އިދިކޮޅު އެންމެބޮޑު ޕާޓީ، އެމްޑީޕީގެ މާލޭ ދާއިރާގެ ރައީސްކަމުގެ މަޤާމު، ބޮޑު ތަފާތަކުން އާދަމް އާޒިމް ކާމިޔާބު ކުރައްވައިފިއެވެ.

މާލެސިޓީގެ މޭޔަރުކަމުގެ މަޤާމުވެސް ފުރުއްވަމުން ގެންދަވާ އާޒިމް ކާމިޔާބުކުރެއްވީ، ފަލާހުއާ ވާދަކޮށް 600 އަށްވުރެ ގިނަ ވޯޓުގެ ތަފާތުންނެވެ. ހުރިހާ ފޮއްޓަކުން އާޒިމަށް ވަނީ 1000 ހަށްވުރެ ގިނަ ވޯޓު ލިބިފައެވެ.

އެމްޑީޕީ ޤައުމީ މަޖިލީޙުގެ ބައި އިލެކްޝަނުގެ ވޯޓުލުން މިއަދު ފަށާފައިވަނީ، މެންދުރުފަހު، 14:30 ގައެވެ. ވޯޓުލުން ނިންމާލާފައިވަނީ މިރޭ 21:00 ގައެވެ. އެމްޑީޕީ މާލޭ ދާއިރާގެ ރައީސްކަމުގެ މަޤާމަށް މީހަކު ހޮވާފައިމިވަނީ ކުރިން މި މަޤާމުގައި ހުންނެވި ޝިފާ މުހައްމަދު އެމަޤާމުން އިސްތިއުފާދެއްވުމާ ގުޅިގެންނެވެ. ޝިފާ ވަނީ މާލެ ސިޓީގެ މޭޔަރުކަމުގެ މަޤާމުވެސް މީގެކުރިން ފުރުއްވާފައެވެ.

ޖުމްހޫރީ ޕާޓީގައި މީގެ ކުރިން ހުންނެވި އާދަމް އާޒިމް އެމްޑީޕީއާ ގުޅިވަޑައިގެންފައިވަނީ ނިމިގެންދިޔަ ރިޔާސީ އިންތިހާބަށްފަހުއެވެ. ރިޔާސީ އިންތިހާބުގައި އާޒިމް ތާއީދުކުރެއްވީ ކުރީގެ ރައީސް އިބްރާހިމް މުހައްމަދު ސޯލިހަށެވެ.