ސިޔާސީ ގޮފީގެ އިސްވެރިޔާ އިސްމާއީލް ހަނިއްޔާ އަވަހާރަކޮށްލަން ޔަހޫދީން ދިން ހަމަލާއާއި ގުޅިގެން ސީދާ އިސްރާއީލަށް އަމާޒުކޮށް ހަމަލާދިނުމަށް އީރާނުގެ އެންމެ މަތީ ލީޑަރު އާޔަތުالله އަލީ ޚާމަނާއީ އެގައުމުގެ އަސްކަރިއްޔާ އަށް އަމުރުކޮށްފިއެވެ.
އީރާނުގެ ރިވޮލިއުޝަނަރީ ގާޑްސްގެ ދެ މެންބަރުން ހިމެނޭ ގޮތަށް އީރާނުގެ ތިން އޮފިޝަލުންނާއި ހަވާލާދީ ބޭރުގެ ނޫސްތަކުން ރިޕޯޓްކުރި ގޮތުގައި، ޚާމަނާއީ މިފަދައިން އަމުރުކުރެއްވީ، ހަނިއްޔާ އަވަހާރަކޮށްލިކަން ހާމަކުރިތާ މާގިނަ އިރެއްނުވެ ބޭއްވި އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ ކުއްލި ބައްދަލުވުމެއްގައިއެވެ.
މީގެ އިތުރުންވެސް، ޚާމަނާއީ ވަނީ އެމަނިކުފާނު އެކްސް ގައި ކުރެއްވި ޕޯސްޓެއްގައިވެސް ވަނީ ޔަހޫދީންގެ މި ނިރުބަވެރި އަމަލާއި ގުޅިގެން ބަދަލު ހިފާނެ ކަމަށް ވިދާޅުވެފައެވެ.
"އިސްލާމީ ޖުމްހޫރިއްޔާގެ ބޯޑަރުތަކުގެ ތެރޭގައި ހިނގާފައިވާ މި ހިތި، ހިތާމަވެރި ހާދިސާއަށް ފަހު، ބަދަލު ހިފުމަކީ އަޅުގަނޑުމެންގެ ވާޖިބެއް،"
ޚާމަނާއީ ވިދާޅުވިއެވެ.
ޚާމަނާއީގެ އިތުރުން އެގައުމުގެ އައު އިންތިޚާބީ ރައީސް މަސްއޫދު ޕެޒެޝްކިއާން ވެސް މި ހަމަލާ އާއި ގުޅިގެން ބަދަލު ހިފާނެ ކަމަށް ވިދާޅުވެފައިވާއިރު، އީރާނުން މިއަހަރުގެ އޭޕްރިލް މަހުގެ ތެރޭގައިވެސް އިސްރާއީލަށް އަމާޒުކޮށް 300 ޑްރޯން އާއި މިސައިލް އެކުލެވޭ ވަރުގަދަ ހަމަލާތަކެއް ފޮނުވާލިކަން ފާހަގަކޮށްލަން ޖެހެއެވެ.
ހަނިއްޔާ އަށް އަމާޒުކޮށް ދިން ހަމަލާއާއި ގުޅިގެން ހަމާސް އިން ވެސް ވަނީ އެކަމުގެ ބަދަލު ލުއިކޮށް ނުނަގާނެ ކަމަށާއި، އެކަމުގައި ހިމެނޭ ޔަހޫދީންނަށް ވަރުގަދަ ހަމަލާތަކެއް ދޭނެ ކަމުގެ އިންޒާރު ދީފައެވެ.
Advertisement
This content is created and paid for by advertisers and does not involve Voice Journalists
