ޕީއެންސީގެ ޕާލިއަންމަންޓްރީ ގްރޫޕްގެ ޑެޕިއުޓީ ލީޑަރުކަމުން އިސްތިއުފާދެއްވީ، މިވަގުތު އަމިއްލަކަންކަން ހުރިގޮތުން އެ މަސްއޫލިއްޔަތު އަދާކުރުމަށް ވަގުތު ދެވެންނެތުމުން ކަމަށް މަޖިލީހުގެ މަހިބަދޫ ދާއިރާގެ މެމްބަރު އަޙްމަދު ޠާރިޤު ވިދާޅުވެއްޖެއެވެ.
ޠާރިގު މިހެން ވިދާޅުވެފައިވަނީ އޭނާ އިސްތިއުފާ ދިނުމާއި ގުޅިގެން އެކި ގޮތް ގޮތަށް ވާހަކަދެކެވެމުންދަނިކޮށް، މިއަދު ފޭސްބުކުގައި ކުރެއްވި ޕޯސްޓެއްގައެވެ.
ރައީސް ޑރ. މުހައްމަދު މުއިއްޒުގެ ހުށަހެޅުއްވުމަކަށް ޕާލިމެންޓަރީ ގްރޫޕުގެ ޑެޕިއުޓީ ލީޑަރުކަމަށް ޠާރިގު އައްޔަނުކުރުމަށް ޕީއެންސީގެ ޕީޖީ ގްރޫޕުން ނިންމީ މޭ މަހުގެ 22 ގައެވެ.
ޠާރިގުގެ އިތުރުން ޕީއެންސީ ޕީޖީ ލީޑަރުންގެ ގޮތުގައި އިތުރު ތިން މެމްބަރަކު ތިއްބަވައެވެ. އެއީ ސީނިއާ ޑެޕިއުޓީ ޕީޖީ ލީޑަރު ބާރަށު ދާއިރާގެ މެމްބަރު އިބްރާހިމް ޝުޖާއުއާއި، ހުޅުދޫ ދާއިރާގެ މެންބަރު މުހައްމަދު ޝާހިދު (ޝާޑު) އާއި ވިލިމާލެ ދާއިރާގެ މެންބަރު މުހައްމަދު އިސްމާއިލެވެ.
މަގާމުން އިސްތިއޔފާ ދެއްވާފައިވާއިރު ދިވެހިރާއްޖޭގެ ފުޓްބޯޅަ އެސޯސިއޭޝަން (އެފްއޭއެމް)ގެ ރައީސްކަމުގެ މަގާމަށް ވަޑައިގަންނަވަން ވެސް ޠާރިގު ކެމްޕޭން ކުރައްވާތާ ގިނަ ދުވަސްތަކެއްވެފައިވާ ކަން ފާހަގަކޮށްލަންޖެހެއެވެ.
Advertisement
This content is created and paid for by advertisers and does not involve Voice Journalists
