ކަންކަމުގައި ބަސް ވިދާޅުނުވެ ހަނު ހުންނަވަން ބަޔަކު ބުނި ނަމަވެސް، ކަންބޮޑުވާ ކަންކަމުގައި ބަސް ވިދާޅުވާނެ ކަމަށް ކުރީގެ ޑިފެންސް މިނިސްޓަރ މާރިޔާ އަހުމަދު ދީދީ ވިދާޅުވެއްޖެއެވެ.
މާރިޔާ މިހެން ވިދާޅުވެފައި މިވަނީ، މާލޭގައި ފައިމަގުގައި އުޅެން އުނދަގޫ ކަން ފާހަގަކުރައްވައި އޭނާ އެކްސްގައި ކުރެއްވި ޕޯސްޓަކާއި ގުޅިގެން ގިނަ ބައެއްގެ ފާޑުކިޔުންތައް އަމާޒުވެފައިވާ ދަނޑިވަޅެއްގައެވެ.
އެގޮތުން، މީހަކު ބެންކޮކުގެ ވީޑިއޯއެއް ހިއްސާކޮށް އެތަނުގައި ހިނގަން ފަސޭހަކަށް ފާހަކޮށް ކޮށްފައިވާ ޕޯސްޓެއް ހިއްސާ ކުރެއްވުމަށްފަހު، މާރިޔާ އިއްޔެ ކުރެއްވި ޕޯސްޓެއްގައި ވިދާޅުވީ، މާލޭގައި ފައިމަގުގައި އުޅުމުގެ މަގު ތަނަވަސްވެފައި ނުވުމަކީ ދެރަ ކަމެއް ކަމަށެވެ. އެގޮތުން މާލޭގެ ދުވާރުތައް ހަނި ކަމަށާ، ކަފިހި ހުރަސް މަތިންވެސް ހިނގަންވެސް އުނދަގޫ ކަމަށް އޭނާ ވިދާޅުވިއެވެ.
އެކަމާއި ގުޅިގެން ގިނަ ބަޔަކު ވަނީ، އޭނާ އަކީ ފަސް އަހަރު ވަންދެން ސަރުކާރުގެ މިނިސްޓަރެއްގެ މަގާމުގައި ހުންނެވި ބޭފުޅެއް ކަމަށާ، އޭރުވެސް މާލޭގެ ހާލަތު އެހެން އޮތް އިރު، ހަނު ހުންނެވުމަށްފަހު މިހާރު ބަސް ބުނުމުގެ ހައްގެއް ނެތް ކަމަށް ބުނެފައެވެ. އަދި އޭރު އަތުގައި ބާރު އޮތް އިރު މައްސަލަ ހައްލުކުރެއްވުމަށް އެއްވެސް ކަމެއް ނުކިރެއްވީ ކީއްވެތޯވެސް މީހުން ވަނީ ސުވާލު އުފައްދަވާފައެވެ.
އާއްމުންގެ އެވާހަކަތަކަށް ރައްދު ދެއްވަމުން މާރިޔާ މިއަދު އެކްސްގައި ކުރެއްވި އެހެން ޕޯސްޓެއްގައި ވިދާޅުވީ، “ދައިތަ ފަސް އަހަރު ވަންދެން ސަރުކާރުގެ މަގާމުގައި ހުރި ކަމަށާ، އެހެން ކަމުން މިހާރު ހަނު ހުންނާށޭ” ބުނެ އޭނާގެ އަނގަ ބަންދު ކުރެވޭނެ ކަމަށް ބަޔަކު ދެކުނަސް އެކަން އެހެން ނުވާނެ ކަމަށެވެ.
އެފަދަ ބަސް ތަކާއި ހުރެ ހަނު ހުރުމަށް އަހަރެން އިންކާރު ކުރަން. އަދި އަހަރެން ކަންބޮޑުވާ ކަންކަމުގައި ބަސް ބުނުމުގައި އެމްޑީޕީ ސަރުކާރުގެ އައުމުގެ ކުރިންވެސް، އެ ސަރުކާރުގައުވެސް، އަދި އޭގެ ފަހުންވެސް ހުންނާނަން.
ޑިފެންސް މިނިސްޓަރ މާރިޔާ އަހުމަދު ދީދީ
މާރިޔާ މިފަދައިން ވިދާޅުވުމާއި ގުޅިގެންވެސް ގިނަ ބަޔަކު އަންނަނީ އޭނާއަށް ފާޑު ކިޔަމުންނެވެ.
Advertisement
This content is created and paid for by advertisers and does not involve Voice Journalists
