ތުލުސްދޫގައި ޗުއްޓީ ހޭދަކުރަމުން އައި އިސްރާއީލުގެ ޕާސްޕޯޓް އޮތް އަންހެން ފަތުރުވެރިއަކު އެރަށުން ބާލއިފިއެވެ.

ތުލުސްދޫއިން “ވޮއިސް” އަށް މައުލޫމާތު ދިން މީހަކު ބުނީ އެ ޓޫރިސްޓަކީ އިޒުރޭލުގެ ބްލޮގަރެއް ކަމަށާ އެ އަންހެން މީހާ އެ ރަށަށް ގޮސް އުޅުނީ އެކަނި ކަމަށެވެ.

އަދި އެމީހާ އެ ރަށު އުޅޭކަން އެނގުމުން އޭނާ ހުރި ގެސްޓްހައުސްގެ ވެރިމީހާއާއި ވާހަކަ ދައްކައި އޭނާ ކައިރީވެސް އެރަށުގައި އިސްރާއިލް މީހުން ތިބެން ބޭނުން ނުވާކަމަށް ކިޔައިދިން ކަމަށް ބުންޏެވެ.

މީގެ އިތުރުން އެ ރަށުން މައުލޫމާތު ދިން މީހާ ބުނި ގޮތުގައި އެންމެ އަވަހަށް ހުޅުލެ ފުރަން އޮތް ލޯންޗުން އެމީހާ ވަނީ މިހާރު ފުރުވާލާަފައެވެ. އަދި އެ ރަށުން ބޭލުމުގައި އެއްވެސް ކަހަލަ ހަމަނުޖެހުމެއް ނުހިނގާ ކަމަށްވެސް ބުންޏެވެ. 

ފަލަސްތިީނުގެ ބިމަށް ގަދަކަމުން ވެރިވެގެން އުޅޭ ހަރުކަށި ޔަހޫދީން ފަލަސްތީނުގައި ގަތުލު އާއްމު ހިންގަން ފެށުމާއެކު ރާއްޖޭގައިވަނީ އިސްރާއިލް ޕާސްޕޯޓް އޮތް މީހުން ރާއްޖެ އައުން މަނާ ކުރާން ގޮވާލާ އަޑު ގަދަ ވެފައެވެ. 

އަދި ރާއްޖޭގައި ތިބި އެ އެންމެންވެސް ބޭރު ކުރަން ދިވެހީން ގޮވާލަމުންދާއިރު ކުރީ ސަރުކާރުގައިވެސް އަދި މި ސަރުކާރުގައުވެސް އެކަން ވެފައި ނެތްކަން ފާހަގަކޮށްލަންޖެހެއެވެ.