫ ކައުންސިލުން މިފަދައިން އެދިފައިވަނީ، ރައީސް ޑރ.މުޢިއްޒު މިވަގުތު ލ އަތޮޅަށް ކުރައްވާ ދަތުރުފުޅުގެ ތެރެއިން އެ އަތޮޅު އިސްދޫ އަށް ވަޑައިގެން އެއަތޮޅުގެ ކައުންސިލާއި އަންހެނުންގެ ތަރައްގީ އަށް މަސައްކަތް ކުރާ ކޮމިޓީ އާއި އެކު ބޭއްވި ބައްދަލުވުމުގެ ތެރެއިންނެވެ.

މި ބައްދަލުވުމުގެ ތެރެއިން، އިސްދޫ އިޙްތިސާސްގެ މައްސަލައިގެ ސަބަބުން އުފެދޭ ނުތަނަވަސްކަން ހައްލުކުރުމާއި އެކު، އިސްދޫ އާއި ކަލައިދޫ ރައްޔިތުންނަށް ގުޅިގެން ހަމަޖެހުމާއެކު އުޅެވޭނެ ފަދަ ޙައްލެއް ހޯދައިދެއްވުމަށް ވެސް ކައުންސިލުން ވަނީ ރައީސް ޑރ.މުޢިއްޒުގެ އަރިހުން އެދިފައެވެ.

މީގެ އިތުރުންވެސް، އިސްދޫ، ކަލައިދޫ އަދި ދަނބިދޫ ރައްޔިތުންނަށްވެސް ފަސޭހަވާނެހެން އެއަރޕޯޓެއް ތަރައްގީ ކުރުމާއި  ޞިއްޙީ ފަރުވާގެ ހިދުމަތް މިހާރަށްވުރެ ރަނގަޅުކޮށް، އޭގެ ތެރެއިން އިސްދޫ ޞިއްޙީ މަރުކަޒު ހޮސްޕިޓަލަކަށް ބަދަލުކޮށްދިނުމަށް ވެސް ކައުންސިލުން ވަނީ އެދިފައެވެ.

ހަމައެއާއިއެކު، އިސްދޫގެ ބޭންކިންގެ ޚިދުމަތްތައް އިތުރަށް ތަރައްޤީ ކުރުމުގެ މުހިންމުކަމުގެ މައްޗަށް އަލި އަޅުވާލުމުގެ އިތުރުން، އިސްދޫ ކައުންސިލުން ވަނީ ރަށުގެ ތައުލީމީ ފެންވަރު މަތިކުރުމާއި، ރަށު ބަނދަރުގެ މަސައްކަތާއި ނެރު ބަދަލުކުރުމުގެ މަސައްކަތުގެ އިތުރުން ކަރަންޓާއި ފެނުގެ ޚިދުމަތުގެ ފެންވަރު ރަނގަޅުކުރުމުގެ މުހިންމުކަން ވެސް ފާހަގަކޮށްފައެވެ.

ރައީސް ޑރ.މުޢިއްޒު ވަނީ ކައުންސިލުން ފާހަގަކުރެއްވި މުހިންމު ކަންތައްތަކުގެ އެންމެ ފަހުގެ މަޢުލޫމާތު މިބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ހިއްސާކުރައްވާފައެވެ.