ކުރީގެ ރައީސް އިބްރާހީމް މުހައްމަދު ޞާލިހުގެ ވެރިކަމުގައި، ސަރުކާރުގެ ހުއްދައަކާ ނުލައި ރާއްޖޭގައި ތިބި އިންޑިޔާ ސިފައިން، އެގައުމުން ހަދިޔާކުރި ހެލިކޮޕްޓަރ ދުއްވާފައިވާ ކަމަށް ދިފާޢީ ވަޒީރު ޣައްސާން މައުމޫން ވިދާޅުވެއްޖެއެވެ. 

ރާއްޖޭގައި ތިބި އިންޑިޔާ ސިފައިން ރާއްޖެއިން މިހާރު ބާލާއި އޭގެ ބަދަލުގައި މަދަނީ މީހުން ރާއްޖެ ގެނެސްފައިވާއިރު އެކަމާއި ގުޅޭ އިތުރު މައުލޫމާތު ދެއްވުމަށް މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ވަޒީރު ޣައްސާން މައުމޫން ވަނީ، މަދަނީ މީހުންނާއި އަސްކަރިއްޔާ އަކީ ތަފާތު ބައެއް ކަން ފާހަގަ ކުރައްވާފައެވެ. އެގޮތުން މިލިޓަރީ އަކީ “ކޮމާންޑް އެންޑް ކޮންޓްރޯލް ވަކި ހައިރާކީއެއްގެ ދަށުން ހިނގާ ސިސްޓަމެއް” ކަމަށް ވިދާޅުވިއެވެ.

އެވާހަކަ އާއި ގުޅިގެން ނޫސްވެރިއަކު ވަނީ ކުރީ ސަރުކާރުގައި ހެލިކޮޕްޓަރ ދުއްވާ އުޅުނީ ދިވެހި ސަރުކާރުން ހުއްދަ ނުހޯދާތޯ ސުވާލު ކޮށްފައެވެ. 

އެ ސުވާލަށް ޖަވާބު ދެއްވަމުން 19 ވަނަ ރައްޔިތުންގެ މަޖިލީހުގައި ގުރައިދޫ ދާއިރާގެ މެންބަރުކަން ކުރެއްވި، އަދި މަޖިލީހުގެ 241 ކޮމިޓީގައިވެސް ހިމެނިވަޑައިގެންނެވި ޣައްސާން ވިދާޅުވީ، ސަރުކާރުގެ ހުއްދަ ނެތި ނިމިދިޔަ ވެރިކަމުގައި ހެލިކޮޕްޓަރ ދުއްވާފައިވާ ކަމަށެވެ. 

މިއާއެކު ޣައްސާން ވަނީ މި ސަރުކާރުގައި، އެފަދަ ގޮތަކަށްވެސް ހުއްދަ ނެތި ހެލިކޮޕްޓަރ ނުދުއްވޭނެ ކަމުގެ ޔަގީންކަން ދެއްވާފައެވެ.