ގައުމެއްގެ އިގްތިސާދު ކުރި އަރުވައިދިނުމުގައި އެގައުމުގެ ސައިޒަށް ޗައިނާއިން ނުބަލާ ކަމަށް އިގުތިސާދީ ކަންކަމާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.

ޗައިނާގައި ކުރިއަށްދާ ވޯލްޑް އެކޮނޮމިކް ފޯރަމް، "ސަމާ ޑާވޯސް ފޯރަމް" ގެ އަހަރީ ބައްދަލުވުމުގައި ބައިވެރިވެވަޑައިގަތުމަށް ވަޒީރު ސައީދު އެގައުމަށް ވަޑައިގެން، ފޯރަމްގެ ހަވާސާގައި ޗައިނާގެ ނޫހެއް ކަމަށްވާ  "ބެއިޖިން ޑެއިލީ" އަށް ދެއްވި އިންޓަވިއުއެއްގައި އެބޭފުޅާ ވިދާޅުވީ، ދިވެހިރާއްޖެ އާއި ޗައިނާ ދެމެދު އޮތީ ތަރައްގީކޮށް ކުރިއެރުވުމުގެ ސާބިތު ގުޅުމެއް ކަމަށެވެ.

މީގެ އިތުރުންވެސް ޗައިނާގެ އިތުރު ސިޓީތަކުން ރާއްޖެއަށް ދަތުރުކުރެވޭ ގޮތަށް ފުރުސަތު ފަހިކުރެވިފައިވާ ކަން ފާހަގަކުރައްވަމުން ވަޒީރު ސައީދު ވިދާޅުވީ، ރާއްޖެ އަށް އަދިވެސް އެންމެ ގިނަ ފަތުރުވެރިން ޒިޔާރަތްކުރަނީ ޗައިނާ އިން ކަމަށެވެ.

ރާއްޖެ އާއި އާއި ޗައިނާއާ ދެމެދު އޮތް ގުޅުން ދުވަހެއް ދުވަހަކަށް ބަދަހިވަމުންދާއިރު، ޗައިނާގެ ބެލްޓް އެންޑް ރޯޑް އިނިޝިއޭޓިވްގައި ރާއްޖެއަކީ ވަރަށް މުހިންމު ބައިވެރިއެއް ކަމަށް ވެސް ވަޒީރު ސައީދު ވިދާޅުވިއެވެ.

ޗައިނާގެ ދާލިއަންގައި ކުރިޔަށް ގެންދާ ސަމާ ޑާވޯސް ފޯރަމް" ގެ އަހަރީ ބައްދަލުވުން އިއްޔެ ފެށިއިރު، މި ފޯރަމް ކުރިއަށްދަނީ މާދަމާގެ ނިޔަލަށެވެ.