ހުޅުމާލެ ފަރުކޮޅުފުށީގައި ޤާއިމުކުރާ ޕެޓް ކެއާ ފެސިލިޓީ ނިމެންދެން މާލޭގެ މަގުމަތީގައި އުޅޭ ބުޅާތަކަށް ވަގުތީ ހިޔާ ފޯރުކޮށްދިނުމުގެ މަސައްކަތް ކުރަމުންދާ ކަމަށް ދަނޑުވެރިކަމާއި ދިރޭތަކެއްޗާއި ބެހޭ ވަޒީރު ޑރ. އައިޝަތު ރަމީލާ ވިދާޅުވެއްޖެއެވެ.

މި ސަރުކާރުގެ ފުރަތަމަ 6 މަސް ދުވަހުގެ ތެރޭގައި ދަނޑުވެރިކަމާއި ދިރޭތަކެއްޗާއި ބެހޭ ވުޒާރާއިން ކުރި މަސައްކަތްތަކާއި ގުޅޭ ގޮތުން މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވަޒީރު ރަމީލާ ވިދާޅުވީ، އެ ވުޒާރާގެ ހަފްތާ 14ގެ މެންޑޭޓްގެ ތެރޭގައި ޕެޓް ޝެލްޓާއެއް ގާއިމް ކުރުމުގެ މަސައްކަތް ކުރުން ހިމެނޭއިރު، އެކަމަށް ބިން ހަމަ ޖެހި، އެ ތަނުގެ މަސައްކަތް މިހާރު ކުރިއަށްދާ ކަމަށެވެ.

"މިވަގުތު ބައުންޑްރީ ވޯލް، ފެންސް ޖަހައި، ބައުންޑްރީ ގާއިމް ކުރެވިފައި ވަނީ. އަދި ބައުންޑްރީ މަސައްކަތް ނިމުމަށްފަހު، އަޅުގަނޑުމެންނަށް އިއްޔެ އެތަން ވަނީ ހަވާލުކުރެވިފައި. އެތަނަށް މަގުމަތީ އުޅޭ ބުޅާތައް ގެނއދިޔުމަށް ވަނީ ވަރަށް ރަނގަޅު ޕްލޭން އެއް އެކުލަވާ ލެވިފައި. މި ޕްލޭން އެކުލަވާލެވިފައިވަނީ މާލެ ސިޓީ ކައުންސިލާއި ޕެޓް ލަވާސް އެންޖީއޯސް ތަކާއިއެކީގައި. ތެރޭގައި ޝެލްޓާ އެޅުމަށް ނިންމާފައިވާ ތަން ނޫން އެހެން ތަނެއްގައި އަޅުގަނޑުމެން ހިޔާކޮށްގެން ޕާޓިޝަންތަކެއް ޖަހައިގެން މަގުމަތީގައި މިއުޅޭ ބުޅާތައް ބެޗް ބެޗަށް ގެންދިޔުމުގެ މަސައްކަތް މިކުރަނީ." ރަމީލާ ވިދާޅުވިއެވެ.

ވަޒީރު އިތުރަށް ވިދާޅުވީ، ޕެޓް ކެއަރ ފެސިލިޓީ ގާއިމް ކުރަނީ ހަތަރު ފަންގި ފިލާގެ އިމާރާތެއްގައި ކަމުން އެކަމަށް ވަގުތުު ހޭދަވާނެ ކަމަށެވެ. އެހެން ކަމުން،  ބުޅާތައް ގެންދިޔުމަށް ވަކިން މިހާރު އެއް ފަންގިފިލާގެ ކެޓް ޝެލްޓާ އެޅުމުގެ މަސައްކަތްކުރާ ކަމަށާ އެތަން ހަދަންވެސް 22 ދުވަސް ނަގާނެ ކަމަށެވެ. ވުމާއެކު ވޭހާވެސް އަވަހަށް ބުޅާތައް ނެގުމަށް އިތުރު ވަގުތީ ތަނެއް ތައްޔާރު ކުރަމުންދާ ކަމަށް ވަޒީރު ވިދާޅުވިއެވެ. 

"އެތަން ނިމުމާއެކު އަޅުގަނޑުމެން ބުޅާތައް ގެންދަން ފަށާނަން." ރަމީލާ ވިދާޅުވިއެވެ.

ރަމީލާ ވިދާޅުވީ މިވަގުތު ބުޅާތަކާއި ގުޅޭ ކަންކަމަށް 2 ވެޓް ޑޮކްޓަރުން އެބަތިބި ކަމަށާއި އެ ޑޮކްޓަރުން ބޭނުންކޮށްގެން ބުޅާތަކުގެ އެސެސްމެންޓެއް ހެދޭނެ ކަމަށެވެ. އެގޮތުން ބުޅާތަކަށް ޖެހިފައިވާ ބަލިތަކާއި ބުޅާތަކުގެ ހާލަތު ބަލައި އެ ބުޅާތަކަށް ދޭންޖެހޭ ފަރުވާތައް ދެވޭނެ ކަމަށް ވިދާޅުވިއެވެ.

އަދި އެ ބުޅާތަކަށް ދޭންޖެހޭ ފަރުވާ ދިނުމަށްފަހު ބުޅާތައް ގެންދަން ބޭނުންވާ ފަރާތްތަކަށް އެ ފުރުސަތު ވެސް ހުޅުވާލާނެ ކަމަށާ ބުޅަލާއި ދޫނި ހިމެނޭހެން ގެންގުޅޭ ޖަނަވާރާއި ދޫނިތައްވެސް ރަޖިސްޓާކޮށްގެން ބެލެހެއްޓިގެން ވެރިފަރާތެއް ހުރެގެން ގެންގުޅެވޭނެ ކަހަލަ ނިޒާމްތަކެއް ގެނައުމަށް އެ ވުޒާރާއިން މަސައްކަތް ކުރަމުންދާ ކަމަށް ވެސް ވަޒީރު ވިދާޅުވިއެވެ.

"ބުޅާ ޕެޓްގެ ގޮތުގައި ގެންގުޅެން ބޭނުންފުޅުވާ ފަރާތްތަކަށް އަޅުގަނޑުމެން ހަމަ އެތަނުގައި މި ގެންދެވޭ ބުޅާތަކުގެ ތެރެއިން ބޭނުންވާ ފަރާތްތަކުން ބުޅާ ގެންގޮސްގެން ގެންގުޅެވޭނެ ގޮތަކަށް ހުޅުވާލެވޭނެ." ރަމީލާ ވިދާޅުވިއެވެ.