ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމް މަގާމުން ވަކިކުރުމަށް ގޮވާލައި، ރައްޔިތުންގެ މަޖިލީހުގެ ކުރިމަތީގައި އާއްމުން މުޒާހަރާ ކުރަން ފަށައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާ ކުރިއަށް ދިޔަ ވަގުތު ކުރިއަށްދިޔަ މި މުޒާހަރާގައި، މުޒާހަރާގެ ބައިވެރިން ވަނީ  ޕީޖީ ޝަމީމަކީ ލާދީނީ ފިކުރުގެ މީހެއް ކަމަށާއި އޭނާގެ މަޤާމުގެ ޒިންމާ އަދާނުކުރެވޭކަމަށް ބުނެ މަގާމުން އިސްތިއުފާ ދިނުމަށް ގޮވާލާފައެވެ.

ހަމައެއާއިއެކު، ޕީޖީ ޝަމީމް އަކީ ވެސް ދީނަށް ފުރައްސާރަކޮށް ރިޕޯޓް ލިޔުނު އެމްޑީއެންގެ ބޭފުޅެއް ކަމަށާއި، އޭނާއަކީ އިސްލާމްދީނުގެ ޢަދުއްވެއްކަމަށް ވެސް މުޒާހަރާގެ ބައިވެރިން ވަނީ ގޮވާލާފައެވެ.

Advertisement

މީގެ އިތުރުންވެސް، ވާނުވާ އުވާލައި، ފުލުހުންގެ އަނިޔާވެރިކަން ހުއްޓުވުމަށްވެސް މުޒާހަރާގެ ބައިވެރިން ގޮވާލިއިރު، އެފަރާތްތަކުން ވަނީ އެކި ކޭސްތަކުގައި ދައުލަތުން އަމަލުކުރަމުންދާ ގޮތާއި މެދު ވެސް ހިތްހަމަނުޖެހުން ފާޅުކޮށްފައެވެ.

ވަރަށް ފަހުން ބަޔަކު ޕީޖީ ޝަމީމަށް ހަމަލާ ދީފައިވާއިރު، އޭގެ ފަހުން އެބޭފުޅާގެ ސެކިއުރިޓި ވަރުގަދަކޮށްފައިވާ ކަން ފާހަގަކޮށްލަން ޖެހެއެވެ.

ޝަމީމް ޕީޖީ ގެ މަގާމަށް އައްޔަނުކޮށްފައިވަނީ 2019 ވަނަ އަހަރުއެވެ.