ރައީސުލްޖުމްހޫރިއްޔާ ޑރ މުހައްމަދު މުޢިއްޒު އަބަދުވެސް މަސައްކަތް ކުރައްވާނީ ރައްޔިތުންގެ އަޑު އައްސަވައިގެން ރައްޔިތުންނާއި ގާތުން ކަމަށް ސްޕެޝަލް އެޑްވައިޒަރ ޓު ދަ ޕްރެސިޑެންޓް އަބްދުއްރަހީމް އަބްދުالله (އަދުރޭ) ވިދާޅުވެއްޖެއެވެ.  

އަބްދުއްރަހީމް މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސް ޑރ.މުޢިއްޒު އަބަދުވެސް އިސްކުރައްވާނީ ދިވެހި ރައްޔިތުންނާއި ދިވެހި ގައުމު ކަމަށެވެ.

އަދި ރައީސް ޑރ.މުޢިއްޒަށް ރައްޔިތުން ދެއްވި އިތުބާރު އެ މަނިކުފާނު ދަމަހައްޓަވާނީ ރައްޔިތުންނަށް އިތުބާރު ދެއްވައިގެން ކަމަށާ އެ މަނިކުފާނު ތަފާތު ދައްކަވާނީ ތެދުވެރިކަމާ އިޚްލާޞްތެރިކަމާއެކު ނަތީޖާއިން ކަމަށްވެސް އަދުރޭ ވިދާޅުވިއެވެ.

Advertisement

އަދުރޭ މިފަދައިން ވިދާޅުވެފައި މިވަނީ، ރޯދަމަހުގެ ކަރަންޓް ބިލުން ޑިސްކައުންޓް ދެއްވާނެ ކަމަށް ރައީސް ވިދާޅުވެފައި ވަނިކޮށް، ރޯދަމަހު ލިބުނު ބިލުން ޑިސްކައުންޓް ދިނުމަށްފަހު ރޯދަމަހު ބޭނުން ކުރި ކަރަންޓްގެ ބިލު ބޮޑު ކަމުގެ ޝަކުވާ ރައްޔިތުން ކުރުމަާއި ގުޅިގެން އެ ބިލުންވެސް ޑިސްކައުންޓް ދޭން ރައީސް މުއިއްޒު ނިންމަވާފައިވާ ދަނޑިވަޅެއްގައެވެ. 

ރޯދަ މަހު ކަރަންޓާއި ފެން ބިލު އެހެން މަސްތަކަށް ވުރެ ބޮޑު ނުވާނެ ގޮތަށް އެއްވަރެއްގައި ހިފެހެއްޓުމަށް ޑިސްކައުންޓެއް ސަރުކާރުން ދޭނެ ކަން ރައީސް މުއިއްޒު ހާމަކުރެއްވި ނަމަވެސް، މިދިޔަ މާޗް މަހުގެ ބިލު ލިބެން ފެށުމާ އެކު، ބިލްތައް ތިން ގުނަ، ހަތަރު ގުނަ ބޮޑުވުމުން އާންމުންގެ ކަންބޮޑުވުމާއި ފާޑުކިޔުން ސަރުކާރަށް އަމާޒުވިއެވެ. 

އެއާއެކު ސަރުކާރު ޔުލިޓީ ކުންފުނިތަކުން ފެނާއި ކަރަންޓު ބިލަށް ޑިސްކައުންޓު ދީފައި ވަނީ، ރައީސް ވައުދުވެވަޑައިގެންނެވި ގޮތަށް ނޫން ކަމަށް ސަރުކާރުން ވަނީ ބުނެފައެވެ. 

"ރަމަޟާންމަހު ފެނާއި ކަރަންޓު ބިލަށް ލުޔެއް ދެއްވުމަކީ ރައީސްގެ ވައުދެއް. ފެނާއި ކަރަންޓު ބިލުތަކުން، ރައީސް މި އެދިވަޑައިގެންނެވި ގޮތަށް، ލުއި ދެވިފައި ނުވާކަން ފާހަގަކުރެއްވޭތީ، މިކަން ޙައްލުކުރުމަށް ކަމާ ބެހޭ ފަރާތްތަކަށް ރައީސުލްޖުމްހޫރިއްޔާ އަންގަވައިފި،" ރައީސް އޮފީހުގެ ތަރުޖަމާނު ވިދާަޅުވިއެވެ.  

ރައީސްގެ އެ އެންގެވުމާ އެއްގޮތަށް ސްޓެލްކޯ އާއި ފެނަކަ ކުންފުނިން ވަނީ ރޯދަ މަހު ބޭނުންކުރި ހިދުމަތަށް ޑިސްކައުންޓު ދޭން ނިންމާފައިވާކަން ހާމަކޮށްފަ އެވެ.