ފަރެސްމާތޮޑާ އެއާރޕޯޓްގައި ޓްއަރިޒަމްޒޯންއެއް ތަރައްގީ ކުރުމަށްޓަކައި ރީޖަނަލް އެއަރޕޯޓްސް ކޮމްޕަނީ ލިމިޓެޑް އާއި ސިލްވަރ ލޭންޑް ހޮޓެލްސް އާ ދެމެދު އިންވެސްޓްމަންޓް އެމް. އޯ. ޔޫ އެއްގައި ސޮއިކޮށްފިއެވެ. 

މިއަދު ރީޖަނަލް އެއެރޕޯޓްސް ކޮމްޕެނީ ލިމިޓެޑް (އާރް.އޭ.ސީ.އެލްގެ) މައި އޮފީހުގައި ބޭއްވުނު ސޮއި ކުރުމުގެ ރަސްމިއްޔާތުގައި ރީޖަނަލް އެއެރޕޯޓްސް ކޮމްޕެނީ ލިމިޓެޑްގެ ފަރާތުން އެމް. އޯ. ޔޫ ގައި ސޮއި ކުރެއްވީ ކުންފުނީގެ މެނޭޖިންގ ޑައިރެކްޓަރ އަޙްމަދު މުބީންއެވެ. ސިލްވަރ ލޭންޑް ހޮޓެލްސްގެ ފަރާތުން އެމް. އޯ. ޔޫ ގައި ސޮއި ކުރެއްވީ އެ ކުންފުނީގެ ޕްރޮޖެކުޓް މެނޭޖްމަންޓް ހެޑް އިބްރާހިމް މުހަންމަދުއެވެ.

އާރްއޭސީއެލްއިން ބުނީ، މި އެމް. އޯ. ޔޫ ގެ ދަށުން ފަރެސްމާތޮޑާ އެއާރޕޯޓްއާ އިންވެގެން އޮތް ހުސްބިމުގައި 100 ޓުވަރިސްޓް ކޮޓަރި އެކުލެވޭގޮތަށް ސިޓީހޮޓަލްއެއް އެޅިގެންދާނެ ކަމަށެވެ. އަދި މިސިޓީހޮޓަލްގެ ސަބަބުން އެސަރަހައްދުގައި ދިރިއުޅެމުންދާ ރައްޔަތުންނަށް 200 އަށް ވުރެގިނަ ވަޒީފާގެ ފުރުސަތު ހުޅުވިގެން ދިއުމުގެ އިތުރުން އެސަރަހައްދުގައި ވިޔަފާރި ކުރަމުންދާ ފަރާތްތަކަށް ފަހި ފުރުސަތު ތަކެއް ހުޅުވިގެންދާނެ ކަމަށެވެ. 

Advertisement

މި އެއްބަސްވުމާއު ގުޅިގެން ވާހަކަ ދައްކަވަމުން، އާއޭސީއެލްގެ މެނޭޖިންގ ޑައިރެކްޓަރ އަޙްމަދު މުބީން ވިދާޅުވީ، މި އިންވެސްޓްމަންޓް އެމް. އޯ. ޔޫ ގައި ވާކަންކަން ފުރިހަމަ ކުރުމައްޓަކައި ސަރުކާރުގެ ކަމާގުޅުންހުރި ފަރާތްތަކުން ލިބެންޖެހޭ އެއްބާރުލުން ލިބެމުންދާ ކަމުގައި ވާނަމަ 3 މަސްދުވަސް ތެރޭގައި އެގްރީމަންޓްއަކާ ހަމަޔައްދެވި މިޕްރޮޖެޓްގެ މަސައްކަތް ފެށިގެންދާނެ ކަމަށެވެ.

މުބީން އިތުރަށް ވިދާޅުވި ގޮތުގައި މިގޮތައް އެއަރޕޯޓް ތަކުގައި ހުރި ހުސްބިންތަކުގައި މިފަދަ ސިޓީހޮޓަލްތައް އަޅާ ރައްޔަތުންނަށް މިފަދަ އިގްތިސާދީ އިތުރު ފުރުސަތުތައް ހޯދައިދިނުމަކީ ރީޖަނަލް އެއެރޕޯޓްސް ކޮމްޕެނީ ލިމިޓެޑްގެ އެއްއަމާޒްއެވެ. އެހެންކަމުން މިހާރުވެސް އެއަރޕޯޓް ތަކުގައި ހުރި ހުސްބިންތަކުގެ ލޭންޑް ރެޖިސްޓްރޭޝަންގެ ކަންކަންފުރިހަމަކުރުމުގެ މަސައްކަތްތައް ކައުންސިލް ތަކާ އަދި ސަރުކާރުގެ ކަމާގުޅުން ހުރި ފަރާތްތަކާއެކު ވަރަށް ބާރު ސްޕީޑްއެއްގައި ކުރަމުންދާކަމުގައެވެ. އެގޮތުން ކުލުދުއްފުށީ އެއަރޕޯޓްގެ ލޭންޑް ރެޖިސްޓްރޭޝަންގެ މަސައްކަތް ފާހަގަ ކޮއްލެވިއެވެ.

ސިލްވަރ ލޭންޑް ހޮޓެލްސްގެ ފަރާތުން ބުނެފައިވާ ގޮތުން މިއިންވެސްމަންޓްގެ އަގު 20 މިލިއަން ޑޮލަރަށް އަރާނެއެވެ.

މިވަގުތު އާރް.އޭ.ސީ.އެލްގެ ފަރާތުން ޖުމްލަ 07 އެއަރޕޯޓެއް އޮޕަރޭޓްކުރަމުން ގެނދެއެވެ.