ކުޑަ ކުދިންނަށް ހާއްސަކޮށްގެން އެލައިޑުން ފޭސްބުކްގައި ކުރިޔަށްގެންދިޔަ މަދަހަ މުބާރާތުގެ ފަހުރުވެރި އެއްވަނަ ހޯދި ހަދީޖާ އަޒްކާ ބިންތް އާދަމްއަށް މުބާރާތުގެ އިނާމުގެ ގޮތުގައި ކަނޑައަޅާފައިވާ ޓެންތް ޖެނެރޭޝަން އައިޕެޑް ހަވާލުކޮށްފިއެވެ.

އެލައިޑު އިންޝުއަރަންސް ކުންފުނީގެ މައި އޮފީހުގައި މިއަދު ކުރިޔަށްގެންދިޔަ ރަސްމިއްޔާތެއްގައި އިނާމު ހަވާލުކޮށްދެއްވާފައިވަނީ އެލައިޑްގެ ޖެނެރަލް މެނޭޖަރ އަހުމަދު ޝާބިގުއެވެ. އަޒްކާގެ ފަރާތުން އިނާމާއި ހަވާލުވެދެއްވީ އަޒްކާގެ ބައްޕަ އާދަމް ނަސީމްއެވެ. 

25 ފެބުރުވަރީއިން 9 އޭޕްރިލްއަށް ކުރިޔަށްގެންދިޔަ މިމުބާރާތުގައި ގިނަ އަދަދެއްގެ ކުދިންގެ ބައިވެރިވުން ލިބުމާއި އެކު އެކަން ފާހަގަކޮށް އެލައިޑުން ވަނީ އާންމުންގެ ފަރާތުން ލިބުނު ތަރުހީބަށް ޝުކުރު ދަންނަވާފައެވެ. 

Advertisement

މީގެ އިތުރުންވެސް އެލައިޑުން ވަނީ މިއަދު ބޭއްވި ޕްރެސް ކޮންފަރެންސްގައި އައު ޕްރޮމޯޝަނެއް ލޯންޗުކޮށްފައެވެ. 

އެލައިޑް އިންޝުއަރަންސް ކުންފުނީގެ އިސްލާމިކް ވިންޑޯ؛ އަޔާދީއިން ފޯރުކޮށްދޭ ޗައިލްޑް އެޑިއުކޭޝަން ތަކާފުލްއަށް ހާއްސަ މިޕްރޮމޯޝަންގެ ތެރެއިން ޕްލޭން ނަގާ އެންމެ ފުރަތަމަ 50 ކަސްޓަމަރުންގެ ފުރަތަމަ މަހުގެ ޕޭމަންޓުން 50% ޑިސްކައުންޓެއް ދިނުމަށް ވަނީ އެ ކުންފުނިން ވަނީ ނިންމާފައެވެ.

ޗައިލްޑް އެޑިއުކޭޝަން ތަކާފުލް ޕްލޭނަކީ ދަރިންގެ މަތީ ތައުލީމަށް ބޭނުންވާ ފަންޑްގާއިމުކުރުމަށް އެޅިދާނެ މުހިންމު ފިޔަވަޅެއްކަމުގައި އަޔާދީއިން ފާހަގަ ކުރެއެވެ. އެގޮތުން 10 މެއި އިން 30 ޖޫންގެ ނިޔަލަށް ކުރިޔަށްގެންދާ ޕްރޮމޯޝަންއާއި ބެހޭ އިތުރު މައުލޫމާތު ހޯއްދެވުމަށް އެލައިޑްގެ ހިލޭ ގުޅޭ ހޮޓްލައިން 1600 އަށް ގުޅުއްވުމަށް އެކުންފުނިން އިލްތިމާސް ކުރެއެވެ.