އިދިކޮޅު ފަރާތްތަކުގެ ގޮންޖެހުންތަކާއެކުވެސް ރައީސް ޑރ.މުއިއްޒު ސަރުކާރުގެ ފުރަތަމަ 6 މަސްދުވަހުގެ ތެރޭގައި ދިވެހި ރައްޔިތުންގެ ބޯހިޔާވަހިކަމުގެ މަޝްރޫޢުތަކުގެ ލަނޑުދަނޑިތައް ޙާޞިލުކުރައްވައިފައެވެ.

ރައީސް ޑރ.މުއިއްޒުގެ ސަރުކާރުގެ ފުރަތަމަ ހަ މަސް ދުވަހުގެ ތެރޭގައި ބޯހިޔާވަހިކަމުގެ މުހިންމު ދާއިރާއަށް ބޮޑެތި ކުރިއެރުންތަކެއް ލިބިފައިވާއިރު، އޭގެ ތެރެއިން ފުރަތަމަ ހަތަރު މަސް ދުވަހު ރައްޔިތުންގެ މަޖިލީހުގެ އިދިކޮޅު އަޣުލަބިއްޔަތާ ސަރުކާރަށް ކުރިމަތިލާން ޖެހުނެވެ. ނަމަވެސް އަޒުލް ކުރުމުގެ އިންޒާރުތަކާއެކު ބައެއް ފަރާތްތަކުން ހީކުރި ގޮތާ ޚިލާފަށް، މި ސަރުކާރުން ވަނީ ކުރިއަށްއޮތް ރައްޔިތުންގެ މަޖިލީހުގެ ސުޕަމެޖޯރިޓީ ވެސް ހޯއްދަވައި، ކުރިއަށް އޮތް ފަސް އަހަރުގެ ދައުރަށް އިސްލާހީ ބަދަލުތަކެއް ގެނައުމަށް މަގު ފަހިކޮށްފައެވެ.

ބޯހިޔާވަހިކަމުގެ ރޮނގުން މިހާރު ހުރި ފްލެޓް ތަކުގެ ވެރިންނަށް ލުޔެއް ދިނުމުގެ އިތުރުން ރަށްރަށުގައި ބޯހިޔާވަހިކަމުގެ އާ މަޝްރޫއުތައް އަވަސް ކުރުމަށް ގިނަ ފިޔަވަޅުތަކެއް ވަނީ އަޅާފައެވެ. މާލޭގެ ހިޔާ ފްލެޓް ތަކުގެ ވެރިންގެ ކުލި ކުޑަކޮށް، ފްލެޓް ފިނިޝިންގެ މަސައްކަތުގައި ކުރާ ހަރަދުތައް ފޫބެއްދުމަށް 200،000ރ. އެ ފްލެޓްތަކުގެ ވެރިންނަށް ދެއްވައި، އަދި އެ އިމާރާތްތަކުގައި އިތުރު ލިފްޓް ތައް ބެހެއްޓުމުގެ ވިސްނުން ފުޅާކުރައްވާ އެމަސައްކަތް ވެސް ގެންދަވަނީ ކުރައްވަމުންނެވެ.

ސަރުކާރުން ހިންގާ ބޯހިޔާވަހިކަމުގެ ބައެއް މަޝްރޫއު ރައީސް މުޢިއްޒު ބައްލަވާލެއްވުން

އާ ބޯހިޔާވަހިކަމުގެ މަސައްކަތްތަކަށް ބޮޑު ކުރިއެރުމެއް ލިބިފައިވާއިރު، ރަސްމާލޭގެ ބިން ހިއްކުމުގެ މަޝްރޫއުތަކަށް ފަހުމު ނާމާއެއްގައި ވަނީ ސޮއިކޮށް އެމަސައްކަތް ފައްޓާވާފައެވެ. މި ސަރަހައްދުން މިހާރު ވަނީ ބިން އިތުރުކޮށް ހިއްކާފައެވެ. ހުޅުމާލޭގެ ތިންވަނަ ފިޔަވަހީގެ ހިއްކުމުގެ މަސައްކަތް ނިމިފައިވާއިރު، އެމްޑީޕީ ސަރުކާރުގައި ގޮތެއް ފޮތެއް ނުބަލައި ނަރުދަމާ ހޮޅިތަކުގެ މަތިންނާއި ކަރަންޓް ކޭބަލްތަކުގެ މަތިން ދޫކޮށްފައިވާ ގޯތިތަކުގެ މައްސަލަ ހައްލުކުރުމުގެ މަސައްކަތްވެސް ދަނީ ފެށިގެން ކުރިއަށެވެ.

