ކުޅުދުއްފުށި އެއަރޕޯޓްގައި އެންމެ ޒަމާނީ ވަސީލަތްތަކާ އެއްކޮށް ތަރައްޤީކުރެވޭ ޕެސެންޖަރ ޓަރމިނަލްއެއް އެޅުމަށް ނިންމާފައިވާ ކަމަށް ރީޖަނަލް އެއާޕޯޓްސް، އާރްއޭސީއެލް އިން ބުނެފިއެވެ.

ރީޖަނަލް އެއާޕޯޓްސް އިން ބުނެފައިވާގޮތުން އައު ޓާމިނަލް އެޅުމަށް ވާންޖެހޭ ހުރިހާ ތައްޔާރީތަކެއް މިހާރު ވަނީ ނިމިފައެވެ. މިގޮތުން ކުޅުދުއްފުށި އެއަރޕޯޓް ރީޑިވެލޮޕް ކުރުމުގެ މާސްޓަރ ޕްލޭންއެއް އެކުލަވާލުމަށްފަހު ޓާރމިނަލްގެ މަސައްކަތް ކުރުމަށް ހަވާލުކުރެވޭ ފަރާތެއް ހޮވުމުގެ ބީލަމުގެ މަރުހަލާ ނިމި މަސައްކަތް ފެށުމަށް މިހާރު ތައްޔާރުވެފައިވާ ކަމަށް ބުނެފައިވެއެވެ. 

މިޓާރމިނަލް ނިމިގެންދާއިރު ޓާރމިނަލްއެއްގައި ފަސެންޖަރުންނަށް ހިދުމަތްދިނުމަށްޓަކައި ހުންނަންޖެހޭ އެންމެޒަމާނީ ހިދުމަތްތައް ފުރިހަމަވެފައި ހުންނާނެ ކަމަށް އާރްއޭސީއެލް އިން ބުނެއެވެ. 

Advertisement

އަދި ޓާރމިނަލް ނިމިގެންދާއިރު އެއްފަހަރާ އެއްވަގުތެއްގައި އޭ ޓީ އާރު 72 ސައިޒްގެ ދެފްލައިޓް އެއްވެސް ދަތިކަމެއް ނެތި ހެނޑުލްކޮށްލެވޭ ވަރުގެ ކެޕޭސިޓީ ފުރިހަމަކުރެވިފައި ހުންނާނެ ކަމަށްވެސް ބުނެފައިވެއެވެ. 

މީގެ އިތުރުން ޓާރމިނަލްގައި ވަކިން ޑިޕާޗާ އަދި އެރައިވަލް ހޯލް ހެދިފައި ހުރުމުގެ އިތުރުން ކާގޯރަށްކާކޮށް ބެހެއްޓޭނެ ވަސީލަތް ފުރިހަމަވެފައި ހުންނާނެ ކަމަށްވެސް އެ ކުންފުނިން ބުނެފައިވެއެވެ. 

މި ޓާރމިނަލް ނިމިގެންދާއިރު ފަސެންޖަރުން ފުރުވަން އަދި ބަލައިދާ ފަރާތްތަކަށް ފަސޭހަކަމާއެކު އިށީދެލައިގެން ތިބެވޭނެ ވަސީލަތްތައް ފުރިހަމަވުމުގެ އިތުރުން ޓާރމިނަލް ބޭރުގައި ކެފޭއެއްގެ ހިދުމަތްވެސް ލިބިގެންދާނެގޮތަށް ފަރުމާކުރެވިފައިވާނެ ކަމަށް އާރްއޭސީއެލް އިން ބުނެފައިވެއެވެ.