ކުޅުދުއްފުށީގައި ހުންނަ ކްލިނިކަކަށް ބަޔަކު ވަދެ އެ ތަނުން ވައްކަންކޮށް ގެއްލުންދީފިއެވެ.
ރޭގެ ވަގުތެއްގައި ކުޅުދުއްފުށީގައި ހުންނަ ‘އިލާ އަލީ އާދަމް ކްލިނިކް’ އަށް ބަޔަކު ވަދެ ވަނީ ވައްކަންކޮށްފައެވެ. އެގޮތުން ވައްކަން ކުރަން ވަދެފައިވަނީ ކުޑަ ދޮރެއްގެ ބިއްލޫރުގަނޑު ތަޅާލައިގެންނެވެ.
އެ ކްލިނިކުން މަޢުލޫމާތު ދިންގޮތުގައި އެ ތަނުގައި ބޭނުންކުރާ ދެ މޯބައިލް ފޯނަކާއި، ބްލަޑް ޕްރެޝަރ ބަލާ މެޝިނަކާއި، ދެ ޔޫޕީއެސް ވަގަށް ގެންގޮސްފައިވާކަން ވަނީ ފާހަގަކުރެވިފައެވެ.
މިއަދަކީ އެތެރެހަށީގެ ޑޮކްޓަރ، ޑރ.މުޙައްމަދު ޢަލީ ބަލިމީހުން ބެލުމަށް ހަމަޖެހިފައިވާ ދުވަހެއްކަމުން ކައިރި ރަށްރަށުންވެސް ގިނަ އަދަދެއްގެ މީހުން ވަނީ އެޕޮއިންޓްމަންޓް ހައްދާފައިވާ ކަން އެ ކްލިނިކުން ފާހަގަކުރެއެވެ.
މިކަމާއި ގުޅިގެން ފުލުހުންގެ މީޑިއާ އޮފިޝަލް ވިދާޅުވީ، އެ މައްސަލަ ފުލުހުންނަށް ރިޕޯޓް ކޮށްފައިވާ ކަމަށާ ނަމަވެސް މައްސަލައާއި ގުޅިގެން އަދި މީހަކު ހައްޔަރު ނުކުރާ ކަމަށެވެ.
މި މައްސަލަ ދަނީ ފުލުހުން ތަހުގީގު ކުރަމުންނެވެ.
Advertisement
This content is created and paid for by advertisers and does not involve Voice Journalists
