މިނިވަން އަމާންވެއްޓެއްގައި އަޅުގަނޑުމެންނަށް މިއަދު ދިރިއުޅުމުގެ ފުރުސަތު ލިބިފައި މިވަނީ އެތަކެއް އަބުޠާލުންގެ ބުރަމަސައްކަތްޕުޅުން ކަމުގައި ދިފާޢީ ވަޒީރު މުޙައްމަދު ޣައްސާން މައުމޫން ވިދާޅުވެއްޖެއެވެ.
ދިވެހިރާއްޖޭގެ 59 ވަނަ މިނިވަން ދުވަހުގެ މުނާސަބަތުގައި ދިވެހި އަސްކަރިއްޔާގެ ޝަރަފުގެ ހިނގާލުމަށް ފަހު ބޭއްވި ރަސްމިއްޔާތުގައި ވާހަކަދައްކަވަމުން ދިފާޢީ ވަޒީރު މުޙައްމަދު ޣައްސާން މައުމޫން ވިދާޅުވީ، މިނިވަންދުވަހަކީ އެންމެން ވަރަށް މުހިންމު ސަބަބުތަކަކަށްޓަކައި ހަނދާންކުރަންޖެހޭ ދުވަހެއް ކަމަށެވެ. އަދި އަޅުގަނޑުމެންނަށް އަމާން ވެއްޓެއްގައި ދިރިއުޅެވެނީ އެތައް އަބުޠާލުންތަކެއްގެ ބުރަ މަސައްކަތުން ކަމަށް ފާހަގަކުރެއްވިއެވެ.
ދިފާޢީ ވަޒީރު ވަނީ ޗީފް އޮފް ޑިފެންސް ފޯސްއަށާއި ދިވެހި ސިފައިންނަށް ތަހުނިޔާއާއި މުބާރަކްބާދީ ފޮނުއްވާފައެވެ.
"އަޅުގަނޑުމެންގެ ލޮބުވެތި ދިވެހިރާއްޖެ އަޅުގަނޑުމެންނާ ހަމައަށް ގެނެސްދީ އަޅުގަނޑުމެންގެ އާއިލާތައް ގޮވައިގެން އަމާންވެއްޓެއްގައި ދިރިއުޅެން ލިބިފައި މިވަނީ އެތަކެއް އަބުޠާލުންނެއްގެ ބުރަމަސައްކަތްޕުޅުން،"
ދިފާޢީވަޒީރު ޣައްސާން ވިދާޅުވިއެވެ.
މިނިވަންދުވަސް ފާހަގަކުރުމުގެ މުހިންމުކަން ބަޔާންކުރައްވަމުން، ދިފާޢީވަޒީރު ޣައްސާން ވިދާޅުވީ މިދުވަހަކީ ދިވެހިރާއްޖެއަކީ މިނިވަން، މުސްތަޤިއްލު އަދި އަމިއްލަ ވެރިކަމެއް އޮތް ޤައުމެއްކަން މުޅި ދުނިޔެއަށް ދައްކުވައިދޭ ދުވަހެއް ކަމަށެވެ. އަދި ދިވެހިންނަށް އަމިއްލައަށް ނިންމާ ގޮތަކަށް ޤައުމު ކުރިއަށް ގެންދިއުމުގެ ޤާބިލުކަން ހުރިކަން ދުނިޔެއަށް ދެއްކުމުގެ ފުރުޞަތެއް ކަމުގައިވެސް ވިދާޅުވިއެވެ.
މި މުނާސަބަތުގައި، މިނިސްޓަރ ޣައްސާން ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ނަންފުޅުގައި ޗީފް އޮފް ޑިފެންސް ފޯސްއަށާއި ދިވެހި ސިފައިންނަށް ތަހުނިޔާއާއި މުބާރަކްބާދީ އަރިސްކުރައްވާފައެވެ.
ދިވެހިރާއްޖޭގެ މިނިވަންދުވަހުގެ ގޮތުގައި ފާހަގަކުރަނީ ކޮންމެ މަހެއްގެ ޖުލައިމަހުގެ 26 ވަނަ ދުވަހެވެ. އެއީ އިނގިރޭސިންގެ އަތްދޮށުން ދިވެހިންނަށް ދިވެހި ދައުލަތުގެ އެންމެހާ ބާރުވެރިކަން އިއާދަވި ދުވަހެވެ.
Advertisement
This content is created and paid for by advertisers and does not involve Voice Journalists
