ކުރީގެ ރައީސް އިބްރާހީމް މުޙައްމަދު ޞާލިހުގެ މަންމާފުޅު މޫމިނާ ހަސަންފުޅު މިއަދު ނިޔާވެއްޖެއެވެ.
މޫމިނާ ހަސަންފުޅުގެ ނިޔާވީ އޭޑީކޭ ހޮސްޕިޓަލުގައި ފަރުވާދެމުން ގެންދަވަނިކޮށް މިއަދު ހެނދުނުގެ ވަގުތެއްގައެވެ. ނިޔާވިއިރު ޢުމުރުފުޅަކީ 80 އަހަރެވެ.
ރައީސް ޞާލިހުގެ މަންމާފުޅު ނިޔާވުމާއި ގުޅިގެން، ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އިން ވަނީ އާއިލާއަށް ތައުޒިޔާ ފޮނުއްވައި އެކްސްގައި ޕޯސްޓެއް ކޮށްފައެވެ.
އެ ޕޯސްޓުގައި ބުނެފައިވަނީ ރައީސް ޞާލިހުގެ މަންމާފުޅު ނިޔާވުމުގެ ހިތާމައިގައި، އެ ޕާޓީގެ އެންމެހައި މެމްބަރުންގެ ފަރާތުން ރައީސް ޞާލިހަށާއި އެމަނިކުފާނުގެ އާއިލާއަށް ތައުޒިޔާ ދަންނަވާ ކަމަށެވެ.
މީގެ އިތުރުން، އެމްޑީޕީގެ ޕޯސްޓުގައި މަރުހޫމާއަށް ސުވަރުގޭގެ ދާއިމީ ނިޢުމަތް މިންވަރުކޮށްދެއްވައި، އާއިލާއަށް ކެތްތެރިކަން ދެއްވުމަށް އެދި މާތްالله އަށް ދުޢާކުރާ ކަމަށްވެސް ބަޔާންކޮށްފައިވެއެވެ.
މޫމިނާ ހަސަންފުޅަށް ޞާލިހުގެ އިތުރުން ލިބިވަޑައިގެންނެވި ބޭފުޅުންގެ ތެރޭގައި، ރައްޔިތުންގެ މަޖިލީހުގެ ހުޅުމާލެ ދާއިރާގެ ކުރީގެ މެންބަރު އަލީ ނިޔާޒާއި މަޖީދިއްޔާ ސްކޫލުގެ ޕްރިންސިޕަލް އައިޝަތު މުޙައްމަދު ސޯލިހާއި, ތިން ރައީސުންގެ ސެކްރެޓަރީކަން ކުރެއްވި ފާތިމަތު މުޙައްމަދު ސޯލިހުގެ އިތުރުން ލޯފަން ދެ ހާފިޒުން ހިމެނެއެވެ.
Advertisement
This content is created and paid for by advertisers and does not involve Voice Journalists