އޭދަފުށީގައި އަލަށް އިމާރާތްކުރާ 1،000 ހައުސިން ޔުނިޓްގެ އެއްބަސްވުންތަކުގައި ވެސް ވަނީ ސޮއިކޮށްފައެވެ. މީގެ އިތުރުން ފަހި ފްލެޓްތަކުގެ 192 ސްލެބެއް އެންމެ ހަތަރު މަސް ދުވަހުގެ ތެރޭގައި އިމާރާތް ކުރެވިފައިވެއެވެ.

ސަރުކާރުން ހިންގާ ބޯހިޔާވަހިކަމުގެ ބައެއް މަޝްރޫއު ރައީސް މުޢިއްޒު ބައްލަވާލެއްވުން

ރައީސް އިބްރާހިމް މުހައްމަދު ޞާލިޙްގެ ސަރުކާރުން ހަދާފައިވާ ބައެއް ގޯސްތަކުގެ ސަބަބުން ރައްޔިތުންނަށް ދިމާވެފައިވާ މައްސަލަތައް ހައްލުކުރުމަށް ވެސް މި ސަރުކާރުން ފިޔަވަޅުތަކެއް އަޅައި، ކުރީގެ ސަރުކާރުން ޚިޔާނާތްތެރިވި ފްލެޓް ލިސްޓުތަކުގައި ހުރި އޮޅުވާލުންތައް ބެލުމަށް ކޮމިޓީއެއް އެކުލަވާލިއެވެ. އާ ޝެލްޓާ ފައިނޭންސް ސްކީމަކީ ބޯހިޔާވަހިކަމަށް ބޭނުންވާ ފަރާތްތަކަށް އެހީތެރިވުމުގެ ގޮތުން ތައާރަފުކުރި ސްކީމެކެވެ.

ގެދޮރު ގަންނަ ފަރާތްތަކަށް ބޮޑު ލުޔެއް ދިނުމުގެ ގޮތުން ހުރިހާ ފްލެޓެއްގެ ޑައުންޕޭމަންޓްގެ 50 އިންސައްތަ ކުޑަކޮށް، ފައިސާ ދެއްކުމުގެ މުއްދަތު ތިން މަހުން ހަ މަހަށް ވަނީ އިތުރުކޮށްފައެވެ. ލީސް ޓު އޯން މޮޑެލްގެ ދަށުން ވިނަރެސް ފްލެޓްތަކުގެ އިންޓްރެސްޓް ރޭޓް 9 އިންސައްތައިން 6 އިންސައްތައަށް ދަށްކޮށް، މަހަކު ޔުނިޓަކަށް 4،200ރ. ދައްކަން ޖެހޭގޮތަށް މިސަރުކާރުން ވަނީ ހަމަޖައްސައިދީފައެވެ. އަދި އިޖުތިމާއީ ބޯހިޔާވަހިކަމުގެ ފްލެޓާއި ރޯހައުސްތައް ދޫކޮށްފައިވާ ރަށްރަށުގެ ކުލީގެ ގޮތުގައި ވެސް ލުއިތަކެއް ދީފައިވާއިރު، ކުލީގެ ގޮތުގައި 3،333ރ. ދައްކަން ޖެހޭ ގޮތަށް ވަނީ ހަދައިދީފައެވެ.

