ކުރީގެ ރައީސް އިބްރާހީމް މުހައްމަދު ޞާލިހުގެ ވެރިކަމުގައި، ސަރުކާރުގެ ހުއްދައަކާ ނުލައި ރާއްޖޭގައި ތިބި އިންޑިޔާ ސިފައިން، އެގައުމުން ހަދިޔާކުރި ހެލިކޮޕްޓަރ ދުއްވާފައިވާ ކަމަށް ދިފާޢީ ވަޒީރު ޣައްސާން މައުމޫން ވިދާޅުވެއްޖެއެވެ.
ރާއްޖޭގައި ތިބި އިންޑިޔާ ސިފައިން ރާއްޖެއިން މިހާރު ބާލާއި އޭގެ ބަދަލުގައި މަދަނީ މީހުން ރާއްޖެ ގެނެސްފައިވާއިރު އެކަމާއި ގުޅޭ އިތުރު މައުލޫމާތު ދެއްވުމަށް މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ވަޒީރު ޣައްސާން މައުމޫން ވަނީ، މަދަނީ މީހުންނާއި އަސްކަރިއްޔާ އަކީ ތަފާތު ބައެއް ކަން ފާހަގަ ކުރައްވާފައެވެ. އެގޮތުން މިލިޓަރީ އަކީ “ކޮމާންޑް އެންޑް ކޮންޓްރޯލް ވަކި ހައިރާކީއެއްގެ ދަށުން ހިނގާ ސިސްޓަމެއް” ކަމަށް ވިދާޅުވިއެވެ.
މިލިޓަރީ މީހުން ތަބާވާންޖެހޭނީ މިލިޓަރީ ކޮމާންޑާސް އަށް. ސިވިލިއަނުން މިތާނގައި އޮޕަރޭޓް ކުރަން ތިބީމަ އަޅުގަނޑުމެންނަށް ކަށަވަރު ކުރެވެނީ މި އެސެޓްސްގެ ފުރިހަމަ ސިޔާދަތު އޮތީ ދިވެހިންގެ އަތުގައި ކަން. އެއީ ކޮމާންޑް އެންޑް ކޮންޓްރޯލް މިހާރު ހަމަޖެހުފައި އޮތް ސިސްޓަމުން އަޅުގަނޑުމެން ހުއްދަދީގެން މެނުވީ އެމީހުންނަށް ފްލައި ނުކުރެވޭނެ
ޣައްސާން މައުމޫން
އެވާހަކަ އާއި ގުޅިގެން ނޫސްވެރިއަކު ވަނީ ކުރީ ސަރުކާރުގައި ހެލިކޮޕްޓަރ ދުއްވާ އުޅުނީ ދިވެހި ސަރުކާރުން ހުއްދަ ނުހޯދާތޯ ސުވާލު ކޮށްފައެވެ.
އެ ސުވާލަށް ޖަވާބު ދެއްވަމުން 19 ވަނަ ރައްޔިތުންގެ މަޖިލީހުގައި ގުރައިދޫ ދާއިރާގެ މެންބަރުކަން ކުރެއްވި، އަދި މަޖިލީހުގެ 241 ކޮމިޓީގައިވެސް ހިމެނިވަޑައިގެންނެވި ޣައްސާން ވިދާޅުވީ، ސަރުކާރުގެ ހުއްދަ ނެތި ނިމިދިޔަ ވެރިކަމުގައި ހެލިކޮޕްޓަރ ދުއްވާފައިވާ ކަމަށެވެ.
“އަޅުގަނޑު ރައްޔިތުންގެ މަޖިލީހުގައި މަސައްކަތް ކުރި އިރު 241 ކޮމިޓީން އޮންނާނެ ބަލާފައި، ދިވެހިންގެ ހުއްދަނެތި ފްލައިޓެއް ދުއްވާފައި އޮތްކަން. ދިވެހިންގެ ހުއްދަނެތި ހެލިކޮޕްޓަރެއް އޭރު އޮތީ ދުއްވާފައި. އެއީ ތިމަރަފުށްޓަށް ލޭންޑް ކުރި ކޭސްއެއް.”.
ޣައްސާން މައުމޫން
މިއާއެކު ޣައްސާން ވަނީ މި ސަރުކާރުގައި، އެފަދަ ގޮތަކަށްވެސް ހުއްދަ ނެތި ހެލިކޮޕްޓަރ ނުދުއްވޭނެ ކަމުގެ ޔަގީންކަން ދެއްވާފައެވެ.
Advertisement
This content is created and paid for by advertisers and does not involve Voice Journalists
