ފ.ނިލަންދޫގެ އެއާޕޯޓުގެ މަސައްކަތް ނިމޭއިރު، އެ ރަށުގައި އެންމެ ރަނގަޅު ފެންވަރުގެ އެއާޕޯޓެއް އޮންނާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރޭ ފ.ނިލަންދޫގެ ރައްޔިތުންނާއި ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، އެމަނިކުފާނަކީ އެމަނިކުފާނު ދައްކަވާ ވާހަކަ ތަކުގެ ޒިންމާ ނަންގަވާނެ ބޭފުޅެއް ކަމަށެވެ. އަދި އެމަނިކުފާނަކީ ވައުދެއް ވެއްޖެ ނަމަ، އެ ވައުދު ފުއްދަވާނެ ބޭފުޅެއް ކަމަށެވެ.
އެގޮތުން، ނިލަންދޫގެ ރައްޔިތުންނަށް އެންމެ މުހިންމު ކަންކަމުގެ ލިސްޓުގެ އެއްވަނައިން ފެށިގެން 100 ވަނައަށް ވެސް އޮންނާނީ އެއާޕޯޓު މަޝްރޫއު ކަމަށާއި، އެ އެއާޕޯޓް އެޅުމަށްޓަކައި ވެވަޑައިގެންނެވި ވައުދު ފުއްދަވާނެ ކަމުގެ ޔަގީންކަން ރައީސް ވަނީ ރޭވެސް ދެއްވާފައެވެ.
”ނިލަންދޫ އެއާޕޯޓްގެ މަސައްކަތް ހަގީގަތަކަށް ހަދައިދީ އެ މަސައްކަތް މިހާރު މި އޮތީ ފެށިފައި. ދެން ނުހުއްޓޭނެ، އަމަލީ ގޮތުން ބިން ހިއްކަން އެ ފެށީ. އިރާދަކުރެއްވިއްޔާ، މި މަސައްކަތް ގޮސް ބާރު ސްޕީޑުގައި ނިމޭއިރުގަ، ތި ބޭފުޅުންގެ އުއްމީދުތަކުގަ ކުލަ ޖެހި، އެންމެ ފުރިހަމަ، ރަނގަޅު އެއާޕޯޓެއް މި ރަށުގައި އޮންނާނެ. 1800 މީޓަރުގެ، ދިގު ރަންވޭއެއް، ޖެޓް ޖެއްސޭވަރުގެ ފުރިހަމަ އެއާޕޯޓެއް މި ރަށުގައި އެޅިގެންދާނީ.
ރައީސުލްޖުމްހޫރިއްޔާ ޑރ. މުހައްމަދު މުޢިއްޒު
މީގެ އިތުރުން ނިލަންދޫ ހިމެނޭ ސަރަހައްދުގައި 2 ރިސޯޓެއް ތަރައްޤީކުރައްވާނެކަމަށާއި، ސިޓީ ހޮޓަލެއް ތަރައްޤީކުރުމަށް ރާވާފައިވާކަން އެމަނިކުފާނު ހާމަކުރެއްވިއެވެ. އަދި އެމަނިކުފާނު ވިދާޅުވީ ރައްޔިތުންގެ ފަރާތުން އެދިލެއްވި ކަންކަމުގެ އިތުރުންވެސް ނިލަންދޫ ތަރައްޤީކުރުމަށް މަސައްކަތްކުރައްވާނެކަމުގައެވެ.
ރޭގެ ބައްދަލުވުމުގައި ވާހަކަފުޅު ދައްކަވަމުން ރައީސް ވަނީ އެމަނިކުފާނަށް “މުހިންމީ ހުރިހާ ރައްޔިތުންނަށްވެސް ހަމަހަމަކަމާއެކު ޚިދުމަތް ދޭން" ކަމުގައި ވުދާޅުވެފައެވެ. އަދި އެމަނިކުފާނު ވަނީ މި ސަރުކާރުން ރާއްޖޭގެ ހުރިހާ ރަށެއްގެ ރައްޔިތުންނަށް ހަމަހަމަ ކަމާއެކު ޚިދުމަތްތައް ފޯރުކޮށްދިނުމަށް ކުރައްވާ މަސައްކަތްޕުޅުތަކުގެ މައްޗަށް އަލިއަޅުވާލައްވާފައެވެ.
ހަޤީޤީ މާނާގައި، އިޚްލާސްތެރިކަމާއެކީގައި، މި ޤައުމަށް ހަމަޖެހުން ގެންނަން މި ސަރުކާރުން ކުރަމުންދާ މަސައްކަތްޕުޅުތަކަށް އަލި އަޅުވާލައްވަމުން އެމަނިކުފާނުވަނީ "ސިޔާސީ ވީމަ ބަދަލު ހިފުން އެއީކީ ކުރާނެކަމެއް ނޫން" ކަމުގައި ވިދާޅުވެފައެވެ. ހަމަ އެއާއެކު އެމަނިކުފާނަށް މުހިންމީ 'ބާރު ސްޕީޑު' ގައި ތަރައްޤީ ގެންނަންކަމުގައި އެމަނިކުފާނު ފާހަގަކުރެއްވިއެވެ. އަދި އެކަން ކުރުމަށް ރައްޔިތުންގެ އެއްބާރުލުން ލިބޭނަމަ އަވަހަށް ތަރައްޤީ ގެނައުމަށް ފުރުޞަތު ފަހިވެގެން ދާނެކަމުގައި އެމަނިކުފާނު ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
