އިންޑިއާގެ އެކްސްޓާނަލް އެފެއާޒް މިނިސްޓަރު (އީއޭއެމް) ޑރ އެސް ޖައިޝަންކަރު އަންނަ މަހު ރާއްޖެ ވަޑައިގަންނަވާގޮަތަށް ހަމަޖެހިއްޖެއެވެ.
މިއީ މިދިޔަ އަހަރުގެ ނޮވެމްބަރު މަހު ރައީސް ޑރ.މުހައްމަދު މުއިއްޒު ސަރުކާރާ ހަވާލުވެވަޑައިގެންނެވި ފަހުން ޖައިޝަންކަރު ރާއްޖެއަށް ކުރައްވާ ފުރަތަމަ ދަތުރުފުޅެވެ.
އިންޑިޔާގެ “ވިއޮން” ނޫހުން ރިޕޯޓް ކޮށްފައިވާ ގޮތުން، ޖައިޝަންކަރު ރާއްޖެ ވަޑައިގަންނަވާނީ މި ފެށޭ އޮގަސްޓް މަހުގެ ނުވަ ވަނަ ދުވަހުއެވެ.
ދޭއް ނުވަތަ ތިން ދުވަހުގެ މުއްދަތުގެ މި ދަތުރުފުޅުގައި، ޖައިޝަންކަރު، ޚާރިޖީ ވަޒީރު މޫސާ ޒަމީރާ އެކު މުހިންމު މަޝްވަރާތަކެއް ބާއްވައި ރައީސް މުއިއްޒުއާ ބައްދަލު ކުރައްވާނެ ކަމަށް ބެލެވޭ ކަމަށް އެ ނޫހުން ބުނެފައިވެއެވެ.
ޖައިޝަންކަރު ރާއްޖެ ވަޑައިގެންނަވާއިރު، މިދިޔަ ތިން މަސްދުވަހުގެ ތެރޭގައި ދިވެހިރާއްޖޭގެ ސަރުކާރުގެ އިސް ބޭފުޅުން އިންޑިއާއަށް ވަނީ މުހިއްމު ތިން ދަތުރެއް ކުރައްވާފައެވެ.
އެގޮތުން، ވަޒީރު ޒަމީރު މިއަހަރުގެ މެއި މަހު އިންޑިޔާއަށް ވަޑައިގެންނެވިއިރު، މިދަތުރުފުޅަށްފަހު ރައީސް މުއިއްޒު ވަނީ ޖޫން މަހު ބޮޑުވަޒީރު ނަރެންދުރަ މޯދީގެ 3 ވަނަ ދައުރަށް ހުވާކުރުމުގެ ރަސްމިއްޔާތުގައި ބައިވެރިވެވަޑައިގެންނެވުމަށް އިންޑިޔާއަށް ވަޑައިގެންފައެވެ.
އަދި މިވަގުތު ރާއްޖޭގެ ފަތުރުވެރިކަމާ ބެހޭ ވަޒީރު އިބްރާހިމް ފައިސަލް ހުންނެވީ އިންޑިޔާގައި ރާއްޖޭގެ ފަތުރުވެރިކަން ޕްރޮމޯޓް ކުރުމަށް އިންޑިޔާގައެވެ.
Advertisement
This content is created and paid for by advertisers and does not involve Voice Journalists
