އެމްޑީޕީގެ ކުރިމަގު ބިނާކުރުމަށް އެކުލަވާލާ "އެމްޑީޕީ ރޯޑްމެޕް" އަށް ޕާޓީގެ އާންމު މެންބަރުންގެ ޚިޔާލާއި މަޝްވަރާ ހޯދުމަށް ކުރާ ސިލްސިލާ ދަތުރުތަކުގެ ތެރެއިން ޕާޓީގެ އިސް މެންބަރުން މިއަދު ފުވައްމުލައް ސިޓީއަށް ވަޑައިގެންފިއެވެ.

މި ދަތުރުގައި ޗެއަރޕާސަން ފައްޔާޒު އިސްމާޢީލްގެ އިތުރުން ޗެއަރޕާސަންގެ ނައިބު އަޙްމަދު ޢަބްދުالله އަދި ޕާލިމެންޓަރީ ގްރޫޕުގެ ލީޑަރު، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ބައިވެރިވެ ވަޑައިގަންނަވައެވެ.

މި ސިލްސިލާ ދަތުރުތައް ފެށިފައިވަނީ މި މަހުގެ 17 ވަނަ ދުވަހުއެވެ. އެންމެ ފުރަތަމަ ލީޑަރޝިޕްގެ ބޭފުޅުން ވަޑައިގެންފައިވަނީ އައްޑޫސިޓީއަށެވެ.

Advertisement

“އެމްޑީޕީ ރޯޑްމެޕް” އަށް ޕާޓީގެ އާންމު މެންބަރުންގެ ހިޔާލު ހޯދުމަށް ކުރާ ސިލްސިލާ ދަތުރުތަކުގެ ތެރެއިން: ފޮޓޯ/ އެމްޑީޕީ⁦‪

މި ދަތުރުތަކުގެ ފުރަތަމަ ބުރުގައި އައްޑޫ، ފުވައްމުލައް އަދި ތިނަދޫ ސިޓީއާއި ހުވަދު އަތޮޅުގެ ހުރިހާ ދާއިރާތަކެއް ހިމެނޭ ރަށްތަކަށް ދަތުރުކުރުމަށް ވަނީ ހަމަޖެހިފައި ކަމަށް އެމްޑީޕީން ބުނެއެވެ. 

"އެމްޑީޕީ ރޯޑްމެޕް" އަކީ ޕާޓީގެ އިދާރީ ހިންގުން ހަރުދަނާކުރުމަށް އެކުލަވާލާ މަގުޗާޓެކެވެ. މި މަގުޗާޓު އެކުލަވާލުމަށް ނިންމީ ނިމިދިޔަ ޖޫން މަހުގެ 11 ވަނަ ދުވަހު ބޭއްވުނު ޕާޓީގެ ޤައުމީ މަޖިލީހުގެ ޖަލްސާއަކުންނެވެ.

މި މަގުޗާޓުގެ މަޤްޞަދަކީ އެމްޑީޕީ އަކީ އިންތިޒާމުވެގެން ހިންގާ މުއައްސަސާއަކަށް ހެދުން ކަމަށާ، މިގޮތުން ޕާޓީގެ އޮނިގަނޑަށާއި އަސާސީ ޤަވާއިދަށް ބަދަލުތަކެއް ގެނައުމަށް ރޭވިފައިވާ ކަމަށް ބުނެފައިވެއެވެ. 

މިހާތަނަށް މި މަގުޗާޓު ޕާޓީގެ އެކި ދާއިރާތަކުގެ އިސް ސަފުގައި މަސައްކަތްކުރައްވާ 1000 އަށްވުރެ ގިނަ މެންބަރުންނާ ހިއްސާކޮށް، އެ ފަރާތްތަކުގެ ޚިޔާލު ހޯދިފައިވާކަމަށް އެމްޑީޕީން ބުނެއެވެ.

އެމްޑީޕީން ބުނެފައުވާ ގޮތުން މި ސިލްސިލާ ދަތުރުތަކުގެ މައިގަނޑު މަޤްސަދަކީ ޕާޓީގެ ކުރިމަގު ހަރުދަނާ ކުރުމަށް ކުރާ މަސައްކަތްތަކަކީ އާންމު މެންބެރުންގެ ބައިވެރިވުމާ ހިޔާލާ މަޝްވަރާއާއެކު ކުރެވޭ މަސައްކަތްތަކެއްކަން ކަށަވަރުކުރުމެވެ. މި ސިލްސިލާގެ ފުރަތަމަ ދަތުރު ނިންމަވާލެއްވުމަށްފަހު ޕާޓީގެ ޗެއަރޕާސަން އަދި ވަފްދު އެނބުރި މާލެ ވަޑައިގަންނަވާނީ 22 ޖުލައި ވާ ހޯމަ ދުވަހުއެވެ.