ރާއްޖެއަށް އައި ފަތުރުވެރިންތަކެއް ގެންގުޅު އޮޅު ކުއްތާއެއް ކ. ތުލުސްދޫއަށް ދޫކޮށްލި މައްސަލައެއް ފެންމަތިވެއްޖެ އެވެ.
ޔޮޓަކު ގެންގުޅުނު ކުއްތާއެއް ތުލުސްދޫ ބަދަރަށް ބޭލި ވީޑިއޯއެއް މީސްމީޑިއާގައި އަންނަނީ ދައުރުވަމުންނެވެ. އެ ކުއްތާ އެ ރަށަށް ބޭލި ވަގުތުގައި ބަނދުރުގައި މީހުންވެސް ތިއްބެވެ.
މިކަމާއި ގުޅިގެން ފުލުހުންގެ މީޑިއާ އޮފިޝަލް ވިދާޅުވީ، ކ. ހިންމަފުށީ ބޭރުގައި އޮތް ޔޮޓެއްގައި ފަތުރުވެރިންތަކެއް ގެންގުޅުނު ކުއްތާއެއް ކ. ތުލުސްދޫއަށް ބޭލިކަމުގެ ރިޕޯޓް ލިބިގެން ފުލުހުން އެޓެންޑްވެފައުވާ ކަމަށެވެ.
އެ ކުއްތާ މިހާރު އަނބުރާ ޔޮޓަށް ގެންގޮސްފައިވާ ކަމަށާ، އެ ކުއްތާ ރާއްޖެ އެތެރެ ކޮށްފައުވަނީ ހުއްދަ ލިބިގެން ކަމަށް މިހާތަނަށް ބެލި ބެލުމުން އެނގޭ ކަމަށް އޮފިޝަލް ވިދާޅުވުއެވެ.
ރާއްޖެއަށް ކުއްތާ އެތެރެ ކުރުމަކީ މަނާ ކަމެކެވެ. އަދި އެތެރެ ކުރާ ނަމަ ޑިފެންސް މިނިސްޓްރީން ހާއްސަ ހުއްދައެއް ނަގަން ޖެހެ އެވެ. ނަމަވެސް އެ އެތެރެކުރާ ކުއްތާ މީހުން ދިރިއުޅޭ ރަށްރަށަށް ބޭލުމަކީ މަނާ ކަމެކެވެ.
ރާއްޖެއަށް ދިރޭ ޖަނަވާރު އެތެރެ ކުރުމުގެ ގަވާއިދުގައިވާ ގޮތުން، ހުއްދަ ނޫން ޖަނަވާރެއް އެތެރެ ކޮށްފި ނަމަ 50،000ރ. އަށްވުރެ ބޮޑު ނޫން އަދަދަކުން ޖޫރިމަނާ ކުރެވޭނެ އެވެ.
ކުއްތާގެ އިތުރުން ރާމާމަކުނާއި ޖަންގަލީ ވަލު ޖަނަވާރު ރާއްޖެ އެތެރެ ކުރުން ވެސް މަނަލެވެ. ނަމަވެސް ސަލާމަތީ ހިދުމަތްތަކުގެ މަސައްކަތްތައް ފަސޭހައަކަށް ޓްރެއިނިން ދީފައިވާ ކުއްތާ ޑިފެންސް މިނިސްޓްރީގެ ބޭނުމަށް އެތެރެ ކުރުން ހުއްދަ އެވެ. އެއީ އެތެރެ ކުރުމަށެވެ.
Advertisement
This content is created and paid for by advertisers and does not involve Voice Journalists
