ކުރީގެ ރައީސް އިބްރާހީމް މުޙައްމަދު ޞާލިހުގެ މަންމާފުޅު މޫމިނާ ހަސަންފުޅުގެ ޖަނާޒާގެ އިންތިޒާމުތައް ހަމަޖެއްސެވުމުގައި ސަރުކާރުގެ ފަރާތުން އިސްކޮށް ހަރަކާތްތެރިވެ ވަޑައިގެންނެވި މިނިސްޓަރ ޑރ. މުޙައްމަދު ޝަހީމް ޢަލީ ސަޢީދަށް ރައީސް ޞާލިހު ޝުކުރު އަދާކުރައްވައިފިއެވެ.
ރައީސް ޞާލިހުގެ މަންމާފުޅު ނިޔާވީ އިއްޔެ ހެނދުނުގެ ވަގުތެއްގައި އޭޑީކޭ ހޮސްޕިޓަލުގައި ފަރުވާ ދެމުން ގެންދަވަނިކޮށެވެ. ނިޔާވިއިރު އެ ކަމަނާގެ ޢުމުރުފުޅަކީ 80 އަހަރެވެ.
ރައީސް ޞާލިހުގެ މަންމާފުޅުގެ ކަށު ނަމާދު އިއްޔެ މަޣްރިބު ނަމާދަށްފަހު އިސްލާމީ މަރުކަޒުގައި އޮތް އިރު ކަށު ނަމާދު އިމާމްވެ ކޮށްދެއްވީ އެމަނިކުފާނުގެ ލޯފަން ކޮއްކޯފުޅު މޫސާ މުހައްމަދު ސޯލިހުއެވެ.
މަންމާފުޅުގެ ޖަނާޒާގެ ކަންކަން ދިޔަ ގޮތާއި ގުޅިގެން ރައީސް ޞާލިހު މިއަދު އެކްސް ގައި ކުރެއްވި ޕޯސްޓެއްގައި ވަނީ ވަޒީރު ޝަހީމަށް ޝުކުރު އަދާ ކުރައްވާފައެވެ.
"އަޅުގަނޑުމެންގެ ލޮބުވެތި މަންމަގެ ޖަނާޒާގެ ކަންތަކުގައި ސަރުކާރުގެ ފަރާތުން މިނިސްޓަރ ޑރ. މުޙައްމަދު ޝަހީމް އިސްވެހުންނަވައިގެން ހަމަޖައްސަވައިދެއްވި އެންމެހާ އިންތިޒާމްތަކަށް އަޅުގަނޑާ ޢާއިލާގެ ފަރާތުން ވަރަށް ބޮޑަށް ޝުކުރު ދަންނަވަން".
މީގެ އިތުރުން، ރައީސް ޞާލިހު ވަނީ ޖަނާޒާގައި ބައިވެރިވެ ވަޑައިގެންނެވި އަދި މަރުޙޫމާއަށް ހެޔޮ ދުޢާ ކޮށްދެއްވި އެންމެހާ ފަރާތްތަކަށާއި، އަދި ތަޢުޒިޔާ ވިދާޅުވި ހުރިހާ ބޭފުޅުންނަށް އެ މަނިކުފާނާއި ޢާއިލާގެ ފަރާތުން އިޚްލާޞްތެރިކަމާއެކު ޝުކުރު ދަންނަވާފައެވެ.
Advertisement
This content is created and paid for by advertisers and does not involve Voice Journalists
