ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވެވަޑައިގަންނަވާ ވަޢުދުތައް ވެވަޑައިގަންނަވަނީ ހަމައެކަނި ރައްޔިތުންގެ ވޯތު ހޯއްދަވަން ނޫން ކަަށް މަޖިލީހުގެ ވިލިމާލޭ ދާއިރާގެ އިންތިޚާބީ މެންބަރު މުހައްމަދު އިސްމާއީލް ވިދާޅުވެއްޖެއެވެ.
މަޖިލީހުގެ ކެންޕެއިން ދުވަސްވަރު، ދ މީދޫއަށް ވަޑައިގެން، އެ ރަށު ރައްޔިތުންނާއި ބައްދަލުކުރެއްވުމަށް ބޭއްވި ޖަލްސާގައި ރައީސް މުޢިއްޒު ވަނީ، ސަރުކާރު ހުރިހާ ސުކޫލެއް އޭސީ ކުރުމުގެ ޕްރޮގްރާމެއް މި އަހަރު ފަށްޓަވާނެ ކަމަށް ވިދާޅުވެފައެވެ.
އެ ވައުދުފުޅާއި އެއްގޮތަށް، ކުރިއަށް މިއޮތް ދެ އަހަރުގެ ތެރޭގައި ސަރުކާރުގެ ހުރިހާ ސްކޫލެއް އޭސީ ކުރުމަށް ހަމަޖެހިފައިވާކަމަށް ތައުލީމާ ބެހޭ ވަޒީރު އިއްޔެ ވަނީ ވިދާޅުވެފައެވެ.
އެކަމާއި ގުޅިގެން މުހައްމަދު އިސްމާއީލް އެކްސްގައި ކުރެއްވި ޕޯސްޓެއްގައި ވިދާޅުވީ، އެކަމުންވެސް އެނގިގެން ދިޔައީ ރައީސް މުޢިއްޒު އިންތިޚާބު ތަކުގެ ކެންޕެއިން ގަޔާއި އެނޫންވެސް ތަންތަނުގައި ރައްޔިތުންނަށް ވެވަޑައިގަންނަވާ ވަޢުދުފުޅުތަކަކީ ހަމަ އެކަނި ވޯޓު ހޯއްދެވުމަށް ދައްކަވާ ހުސް ވާހަކަ ނޫންކަން ކަމަށެވެ.
އެހެނެއް ކަމަކު އެއީ، ރައްޔިތުންނަށް އެންމެ ބޭނުންޖެހިފައިވާ ކަންކަމުގައި އެހީވުމަށްޓަކައި، އެ ރައްޔިތުންނަށް ތަސައްލީއެއް ދެއްވުމަށް އިޚްލާސްތެރިކަމާއިއެކު ވެ ވަޑައިގަންނަވާ ވައުދެއް ކަމަށްވެސް އޭނާ ވިދާޅުވިއެވެ.
އިންތިޚާބު ނިމުމާއެކު މިހާރު އެވަނީ އެ މަސައްކަތް ފަށްޓަވާފައި
މުހައްމަދު އިސްމާއީލް
މާރިޗު 6 ވަނަ ދުވަހު މީދޫގައި ބޭއްވުނު ޖަލްސާގައި ރައީސް ވިދާޅުވީ, ސްކޫލުތަކުގެ ކްލާސްރޫމުތައް އޭސީ ކުރުމަކީ ކިޔަވާކުދިންނާ ޓީޗަރުންނާ އަދި ސްކޫލުތަކުންވެސް ވަރަށް ބޮޑަށް އެދެމުން އަންނަ ކަމެއްކަމަށެވެ. އަދި އެކަން ކުރުމަށް މަގުފަހިކޮށްދިނުމަށް ސުކޫލްތަކުގައި އިއާދަކުރުވަނިވި ހަކަތައިގެ ޕްރޮޖެކްޓް ތަކެއް ފެށުމަށް ނިންމާފައިވާ ކަމަށް ވިދާޅުވި އެވެ.
“މީކީއެއް ކޮންމެ މަހަކު ކަރަންޓް ބިލު ދައްކަން ބަލާއިރު ދެކޮޅު ޖެހޭނެ ކަމަކަށް ނުވާނެ. އެހެންވީމާ އަޅުގަނޑުމެން ގަސްތުކޮށްފައި މިއޮތީ، މިއަންނަ އަހަރުން ފެށިގެން ސޯލާ ޕަވާރ ބޭނުން ކުރެވޭ، ރިނިޔުވަބަލް އެނާރޖީ ޕްރޮޖެކްޓް ތަކެއް ހުރިހާ ސުކޫލެއްގައި ހިންގަން. ހިންގައިގެން، އެއާއި ގުޅުވާލައިގެން، ސުކޫލު ތަކުން އޭސީ ކުރަން ބޭނުންވާ ސުކޫލުތަކަށް އެ ފުރުސަތު ދޭން. އޭރުން ފުރަތަަމަ ކުރާ އިންވެސްޓްމަންޓް، އިންވެސްޓްމަންޓް އަކަށް ވާނެ. ދެން އޭގެން ލިބޭ ހަކަތައިން، ދެމެހެއްޓިނިވި ގޮތެއްގައި ކްލާސްރޫމްތައް އޭސީ ކުރެވިގެންދާނެ.” ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
