ރާއްޖޭގައި ޗިކުންގުންޔާ ފެތުރޭ މިންވަރު އިތުރުވަމުންދާ ކަމަށް ހެލްތު ޕްރޮޓެކްޝަން އެޖެންސީ، އެޗްޕީއޭ އިން ބުނެފިއެވެ. 

އެޗްޕީއޭގެ ތަފާސް ހިސާބުތައް ދައްކާގޮތުން، މި އަހަރު ޗިކުންގުންޔާގެ 134 ކޭހެއް ވަނީ ރިޕޯޓް ކޮށްފައެވެ. އަދި އޭގެ ތެރެއިން 129 ކޭސް ރިޕޯޓު ކޮށްފައި ވަނީ މިދިޔަ އޭޕްރީލް މަހުގައި ކަމަށްވާއިރު އެންމެ ގިނަ ކޭސް ރިޕޯޓް ކޮށްފައިވަނީ މާލެ ސަރަހައްދުންނެވެ. އެގޮތުން، މާލޭ ސަރަހައްދުން މިއަހަރު 130 ކޭސް ރިޕޯޓުކޮށްފައިވާ ކަމަށް ތަފާސް ހިސާބުތަކުން އެނގެއެވެ. 

39 ޑިގްރީ ސެލްޝިއަސްއަށް ހުން ގަދަވުން

ގަދައަށް ބޮލާއި ގައިގައި ރިއްސުން

ހުޅުހުޅުގައި ރިއްސުން

ހުޅުހުޅު ދުޅަވުން

ބަނޑުގައި ރިއްސުމާއި، މޭނުބައިކޮށް ހޮޑުލެވުން

ގައިގައި ރަތް ބިހިތަކެއް ނެގުން

ޗިކުންގުންޔާގެ އަސަރު އެންމެ ބޮޑަށް ކުރަނީ ބަނޑުގައިވާ ދަރިފުޅަށާއި ތުއްތު ކުދިންނާއި އުމުރުން ދުވަސްވީ މީހުންގެ އިތުރުން އެކި ބަލިތައް ތަހައްމަލުކުރާ މިހުންނަށެވެ. އެހެންކަމުން މި އުމުރުފުރާގެ މީހުން ގެއިން ބޭރަށް ނުކުމެ އުޅުމުގައްޔާއި މަދިރި ގިނަވާ ވަގުތުތަކުގައި މަދިރިން ރައްކާތެރިވުމަށް ފިޔަވަޅުތައް އެޅުމަކީ މުހިންމު ކަމެކެވެ. 

1) އަރާމުކުރުން

2) ގިނަގިނައިން ދިޔާ ތަކެތި ބޭނުންކުރުން

3) ހަށިގަނޑަށް ފައިދާ ހުރި ކާނާ ކެއުން

4) ހުން އައިސް ގައިގައި ރިއްސާނަމަ ޕެނަޑޯލް ނުވަތަ ޕެރަސެޓްމޯލް ފިޔަވާ އެހެން އެއްވެސް ބޭހެއް ބޭނުން ނުކުރުން.

5) ހަތް ދުވަހަށް ވުރެ އިތުރަށް ހުން ހުންނަ ނަމަ ނުވަތަ ހުޅު ދުޅަވެ ރިއްސާނަމަ ލަސްނުކޮށް ސިއްހީ ފަރުވާ ހޯދުން

1) މަދިރި އާލާވާ ތަންތަނާއި ތަކެތި ނައްތާލުން.

މަދިރި އާލާވުން ހުއްޓުވުމަށް ގެއާއި ގޯތިތެރޭގައި ފެން ހަރުލާ ގޮތަށް ހުންނަ ތަންތަނާއި ތަކެތި މަދުވެގެން ހަފުތާއަކު އެއް ފަހަރު ސާފުކުރުން އަދި ގަސްމުށި، ހުސް ތާނގީ ފަދަ ތަކެތި ފެން ނޭޅޭ ގޮތަށް ބެހެއްޓުން/ ބަންދުކުރުމަށް ސަމާލު ވަން ޖެހޭނެއެވެ.

2) މަދިރި ހެފުމުން ރައްކާތެރިވުން

މަދިރި ހެފުމުން ރައްކާތެރިވުމަށް ކުރެވޭނެ ކަންކަމުގެ ތެރޭގައި މަދިރި ލޯޝަން/ ސްޕްރޭ ބޭނުންކުރުމާއި، ވީހާވެސް ބޮޑަށް ހަށިގަނޑު ނިވާވާގޮތަށް ފޭރާންލުމާއި، ކުޑަދޮރު ފަދަ ތަންތަނުގައި މަދިރި ދާ ޖެހުން ނުވަތަ ގޭތެރޭގައި މަދިރި ގެ ބޭނުންކުރުން އަދި މަދިރި ގިނަވާ ވަގުތުތަކުގައި ދޮރާއި ކުޑަދޮރުތައް ލައްޕާފައި ބެހެއްޓުން ފަދަ ކަންކަން ކުރުން މުހިންމެވެ. 

ހުރިހާ ވައްތަރެއްގެ މަދިރި ވެސް އެންމެ ގިނަ ވަނީ ހެނދުނާއި ހަވީރެވެ. އީޑީސް މަދިރި އާންމުކޮށް ހަފަނީ ދުވާލު ގަޑީގައި ނަމަވެސް، އެންމެ ރަނގަޅު ގޮތަކީ ހުރިހާ ވަގުތެއްގައި ވެސް މަދިރި ހެފުމުން ރައްކާތެރިވުމަށް ފިޔަވަޅުތައް އެޅުމެވެ.