ރާއްޖޭގެ ދަނޑުވެރިކަމުގެ ސިނާއަތް ކުރިއެރުވުމަށް މިސަރުކާރުން ގެންގުޅުއްވާ ތަސައްވުރަށް އޭޑީބީން ތައުރީފުކޮށްފިއެވެ.

އޭޑީބީން މިކަމަށް ތަޢުރީފް ކޮށްފައިވަނީ މި އޭޕްރީލް މަހު ނެރުނު އޭޝިއަން ޑިވެލޮޕްމަންޓް އައުޓްލުކްގައެވެ.

އެގޮތުން އޭގައި ބުނީ ރާއްޖޭގައި ދަނޑުވެރިކަން ކުރާ ބިމުގެ ބޮޑުމިނަކީ ގާތްގަނޑަކަށް 5900 ހެކްޓަރު ނަމަވެސް ރާއްޖޭގައި އުފެއްދެނީ އާބާދީއަށް ބޭނުންވާ ދަނޑުވެރިކަމުގެ ބާވަތްތަކުގެ އެންމެ %10 ކަމަށެވެ. އަދި 2005 ވަނަ އަހަރުން ފެށިގެން 2022 ވަނަ އަހަރާ ހަމައަށް ދަނޑުވެރިކަމުގެ ސިނާއަތުން ރާއްޖޭގެ ޖީޑީޕީގައި ހިއްސާކުރަނީ އެންމެ %1.5 ކަމަށާ ހަމައެކަނި އެކަމުންވެސް ރާއްޖޭގެ ދަނޑުވެރިކަމުގެ ސިނާއަތު ފުޅާކުރަންޖެހޭކަން ހާމަވާކަމަށް އެ އައުޓްލުކްގައި ބުނެފައިވެއެވެ. 

Advertisement

ކަންމިހެން ހުރި ނަމަވެސް، ރާއްޖޭގެ ދަނޑުވެރިކަމުގެ ސިނާއަތު ކުރިއެރުވުމަށް ގޮންޖެހުންތަކެއްވެސް ހުރިކަމަށް އޭޑީބީން ފާހަގަކޮށްފައިވެއެވެ. އޭގެތެރޭގައި ދަނޑުވެރިކަމުގެ ސިނާއަތުގައި މަސައްކަތްކުރާ ދިވެހިންގެ އަދަދު މަދުވުމާއި، ދަނޑުވެރިކަމުގެ ސިނާއަތުގައި ލޯނު ލިބުން ދަތިވުމާއި އަދި ދަނޑު ހެއްދުމަށް ބޭނުންވާ ބައެއް ތަކެތީގެ އަގު ބޮޑުވުން ހިމެނޭކަން އެ އައުޓްލުކްގައި ފާހަގަކޮށްފައިވެއެވެ. 

މިއާއެކު ޒަމާނީ ޓެކްނޮލޮޖީއާ ރަހުމަތްތެރި ދަނޑުވެރިކަމުގެ ބާވަތްތައް ތައާރަފްކޮށް ރާއްޖޭގައި ކާބޯތަކެތީގެ ޔަޤީންކަން ކަށަވަރުކުރުމަށް ސަރުކާރުން ކުރަމުންދާ މަސައްކަތް ފާހަގަކޮށް އޭޑީބީން ވަނީ ދަނޑުވެރިކަމާއި ދިރޭތަކެއްޗާ ބެހޭ ވުޒާރާއާއި ވީސީ ގްރޫޕް ޕްރައިވެޓް ލިމިޓެޑާ ދެމެދު މިއަހަރުގެ ޖަނަވަރީ މަހުގެ ތެރޭގައި ޒަމާނާއި ރަހުމަތްތެރި ދަނޑުވެރިކަން ތައާރަފްކުރުމަށް ވެވުނު އެއްބަސްވުމުގެ ދަށުން ކުރިއަށް ގެންދާ ޕްރޮޖެކްޓަށް ތަޢުރީފް ކޮށްފައެވެ. 

ޒަމާނީ ވަރޓިކަލް ފާމިން މެދުވެރިކޮށް މުޅި ރާއްޖޭގައި ދަނޑުވެރިކަން ކުރުމަށް ކުރިއަށް ގެންދާ މި ޕްރޮޖެކްޓްގެ ސަބަބުން މުޅި ރާއްޖޭގައި ކާނާގެ ޔަޤީންކަން ކަށަވަރުކޮށް ދެމެހެއްޓެނިވި ދަނޑުވެރިކަމެއް ކުރުމަށް ބާރަކަށް ވެގެންދާނެކަމަށް އެ ރިޕޯޓްގައި ވަނީ ބުނެފައެވެ.

ރާއްޖޭގައި އުފެއްދޭ ކާ އެއްޗެހީގެ ބާވަތްތައް އެހެން ޤައުމުތަކުން އިމްޕޯޓު ކުރުން ނިމުމަކަށް ގެނެސް ރާއްޖޭގައި އަމިއްލައަށް، ކާބޯތަކެތި އުފެއްދުމަކީ ރައީސް މުޢިއްޒުގެ ވަޢުދުފުޅެކެވެ. 

އެގޮތުން، ދިވެހި ރައްޔިތުންނަށް، ފުޑް ސެކިޔުރިޓީ ޤާއިމުކުރުމަށް، އުތުރު ތިލަފަޅުގައި، 200 ހެކްޓަރުގެ ބިން ހިއްކައިގެން އިންޓެގްރޭޓް ޑިވެލޮޕްމަންޓާއެކު، އެގްރިކަލްޗަރ އިންޑަސްޓްރިއަލް ޒޯނެއް ޤާއިމު ކުރުމުގެ މަސައްކަތް މިހާރު ވަނީ ފަށާފައެވެ. 

އަދި މީގެ އިތުރުން ފަތުރުވެރިންނަށް ބޭނުންވާ ކާބޯތަކެތިވެސް ރާއްޖޭގައި އުފައްދާ ފޯރުކޮށް ދިނުމަކީ ސަރުކާރުގެ އަމާޒެކެވެ.