ދިވެހިރާއްޖޭގެ ސިޔާދަތާއި މިނިވަންކަމަށް އެންމެ ހަރުދަނާ ފިޔަވަޅުތަކެއް އެޅުއްވީ އަދުގެ ރައީސުލްޖުމްހޫރިއްޔާ ޑރ މުހައްމަދު މުޢިއްޒު ކަމަށް ވިލިމާލޭ ދާއިރާގެ މެންބަރު މުހައްމަދު އިސްމާޢީލް ވިދާޅުވެއްޖެއެވެ. 

މިރޭ ބޭއްވި ޕީއެންސީގެ ޖަގަހަ ޖަލްސާގައި ވާހަކަ ދައްކަވަމުން މުހައްމަދު އިސްމާއީލް ވަނީ، ކުރީގެ ރައީސް ޔާމީން އަބްދުލްޤައްޔޫމް އިސްވެ ހުންނަވައި އުފެއްދެވި ޕީއެންއެފްގެ ޖަލްސާ ތަކުގެ ރައީސް ޔާމީނާއި އެ ޕާޓީގެ އިސް މެންބަރުން ދައްކަވަމުންދާ ވާހަކަތަކަށް ރައްދު ދެއްވާފައެވެ.

އެގޮތުން ރައީސް މުޢިއްޒު ރައީސުލްޖުމްހޫރިއްޔާ ކަމުގެ ހުވާ ކުރެއްވި ދުވަހު، ދިވެހި ގައުމީ ދިދަ އަށް މުޚާތަބު ކުރައްވައި، “އޭ މިހިރަ ދިދަޔާއޭ” ވިދާޅުވެ ދެއްކެވި ވާހަކަ ތަކަށް ފާޑުވިދާޅުވަމުން، ރައީސް ޔަާމީން ދެއްކެވި ވާހަކަ ތަކަށް ރައްދު ދެއްވަމުން މުހައްމަދު އިސްމާައީލް، ވުދާޅުވީ، އެފަދައިން ރައީސް މުޢިއްޒު ވިދާޅުވީ ސަބަބެއް އޮވެގެން ކަމަށެވެ. 

Advertisement

މިއާއެކު މުހައްމަދު ވިދާޅުވީ، ޕީއެންއެފްގެ ޖަލްސާތަކުގައި، ކުރީގެ ނާއިބު ރައީސް ޑރ. މުހައްމަދު ޖަމީލާއި، ކުރީގެ ޓެކްނޮލޮޖީ މިނިސްޓަރ މަލީހް ޖަމާލް ދައްކަވަމުންދަނީ ބުހުތާނު ދޮގު ވާހަކަތައް ކަމަށެވެ. އަދި އެފަދައިން ވާހަކަ ދައްކަވައިގެން މުޅި ގައުމު ފަސާދަ ކުރައްވަން މަސައްކަތް ކުރެއްވި ނަމަވެސް އެ ފުރުސަތު ނުދެއްވާނެ ކަމަށް އޭނާ ވިދާޅުވިއެވެ. 

މުހައްމަދު ވިދާޅުވިގޮތުގައި، ޑރ ޖަމީލަކީ ރާއްޖެއަށް ފައުދާވާ އެއް ކަމެއްވެސް ކުރެއްވި ބޭފުޅެއް ނޫނެވެ. ބަދަލުގައި އެމަނިކުފާނު މަސަައްކަތް ކުރެއްވީ އަމިއްލަ ޖީބު ބޮޑު ކުރައްވައި، ކޮއްކޮ މަލީހަށް މިނިސްޓަރުކަން ހޯއްދަވައި ދެއްވުމަށް ކަމަށްވެސް މުހައްމަދު ވިދާޅުވިއެވެ. 

މީގެ އިތުރުންވެސް މިރޭގެ ޖަލްސާގައި މުހައްމަދު ވަނީ، ޕީއެންއެފްގެ އިސް ބޭފުޅޫންނަށް ވަރަށް ބޮޑަށް ފާޑުވިދާޅުވެފައެެވެ.