މިހާރު ކުރިއަށްދާ 19 ވަނަ ރައްޔިތުންގެ މަޖިލީހުން ބަޖެޓް ފާސްކޮށްދީފައިވާ ގޮތުން ބޭނުންވާ ގޮތަށް މަޝްރޫއުތައް މި އަހަރު ކުރިއަށް ގެންދެވެން ނެތް ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސް ޑރ.މުއިއްޒު މިހާރު ލ އަތޮޅަށް ކުރައްވާ ދަތުރުފުޅުގެ ތެރެއިން އެ އަތޮޅު އިސްދޫ އަދި ކަލައިދޫ ރައްޔިތުންނާ ބައްދަލު ކުރައްވައި ވާހަކަފުޅުދައްކަވަމުން އެމަނިކުފާނު ވަނީ މަޝްރޫއުތައް ހިންގުމުގައި މައިގަނޑު ދަތިތައް ދިމާވަނީ ބަޖެޓުގެ ސަބަބުންކަން ފާހަގަކުރައްވާފައެވެ.

އެގޮތުން ރައީސް ޑރ.މުޢިއްޒު ވިދާޅުވީ، މަޖިލީހުން ބަޖެޓް ފާސްކޮށްފައިވަނީ މި ސަރުކާރުން ބޭނުންވާ ގޮތަށް ނޫން ކަމަށާއި މިހާރު ބޭނުން ކުރާ ބަޖެޓަކީ މި ސަރުކާރުން ފާސްކުރި ބަޖެޓެއް ނޫންކަމަށެވެ. އަދި ރައީސް ޑރ.މުޢިއްޒު ވައުދުވެވަޑައިގެންނެވި ކަންތައްތަކުގެ ތެރެއިން މިއަހަރު ތެރޭގައި ފުރިހަމަ ކުރައްވަން ބޭނުންފުޅުވާ ހުރިހާ ކަމެއް އެމަނިކުފާނު ލިސްޓު ކުރެއްވި ނަމަވެސް ބަޖެޓުގައި ހިމެނީ ވަރަށް މަދު މަޝްރޫއެއް ކަމަށް ވެސް އެމަނިކުފާނު ވިދާޅުވިއެވެ.

Advertisement

ރައީސް ޑރ.މުޢިއްޒު ވިދާޅުވީ، މި ސަރުކާރުން ބަޖެޓުގައި ހިމެނި މަޝްރޫއުތަކަށް ކަނޑައަޅާފައި ހުރީ ވަރަށް މަދު އަދަދެއްގެ ފައިސާކަމަށްވާތީ މިމަހާއި އަންނަ މަހުގެ ތެރޭގައި މަޝްރޫއުތައް ފަށަން ބޭނުންވި ނަމަވެސް ގިނަ މަޝްރޫއުތައް ފެށޭނީ އަހަރުގެ ފަހުކޮޅު ކަމަށެވެ.

ބަޖެޓް ގެ ދަތިކަމުގެ އިތުރުން، ގިނަ ރަށްރަށުގެ މަޝްރޫތަކަށް ފައިސާ ނުދީ ހުރުމުގެ ސަބަބުންވެސް މަސައްކަތްތައް ހުއްޓިފައިހުރި ކަމަށާއި، ހުރިހާ މަސައްކަތްތައް ފެށޭނެ ގޮތް ހަމަޖައްސަމުންދާ ކަމަށް ވެސް ރައީސް ޑރ.މުޢިއްޒު ވިދާޅުވިއެވެ. އެގޮތުން ރަށްރަށުގައި ހުރި ވަރަށް ގިނަ މަޝްރޫއުތައް މިހާރު ފެށިފައިވާ ކަމަށާއި ގިނަ މަސައްކަތްތަކެއް މިހާރު ހުރީ ފެށޭ ހިސާބުގައި ކަމަށް ވެސް ރައީސް ޑރ.މުޢިއްޒު ވަނީ ވިދާޅުވެފައެވެ.