ލ. ކައްދޫގައި އޮންނަ އެއާޕޯޓް އިތުރަށް ތަރަައްގީ ކުރުމަށާއި އެއަތޮޅު ގާދޫގައި މެރިޓައިމް ހަބެއް ގާއިމު ކުރުމަށް ސަރުކާރާއި ޗައިނާގެ ކުންފުންޏަކާއި އެކު ފަހުމުނާމާއެއްގައި ސޮއިކޮށްފިއެވެ.
މި މަޝްރޫއުތަކުގައި ސޮއިކޮށްފައިވަނީ ރައީސް ޑރ. މުހައްމަދު މުއިއްޒު މިރޭ ލ. ފޮނަދޫ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައެވެ.
ކައްދޫ އެއާޕޯޓް ތަރައްގީ ކުރުމުގެ އެއްބަސްވުމުގައި ސަރުކާރުގެ ފަރާތުން ސޮއިކޮށްފައިވަނީ އިންފްރާސްޓްރަކްޗަރ މިނިސްޓަރ، ޑރ. އަބްދުالله މުއްތަލިބެއެވެ. ޗައިނާގެ ފަރާތުން މި އެއްބަސްވުމުގައި ސޮއިކޮށްފައިވަނީ އެގައުމުގެ ސީއޭއެމްސީ އިންޖިނިއަރިން ކޮމްޕެނީ ލިމިޓެޑް (ސީއޭއެމްސީއީ)ގެ ޖެނެރަލް މެނޭޖަރ، ލީ ވޭވޭ އެވެ.
އެއަރޕޯޓް ތަރައްޤީކުރުމަށް އޮތް އެންމެ ބޮޑު ހުރަހަކީ، ކައްދޫ އެއަރޕޯޓް ޑިވެލޮޕްމަންޓް ކޮމްޕެނީގެ ދަށުގައި އޮތުންކަމަށް ރައީސް މުއިއްޒުވަނީ މިރޭ ވިދާޅުވެފައެވެ. އެހެންކަމުން އެ ދަތިތައް ނައްތާލާ، މިހާރު އެ އެއަރޕޯޓް ހިންގުން ރީޖަނަލް އެއަރޕޯޓްސް ކުންފުނީގެ ދަށަށް ބަދަލުކުރައްވާފައިވާކަމަށް ރައީސް ވަނީ ވިދާޅުވެފައެވެ.
ކައްދޫ އެއާޕޯޓްގެ އޮތުރުން، މިރޭ ސޮއި ކުރެވުނު، ގާދޫގައި ގާއިމު ކުރާ މެރިޓައިމް ހަބުގެ ފަހުމުނާމާގައި ސޮއިކުރެއްވީ އެމްޕީއެލްގެ ސީއީއޯ، މުހައްމަދު ވަޖީހު އިބްރާހިމްއެވެ. މި ފަހުމުނާމާގައި ޗައިނާގެ ފަރާތުން ސޮއި ކޮށްފައިވަނީ ސީއޭއެމްސީ އިންޖިނިއަރިން ކޮމްޕެނީ ލިމިޓެޑް (ސީއޭއެމްސީއީ)ގެ ޖެނެރަލް މެނޭޖަރ، ލީ ވޭވޭ އެވެ.
މިމަޝްރޫޢުގެ ދަށުން މުޅިއެކު 6 މަސައްކަތެއް ކުރުމަށް ވަނީ ނިންމާފައެވެ. އެއީ؛
އޮފް ޝޯ ބަންކަރިން ޚިދުމަތް ފެށުން
ކްރޫޒް ޓާމިނަލެއް ތަރައްޤީކުރުން
ސުޕަރ ޔޮޓް މެރީނާއެއް ތަރައްޤީކުރުން
ގާދޫ އިކޯ ރިސޯޓެއްގެ ގޮތުގައި ތަރައްޤީކުރުން
މި ސަރަހައްދުގައި އުފައްދާ ކާބޯތަކެތީ ރައްކާ ކުރުމަށް ސްޓޯރެޖް ފެސިލިޓީއެއް
ޓްރާންސްޝިޕްމެންޓް ބަނދަރެއް ތަރައްޤީ ކުރުން
ކައްދޫ އެއާޕޯޓް އިތުރަށް ތަރައްގީ ކުރުމުގެ އެއްބަސްވުމުގައި މިރޭ ސޮއިކޮށްފައިވާއިރު، ކައްދޫ އެއާޕޯޓް އިންޓަނޭޝަނަލް ކުރުމަކީ ރައީސް، ޑރ. މުހައްމަދު މުއިއްޒުގެ ވައުދުފުޅެކެވެ. އަދި ލ. ގާދޫ ކައިރީގައި ކޮމާޝަލް ޕޯޓާއި ލޮޖިސްޓިކްސް ހިމެނޭ ގޮތަށް ކޮމާޝަލް ހާބަރެއް ހެދުމަކީ ވެސް އެމަނިކުފާނުގެ ރިޔާސީ ވައުދެކެވެ.
Advertisement
This content is created and paid for by advertisers and does not involve Voice Journalists