ސަރުކާރުން ހިންގާ ބޯހިޔާވަހިކަމުގެ ބައެއް މަޝްރޫއު ރައީސް މުޢިއްޒު ބައްލަވާލެއްވުން

އަދިވެސް ޑރ.މުޢިއްޒުގެ ކާމިޔާބު 6 މަސްދުވަހުގެ ތެރޭގައި އެޅުއްވި ޤާނޫނީ ހަރުދަނާ ފިޔަވަޅުތަކުގެ ތެރޭގައި ބޯހިޔާވަހިކަމުގެ މަޝްރޫޢުތައް ކެޓަގަރައިޒްކޮށް ސިސްޓަމެޓިކްކޮށް ރެގިއުލޭޓް ކުރުމުގެ ބިލެއް ޑްރާފްޓްކުރުން ހިމެނެއެވެ. މީގެ އިތުރުން ބޯހިޔާވަހިކަމަށް ހާއްސަކޮށްގެން ފަސް ޕަސެންޓުގެ އާ އިންޓްރެސްޓް ލޯން ސްކީމެއް ވެސް ވަނީ އެކުލަވާލައިފައެވެ.

މީގެ އިތުރުން ފަތުރުވެރިކަމުގެ ސިނާއަތުގައި މަސައްކަތް ކުރާ ފަރާތްތަކަށް ހާއްސަ ސޯޝަލް ހައުސިން ކެޓަގަރީއެއް އުފައްދައި، ކުރިއަށްހުރި މަޝްރޫޢުތަކުން މުސްތަގުބަލުގައި އުފައްދާނެ ސްޓާފް ހައުސިން ޕްރޮޖެކްޓްތަކުގައި އެފަދަ މުއްވައްޒަފުންނަށް އެކޮމޮޑޭޝަން ލިބޭނެ އިންތިޒާމް ވަނީ ހަމަޖައްސާފައެވެ.

ސިނަމާލެ އާއި މާލޭގެ ހިޔާ ބްލޮކްތަކުގެ ހަލާކުވެފައިވާ ފްލެޓްތަކުގައި ދިރިއުޅޭ މީހުން އެހެން ތަނަކަށް ބަދަލުކުރުމަށް ގިނަ ދުވަސްތަކެއް ވަންދެން އިންތިޒާރު ކުރަމުން އައި ބޯހިޔާވަހިކަމުގެ މަޝްރޫއުގެ އަމަލީ މަސައްކަތް ވެސް މިސަރުކާރުން މިވީ ކުޑަދުވަސްކޮޅުގެ ތެރޭގައި ވަނީ ފަށައިފައެވެ.

ސަރުކާރުން ހިންގާ ބޯހިޔާވަހިކަމުގެ ބައެއް މަޝްރޫއު ރައީސް މުޢިއްޒު ބައްލަވާލެއްވުން

ފުރަތަމަ ހަމަސްދުވަހުގެ ތެރޭގައި ދިމާވި ސިޔާސީ ހުރަސްތަކާއެކުވެސް، ރައީސް ޑރ.މުޢިއްޒުގެ ސަރުކާރުން ބޯހިޔާވަހިކަމުގެ ދަތިކަން ޙައްލުކުރުމާއި، އާ ޢިމާރާތްކުރުމާއި، ސިޔާސަތުތައް އިޞްލާޙުކުރުމާއި، ކުރީގެ އޮޅުވާލުންތަކަށް ޙައްލު ހޯއްދަވައިދެއްވުމުގެ ގިނަ ޙަރަކާތްތަކެއް ވަނީ ފެނިގެން ގޮސްފައެވެ.

މި ސަރުކާރުން ރައްޔިތުންގެ މަޖިލީހުގެ ޙާލަތު އިތުރަށް ހަރުދަނާކުރަމުންދާއިރު، މި ބާރު ދެމެހެއްޓުމަށާއި، ރާއްޖޭގެ އެންމެހާ ރައްޔިތުންނަށް ހެޔޮ އަގުގައި، ފެންވަރު ރަނގަޅު ބޯހިޔާވަހިކަމެއް ހޯދައިދިނުމަށް ރައީސުލްޖުމްހޫރިއްޔާ ގެންގުޅުއްވާ ތަޞައްވުރު ގެނައުމުގެ ބިންގާ އެޅިގެން ގޮސް ރައްޔިތުންނަށް މިހާރު މިވަނީ އާއުންމީދުތަކެއް ގެނެސްދީފައެވެ.