މި ސަރުކާރުން ރައްޔިތުންނަށް ވެފައި އޮތް ބޮޑު ވައުދު ފުއްދުމަށްޓަކައި އަންނަ އަހަރު ސަރުކާރުން ރައްޔިތުންގެ މަޖިލީހަށް ހުށަހަޅާ ބަޖެޓްގެ ޕީއެސްއައިޕީ މަޝްރޫއުތަކަށް ހާއްސަ ކުރާ ފައިސާގެ ތެރެއިން 50 އިންސައްތަ ހޭދަކުރާނީ ގެދޮރު ބިނާ ކުރެއްވުމަށް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މިރޭ ޕީއެންސީ މައިޖަގަހަ ، ޕީއެންސީ ހައުސް ހުޅުވުމަށް ބޭއްވި ޚާއްޞަ ރަސްމިއްޔާތުގައި ވާހަކަފުޅު ދައްކަވަމުންނެވެ.
ޕީއެންސީގެ މައި ޖަގަހަ ހުޅުވުމަށް މިރޭ ބޭއްވި ޖަލްސާގައި ވާހަކަ ދައްކަވަމުން ރައީސް ވިދާޅުވީ، މި ސަރުކާރުން ރައްޔިތުންނަށް ވެފައި އޮތީ ބޮޑު ދެ ވައުދު ކަމަށާއި އެއީ ގެދޮރުވެރިކަން ހޯދައިދިނުމާއި ވަޒީފާގެ ވައުދު ކަމަށެވެ.
ގެދޮރުވެރިކަމުގެ މައްސަލަތައް ހައްލުކުރުމުގެ މަސައްކަތް ސަރުކާރުން ބާރު ސްޕީޑުގައި ކުރިއަށް ގެންދަވާ ކަމަށް ރައީސް ވިދާޅުވިއެވެ. އަދި ގެދޮރުވެރިކަމުގެ ވައުދަކީ އެންމެ ބޮޑު ވައުދު ކަމަށާއި އެ ވައުދު ފުއްދަވާނެ ކަމަށް ރައީސް ތަކުރާރު ކުރެއްވިއެވެ.
ރައީސް ވިދާޅުވީ، އަންނަ އަހަރަށް މި ސަރުކާރުން ފާސްކުރާ ބަޖެޓުގައި އެންމެ އިސްކަމެއް ދޭނީ ގެދޮރުވެރިކަމުގެ މަޝްރޫއުތައް ހިންގެވުމަށް ކަމަށެވެ. އަދި ޕީއެސްއައިޕީ މަޝްރޫއުތަކުގެ ތެރޭގައި މަދުވެގެން 50 އިންސައްތަ ކަނޑައަޅާނީ ކޮންމެ އަހަރަކު ގެދޮރު ބިނާކުރުމަށް ކަމަށާއި މި ފަސް އަހަރުގެ ތެރޭގައި ގެދޮރުވެރިކަމުގެ މައްސަލަ އެއްކޮށް ހައްލުވެގެންދާނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ މިއަހަރުގެ ބަޖެޓަކީ އެމަނިކުފާނުގެ ސަރުކާރުން އެކުލަވާލި ބަޖެއްޓެއް ނޫންކަމަށާއި، މަޝްރޫޢުތައް މިއަހަރު ރަނގަޅަށް ނުފެށިގެން އުޅެނީ މިއަހަރުގެ ބަޖެޓްގައި ގެދޮރުވެރިކަމުގެ މަޝްރޫޢުތަކަށް އެކަށީގެންވާ މިންވަރަށް ފައިސާ ޖަހާފައި ނެތުމުންކަމަށެވެ.
އެމަނިކުފާނު ވިދާޅުވީ އެކަން އެހެން އޮތްނަމަވެސް މިފަސްއަހަރު ނިމޭއިރު އެމަނިކުފާނުގެ ވައުދުފުޅުތައް ރަނުންރަނަށް ފުއްދަވާނެކަމުގެ ފުރިހަމަ ޔަޤީންކަން ރައްޔިތުންނަށް ދެއްވާ ކަމުގައެވެ.
Advertisement
This content is created and paid for by advertisers and does not involve Voice Journalists
