މީގެ ކުރިންވެސް ތަންތަނުގައި ހުޅު ޖަހާފައި ވަނީ އިދިކޮޅު އެމްޑީޕީން ކަމަށާ، ވެރިކަންކުރާ ޕީޕީއެމް/ޕީއެންސީ ކެންޑިޑޭޓުންނަކީ އެފަދަ ކަންކަން ކުރާނެ ބައެއް ނޫން ކަމަށް އެ ކޯލިޝަނުން ބުނެފިއެވެ. 

20 ވަނަ ރައްޔިތުންގެ މަޖިލިސް އިންތިޚާބުގައި ކ.ތުލުސްދޫ ދާއިރާއަށް ވާދަކުރައްވާ އެމްޑީޕީގެ ކެންޑިޑޭޓް ⁦އަދި ކުރީގެ ފިނޭންސް މިނިސްޓަރު އިބްރާހީމް އަމީރު އެ ދާއިރާގެ ރަށް ކ.ދިއްފުށީގައި ދިރިއުޅޭގޭގައި ހުޅުޖަހައި ރޯކުރާނެ ކަމުގެ އިންޒާރު ޕީއެންސީގެ ކެންޑިޑޭޓު އިބްރާހިމް ނަސީމްގެ ސަޕޯޓަރުންދީފައިވާ ކަމަށް އެމްޑީޕިން ރޭ ވަނީ ތުހުމަތު ކޮށްފައެވެ.

އަދި ޕީއެންސީގެ ކެންޑިޑޭޓްގެ ސަޕޯޓަރުން ރަށުގެ އަމާންކަން ނަގާލައި އެމްޑީޕީ ކެންޑިޓޭޓަށް ދުއްތުރާ ކުރާ ކަމަށްވެސް ތުހުމަރުކޮށް އެޕާޓީން ވަނީ އެކަން ކުށްވެރިކޮށްފައެވެ. 

އެ ތުހުމަތުތަކަށް ރައްދުދީ ޕީއެންސީން ރޭ އެކްސްގައި ކުރި ޕޯސްޓެއްގައި ވަނީ އެއީ ބުހުތާން ދޮގެއް ކަމަށް ބުނެ އެފަދަ ދޮގު ނުފަތުރާން ގޮވާލާފައެވެ.

އަދި އެމްޑީޕިން އެފަދަ ވާހަކަތައް ފަތުރަނީ ފިތުނަ ފަސާދަ އުފެއްދުމަށް ކަމަށް ބުނެ އެކަން ޕީއެންސީން ވަނީ ކުށްވެރިކޮށްފައެވެ.

“ޕީއެންސީގެ ކެންޑިޑޭޓުންނަކީ ތަންތަނުގައި ހުޅުޖަހާނެ ބައެއް ނޫން. މީގެ ކުރިންވެސް ތަންތަނުގައި ހުޅުޖަހާ، ޤައުމު ހަލަބޮލި ކުރީ އެމްޑީޕީން.” ޕީއެންސީން ބުނެފައި ވެއެވެ. 

ޕީއެންސީން މިހެން ބުނެފައިވާއިރު، އެމްޑީޕިގެ ފުރަތަމަ ވެރިކަން، ކުރީގެ ރައީސް މުހައްމަދު ނަޝީދުގެ ވެރިކަން ބަދަލުވުމާ އެކު ބައެއް ރަށްރަށުގެ ކޯޓުތަކާއި ކައުންސިލް އިދާރާތަކުގެ އިތުރުން ޕޮލިސް ސްޓޭޝަންތަކުގައި ހުޅުޖަހައި ބައެއް ރަށްރަށުން ފުލުހުން ބޭރުކޮށްލައިފައިވާކަން ފާހަގަކޮށްލަންޖެހެއެވެ.