ރާއްޖޭގައި ކޮންމެ ފަސް އަންހެނުންގެ ތެރެއިން ދެ އަންހެނުން ސިޒޭރިއަން ހަދާ ކަމަށް އދ.ގެ އާބާދީ ޖަމިއްޔާ ޔުނައިޓެޑް ނޭޝަންސް ޕޮޕިއުލޭޝަން ފަންޑްގެ ރާއްޖޭގެ ގޮފިން ބުނެފިއެވެ.

ޔޫއެންއެފްޕީއޭ މޯލްޑިވްސްއިން އެކްސްގައި ކުރި ޕޯސްޓެއްގައި ބުނީ، ސިޒޭރިއަން އަކީ ފުރާނަ ސަލާމަތްވާ ކަމެއް ކަމަށެވެ. އެހެން ނަމަވެސް ސިޒޭރިއަން ހަދަން ޖެހޭނީ ސިއްހީ މައްސަލައެއް ނުވަތަ އެމެޖެންސީ ހާލަތެއް ދިމާވުމުންކަމަށް ވެސް ބުނެފައިވެއެވެ. 

މީގެ އިތުރުން ޔޫއެންއެފްޕީއޭއިން ބުނީ ދުނިޔޭގެ ސިއްހަތު ޖަމިއްޔާއި، ޑަބްލިޔުއެޗްއޯ އިން، ރާއްޖޭގައި ސިޒޭރިއަން ހެދުމަށް ރެކޮމެންޑް ކޮށްފައިވާ ރޭޓަކީ 10-15 އިންސައްތަ ކަމަށާ އެހެން ނަމަވެސް ރާއްޖޭގައި ސިޒޭރިއަން ހަދާ ރޭޓް ހުރީ 40 އިންސައްތައިގައި ކަމަށް އެ ޖަމިއްޔާއިން ބުންޏެވެ.

މިއާއެކު އެ 2021 ވަނަ އަހަރު ދުނިޔޭގެ ސިއްހަތު ޖަމިއްޔާއިން ނެރިފައިވާ ސިޒޭރިއަންގެ ތަފާސްހިސާބުތަކަށް އަލިއަޅުވާލަމުން އެ ޖަމިއްޔާއިން ބުނެފައިވާގޮތުން ރާއްޖޭގައި ކޮންމެ ފަސް އަންހެނެއްގެ ތެރެއިން ދެ އަންހެނަކު ވިހަނީ ސީ-ސެކްޝަން މެދުވެރިކޮށް ކަމަށެވެ.

ވިހެއުމުގެ ތެރޭގައި ދިމާވާ އެކި ހާލަތްތަކުގައި މައި މީހާ އާއި ދަރިފުޅު ސަލާމަތްކުރުމަށް ސިޒޭރިއަންގެ މުހިންމުކަން ބޮޑެވެ. އެކަމަކު ސިޒޭރިއަން ހެދުމުން މައިމީހާ އުފުލަންޖެހޭ ވޭން ބޮޑެވެ.

ކަންމިހެން ހުރި ނަމަވެސް، މިފަހަކަށް އައިސް ދުނިޔޭގައުވެސް ސިޒޭރިއަން ހަދާ މީހުންގެ ނިސްބަތް ކަންބޮޑުވާ މިންވަރަށް އިތުރުވެފައިވާ ކަމަށް ޑަބްލިޔުއެޗްއޯގެ ތަފާސްހިސާބު ތަކުން ދައްކައެވެ.

މީގެ އިތުރުން ބަލިވެ އިންނަ މީހުންގެ ތެރެއިން 15 ޕަސެންޓަށް ވުރެ ގިނަ މީހުން ސިޒޭރިއަން ހަދާ ނަމަ އެއީ އެ ގައުމަކަށް މާ މަތީ މިންވަރެއް ކަމަށް ޑަބްލިއުއެޗްއޯ އިން ވަނީ ކަނޑައަޅައިފަ އެވެ.