ކުރީގެ ރައީސް އިބްރާހީމް މުޙައްމަދު ޞާލިޙުގެ މަންމާފުޅު މުއުމިނާ ޙުސައިންފުޅު އަވަހާރަވުމާ ގުޅިގެން، ރައީސުލްޖުމްހޫރިއްޔާަ ޑރ.މުޙައްމަދު މުޢިއްޒު ރައީސް ޞާލިޙުގެ ޢާއިލާއަށް ތަޢުޒިޔާ ފޮނުއްވައިފިއެވެ.

މޫމިނާ ހަސަންފުޅުގެ ނިޔާވީ އޭޑީކޭ ހޮސްޕިޓަލުގައި ފަރުވާދެމުން ގެންދަވަނިކޮށް މިއަދު ހެނދުނުގެ ވަގުތެއްގައެވެ. ނިޔާވިއިރު ޢުމުރުފުޅަކީ 80 އަހަރެވެ.

އެކަމާއި ގުޅިގެން ރައީސް މުޢިއްޒު އެކްސް ގައި ކުރެއްވި ޕޯސްޓެއްގައި ވިދާޅުވެފައިވަނީ، ރައީސް ޞާލިޙުގެ މަންމާފުޅު އަވަހާރަވުމުގެ ހިތާމައިގައި ބައިވެރިވެ، އެމަނިކުފާނުގެ ޢާއިލާއަށް ހިތުގެ އިޚްލާޞްތެރިކަމާއެކު ތަޢުޒިޔާ ދަންނަވާ ކަމަށެވެ. އަދި ޢާއިލާއަށް ކެތްތެރިކަން ދެއްވުން އެދި ދުޢާކުރައްވާ ކަމަށްވެސް ވިދާޅުވެފައިވެއެވެ.

Advertisement

މީގެއިތުރުން، ރައީސް މުޢިއްޒު އެ ޕޯސްޓުގައި މަރްޙޫމާ މުއުމިނާ ޙުސައިންފުޅަށް ސުވަރުގޭގެ ދާއިމީ ނިޢުމަތް ލިބިވަޑައިގަތުން އެދި ދުޢާކުރައްވާފައިވެއެވެ.

"މާތްﷲގެ ތަނަވަސްވެގެންވާ ރަޙްމަތާއި ރުހިވޮޑިގަތުމާއި މަޣްފިރަތުގައި، ސުވަރުގޭގެ ދާއިމީ ނިޢުމަތުގައި މަރްޙޫމާ މުއުމިނާ ޙުސައިންފުޅު ލަހައްޓަވާށިއެވެ. އާމީން" ރައީސް މުޢިއްޒުގެ ޕޯސްޓުގައި ވިދާޅުވިއެވެ. 

ރައީސް މުޢިއްޒުގެ އިތުރުން ‬ނާއިބު ރައީސް ހުސައިން މުހައްމަދު ލަޠީފާއި މަޖިލީހުގެ ރައީސް އަބްދުއްރަހީމްވެސް ވަނީ ޞާލިހުގެ މަންމާފުޅު އަވަހާރަވުމާއު ގުޅިގެން ތައުޒިޔާ ފޮނުވާފައެވެ.