ރ. އުނގޫފާރުގައި، މަގުބައްތިއެއް ކައިރީ އޮތް ފެން ކޯރެއްގެ ތެރޭގައި ކުޅެން ތިބި ކުދިން ތަކެއް ކަރަންޓް ޖެހިއްޖެއެވެ.

ފުލުހުންގެ މީޑިއާ އޮފިޝަލް ވިދާޅުވީ، އުނގޫފާރު ކުޑަކުދިންގެ ޕާކު ކައިރީ ހުރި، މަގު ބައްތިއެއް ކައިރީ އޮތް ފެންކޯރެއްގެ ތެރޭގައި ކުޅެން ތިބި ކުދިންތަކެއް ކަރަންޓް ޖެހިގެން އުޅޭ ކަމަށް މިއަދު 13:30 ކަންހާއިރު ފުލުހުންނަށް ރިޕޯޓް ކޮށްފައިވާ ކަމަށެވެ. 

މި ހާދިސާގައި އަނިޔާވެފައި ވަނީ 18 އަހަރުގެ ފިރިހެން ކުއްޖަކާއި 12 އަހަރުގެ އަންހެން ކުއްޖަކަށް ކަމަށާ އެ ދެ ކުދިންނަށްވެސް އުނގޫފާރު ރީޖަނަލް ހޮސްޕިޓަލުގައި ފަރުވާ ދެމުންދާ ކަމަށް އޮފިޝަލް ވިދާޅުވިއެވެ. 

މީގެ އިތުރުން، އެ ދެކުދިން ކަރަންޓް ޖެހުނު މަންޒަރު ފެނުނު ކުއްޖަކު އަނބުރައިގަނެގެން އެ ކުއްޖާއަށްވެސް ހޮސްޕިޓަލުގައި ފަރުވާ ދެމުންދާ ކަމަށް ފުލުހުން ވިދާޅުވިއެވެ.

“ވޮއިސް” އަށް މައުލޫމާތު ލިބުފައިވާ ގޮތުގައި އެ ކުއްޖާއަކީވެސް ކަރަންޓް ޖެހުނު ކުއްޖެކެވެ.  

ފުލުހުންގެ މީޑިއާ އޮފިޝަލް ވިދާޅުވީ، މި ހާދިސާ އާއި ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށެވެ.