ކްލާސް ރޫމްތައް ފިނިވެފައި އޮންނަ މާހައުލެއްްގައި ގަނާ (ބުލީ) ކުރުމާއި، ރުޅިވެރިކަމެއް ނޯންނާނެ ކަމަށް ތައުލީމާ ބެހޭ ވަޒީރު ޑރ. އިސްމާއީލް ޝަފީއު ވިދާޅުވެއްޖެއެެވެ.
ސަރުކާރުގެ ސްކޫލުތައް އޭސީ ކުރުމަށް ކުރިއަށްގެންދާ "ކޫލް ސްކޫލް" މަޝްރޫއު އިފްތިތާހް ކުރުމަށް ކ. މާފުށީގައި ބޭއްވި ޖަލްސާ ޝަރަފުވެރި ކޮށްދެއްވައި ވާހަކަ ދައްކަވަމުން ވަޒީރު ޑރ. ޝަފީއު ވިދާޅުވީ، މިއީ ދަރިވަރުންނާއި މުދައްރިސުން ކްލާސްރޫމްގައި ތިބޭއިރު އިހުސާސްކުރެވޭ ހޫނުމިނުގެ ދަރަޖަ މަތިވެ، އޭގެ ސަބަބުން ތަޙައްމަލު ކުރަންޖެހޭ އުނދަގޫތަކަށް ދާއިމީ ހައްލެއް ހޯދައިދިނުމަށްޓަކައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިރުޝާދާއެކު ކުރިއަށްގެންދާ މަޝްރޫއެއް ކަމަށެވެ.
އަދި ސަރުކާރު ހުރިހާ ސްކޫލެއްގައި އޭސީ ހަރުކުރުމަކީ އަގުބޮޑު މަޝްރޫޢެއް ނަމަވެސް މިފަދަ މަޝްރޫޢެއް ރައީސުލްޖުމްހޫރިއްޔާގެ އިރުޝާދުގެ މަތިން ފައްޓަވާފައި މިވަނީ ތަޢުލީމަށް ކުރާ ހޭދައަކީ ގެއްލިގެންދާނެ އެއްޗެއް ނޫންކަމަށް ރައީސް ދެކެވަޑައިގަންނަވާތީ ކަމަށެވެ.
"ތައުލީމީ ދީގެން އަޅުގަނޑުމެންނާއި، ދަރިވަރުންނަށް ކާމިޔާބު ދިިރިއުޅުމެއް ހޯދާ ދެވޭނީ، ތައުލީމު ދީގެން ވަޒީފާގެ ބާޒާރާއި ޒުވާނުން ނެރެވޭނީ، ތައުލީމް ދީގެން އަޅުގަނޑުމެންނަށް އުފާ ފާގަތިކަމާއި އެކީގައި އުޅެވޭނީ، އެހެންވީމަ ތައުލީމަށް ކުރާ ހޭދަ، އެއީ އެންމެ ފައިސާ ފޮއްޗެއް ކަމުގައިވިޔަސް އެ ފައިސާ ފޮތި ހޭދަ ކުރުމަށް މި ސަރުކާރުން ފަހަތަށް ނުޖެހޭނެ”
ވަޒީރު ޑރ. އިސްމާއީލް ޝަފީއު
މިއާއެކު ވަޒީރު ޝަފީޢު ވިދާޅުވީ ސުކޫލްތައް އޭސީ ކުރުމުން، ސްކޫލް ވެށްޓަކީ އުފާވެރި ހިތްހަމަޖެހޭ ވެށްޓަކަށް ބަދަލުވެ، ދަރިވަރުންގެ ސުލޫކާއި އުޅުމަށް ހެޔޮ ބަދަލުތަކެއް އަންނާނެކަމަށެވެ.
"ފިނިކަމާއި އެކުގައި ދަރިވަރުންގެ ސުލޫކާއި އުޅުމަށް ހެޔޮ ބަދަލުތަކެއް އަންނާނެ، ވިޔާނުދާ ކަންތައްތަކުން ދަރިވަރުން ދުރުވާނެ، ހިތްއުފާވާނެ ޖުމްލަ ގޮތެއްގައި ބުނާނެ ކަމުގައިވަނީމަ، ބުލީއެއް ނުކުރާނެ، ރުޅިވެރިކަމެއް މިފަދަ މާހައުލެއްގައި ނުއެއް އޮންނާނެ، އަދި މުދައްރިސުންނާއި މެނޭޖްމެންޓާއި އެންމެން ގުޅިގެން ކުރާ މަސައްކަތުގައި ނަތީޖާއަކަށް ވާން ވާނީ، ތުއްތު ކުދިންނަކީ ރަަށަށް ގައުމަށް އަދި އެ ކުދިންގެ މުޅި ދިރިއުޅުމަށް އުޖާލާ ކުރަނިވި ފިލާވަޅުތަކެއް، ތަރުބިއްޔަތު ތަކެއް އަދި މުޅި ޖުމްލަކޮށް ކާމިޔާބު އިންސާނެއް އުފެއްދުމަށް ލިބެން ޖެހޭ ހުރިހާ ތައުލީމަކާއި ތަރުބަވީ ކަންތައްތަކެއް ފުރިމަވެފައިވާ ވެއްޓަކަށް ސްކޫލް ވެށި ވެގެން ދިއުން،"،
ވަޒީރު ޑރ. އިސްމާއީލް ޝަފީއު
ކޫލް ސްކޫލް ޕްރޮޖެކްޓްގެ ފޭސް 2 ގައި ސްކޫލުގައި ސޯލަރ ޕެނަލް ހަރުކުރުމަށް ތައުލީމީ ވުޒާރާއިން ނިންމާފައިވާއިރު މީގެ ސަބަބުން ސްކޫލުގައި ބޭނުންކުރާ ކަރަންޓުގެ %30 ސޯލަރ ހަކަތައަށް ބަދަލުވެ، ކަރަންޓަށް ދާ ޚަރަދު ކުޑަވެގެންދާނެ ކަމަށް އެ ވުޒާރާއިން ބުނެފައިވެއެވެ.
ސަރުކާރުގެ އަމާޒަކީ 2026 ވަނަ އަހަރުގެ ދިރާސީ އަހަރުގެ ކިޔެވުން ފެށެންވާއިރަށް ސަރުކާރުގެ ހުރިހާ ސްކޫލެއްގައި އޭސީ ހަރުކޮށް ނިންމާލުންކަމަށް ތަޢުލީމީ ވުޒާރާއިން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
