ސަތޭކަ ކިލޯގެ މަސްތުވާތަކެތި އަތުލައިގަތް މައްސަލައިގައި ހައްޔަރުކުރެވި ދޫކޮށްލެވިފައި ހުރި މީހަކު އަނެއްކާވެސް މަސްތުވާތަކެތީގެ މައްސަލައެއްގައި ހައްޔަރުކޮށްފިއެވެ.

އެގޮތުން ހައްޔަރުކުރެވުނީ ގއ. ކޮލަމާފުށި ސޯސަންގެ އިބްރާހީމް ޒައިދު ހަބީބެވެ. އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ކްރިމިނަލް ކޯޓުން ވަނީ 5 ދުވަހުގެ މުއްދަތަށް ބަންދުކުރުމަށް އަމުރުކޮށްފައެވެ.

ކޯޓު އަމުރުގައި ބަޔާންކޮށްފައިވާ ގޮތުގައި، އިބްރާހިމް ޒައިދު ލައިގެން ހުރި ސޯޓުބުރީގެ ވައަތު ފަރާތު ޖީބުން އެއް ރަބަރު ފެނިފައިވެއެވެ. އަދި އޭނާ ދިރިއުޅޭ ގެ ބަލައި ފާސްކުރުމުން، ޑިޖިޓަލް ކައްޓަކާއި ހުސް ސެލޯފިން ރޯލަކާއި ހުސް ޕްލާސްޓިކު ކޮތަޅުގެ އިތުރުން މަސްތުވާތަކެތި ކަމަށް ޝައްކުކުރެވޭ އެއްޗެހި އަޅާފައި ހުރި ގިނަ އަދަދެއްގެ ސެލޯފިންކޮޅުތައް ފުލުހުން ވަނީ ހޯދާފައެވެ.

Advertisement

އިބްރާހިމް ޒައިދަކީ ކުށުގެ ރެކޯޑު އޮންނަ މީހެއްކަން ވެސް ކޯޓު އަމުރުގައި ފާހަގަކޮށްފައިވެއެވެ.

ޒައިދަކީ 2021 ވަނަ އަހަރު ފުލުހުން ހިންގު އޮޕަރޭޝަނެއްގެ ތެރެއިން، އދ. ބޮޑުކާށިހުރާ ނަމަކަށް ކިޔާ ފަޅު ރަށެއްގައި ފޮރުވާފައި ހުއްޓައި 100 ކިލޯ ޑްރަގް ހޯދައި، އެކަމުގެ ތުހުމަތުގައި ހައްޔަރު ކުރެވުނު މީހެކެވެ. އެ އޮޕަރޭޝަނުގައި 24 ގަޑިއިރުތެރޭ ފުލުހުން އަތުލައިގަތީ 100 ކިލޯގެ ހެރޮއިންއެވެ. އެ ތަކެތި ހޯދީ 10 ތަނެއް ބަލައި ފާސްކޮށްގެން ކަމަށް ފުލުހުން އޭރު ބުނެފައިވެއެވެ.