ނިމިދިޔަ ރައީސް އިބްރާހީމް މުހައްމަދު ޞާލިހުގެ ސަރުކާރުގައި، ވިލުފުށްޓާއި އިތުރު ދެ ރަށެއްގައި އެއާޕޯޓް އަޅަން ހަވާލުކޮށްފައި އޮތީ، އާއްމު ގޮތެއްގައި އެއާޕޯޓް އަޅާ އަގަށްވުރެ ބޮޑު އަގެއްގައި ކަމަށް އިމާރާތް ކުރުމާއި ބިނާރާ ބެހޭ ވުޒާރާގެ ވަޒީރު އަބްދުالله މުއްޠަލިބު ވިދާޅުވެއްޖެއެވެ. 

މަޖިލީހުގެ މިއަދުގެ ޖަލްސާގައި ވަޒީރާ ސުވާލު ކުރުމަށް ހުޅުވާލި ފުރުސަތުގައި ވިލުފުށީ ދާއިރާގެ މެންބަރު ހަސަން ވަހީދުވަނީ ދާއިރާ ރަށްތަކުގައި ކުރިއަށްދާ  މަޝްރޫޢުތަކާއި ގުޅޭ ގޮތުން ސުވާލު ކުރައްވާފައެވެ.

އެގޮތުން، ބުރުނީގެ މަގުތަކުގެ މަސައްކަތް ނިމޭނެ އިރަކާއި، މަޑިފުށީގެ މަގުތަކުގެ މަސައްކަތް އަލުން ފެށޭނެ ތާރީޚެއްގެ އިތުރުން، ވިލުފުށީ އެއާޕޯޓްގެ މަސައްކަތް ފެށޭނެ ތާރީޚަކާއި ގުޅޭގޮތުން ސުވާލު ކުރައްވާފައެވެ.

Advertisement

ވިލުފުށީ ދާއިރާގެ މެންބަރު ހަސަން ވަހީދު

އެ ސުވާލަށް ޖަވާބު ދެއްވަމުން ވަޒީރު މުއްޠަލިބު ވިދާޅުވީ، މިހާރު ނުފެށި ހުރި މަޝްރޫޢުތަށް ފެށުމަށް ދައުލަތުގެ ބަޖެޓްގައި ހުރި މިންވަރު ބަލައި، މަޝްރޫއުތައް ތަރުތީބު ކުރުމުގެ މަސައްކަތް ކުރައްވަމުންދާ ކަމަަށެވެ. އަދި އެކަން ކުރެވުމުން މަސައްކަތް ފެށޭނެ ތާރީޚް އެނގިގެންދާނެ ކަމަށެވެ. 

މިއާއެކު ވަޒީރު ވަނީ އެ ތިން އެއާޕޯޓްގެ މަސައްކަތް ހަވާލުކޮށްފައި އޮތީ އާއްމު އުސޫލުން ބިން ހިއްކަން ހަވާލުކުރާ ވަރަށްވުރެ އަގު ބޮޑުކޮށް ކަމަށެވެ. 

މިއާއެކު ވަޒީރު ވިދާޅުވީ އެ އެއާޕޯޓް ތަކުގެ މަސައްކަތް ކުރިއަށް ގެންދޮޔުމަށް ކޮންޓްރެކްޓަރާއި ވާހަކަ ދައްކަވަމުންދާ ކަމަށެވެ. އެކަން ކޮންޓްރެކްޓަރަށް ކުރިއަށް ނުގެންދެވޭ ނަމަ، މަސައްކަތް ކުރިއަށް ގެންދެވޭނެ އެހެން ގޮތްވެސް ހުރި ކަމަށެވެ. ނަމަވެސް މިހާރު މަސައްކަތް ކުރަމުންދަނީ ހެދިފައި އޮތް ކޮންޓްރެކްޓާއި އެއްގޮތަށް މަސައްކަތް ކުރިއަށް ގެންދިޔުމަށް ކަމަށް ވަޒީރު ވިދާޅުވިއެވެ.

ަ