ރާއްޖޭގައި ކެންސަރު ފަދަ ގައިންގަޔަށް ނާރާ ބަލިތައް އިތުރުވަމުން ދާތީ ހާއްސަ ދިރާސާއެއް ކުރުމަށް ދުނިޔޭގެ ސިއްހަތާއިބެހޭ އިދާރާ، ޑަބްލިޔުއެޗްއޯގެ އެހީތެރިކަމަށް އެދިފައިވާ ކަމަށް ސިއްހަތާއި ބެހޭ ވުޒާރާގެ ވަޒީރު ޑރ. އަބްދުالله ހަލީލް ވިދާޅުވެއްޖެއެވެ. 

ސިއްހަތާއި ބެހޭ ވުޒަާރާއިން ކުރިއަށް ގެންދާ މަސައްކަތްތަކާއި ގުޅޭ ގޮތުން މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު ހަލީލް ވިދާޅުވީ، ކެންސަރުގެ އިތުރުންވެސް ގައިން ގަޔަށް ނާރާ ބަލިތައް ރާއްޖޭގައި ފެތުރޭ މިންވަރު އިތުރުވަމުންދާ ކަމަށެވެ.

އެހެންކަމުން، އެކަމާއިގުޅޭ ދިރާސާއެއް ކުރުމަށް ޑަބްލިޔުއެޗްއޯގެ އެހީތެރިކަމަށް އެދުފައިވާ ކަމަށް ވަޒީރު ވިދާޅުވިއެވެ. 

ވަޒީރު ވިދާޅުވީ، އެ ދިރާސާއަށް ބޭނުންވާ މާލީ ކަންކަން ހަމަޖެހުނުހާ އަވަހަކަށް، ދިރާސާގެ މަސައްކަތް ފަށާނެ ކަމަށެވެ. 

މީގެ އިތުރުން ރާއްޖޭގައި ކެންސަރު ހޮސްޕިޓަލު އެޅުމަށް ހަދަންޖެހޭ ފީސިބިލިޓީ ޓެސްޓު މިހާރު ހަދަމުންދާ ކަމަށާ، ގާތްގަނޑަކަށް ދެމަސް ދުވަހުގެތެރޭ އެ މަސައްކަތް ނިމޭނެ ކަމަށް ލަފާ ކުރެވޭ ކަމަށް ވަޒީރު ޚަލީލް ވިދާޅުވުއެވެ. 

އަދި މީގެ އިތުރުން ރާއްޖޭގައި މިވަގުތު ކެންސަރު ބައްޔަށް ދެވޭ ފަރުވާ ހަރުދަނާ ކުރުމަށް، މިހާރު ގާއިމް ކުރެވިފައި ހުރި ފަރުވާގެ އެކި ވަސީލަތްތައް ކުރިއެރުވުމުގެ މަސައްކަތް ކުރައްވަމުންދާ ކަމަށް ވިދާޅުވިއެވެ.