މި އޮގަސްޓް މަހުގެ 04 އިން އޮގަސްޓު މަހުގެ 08 ވަނަ ދުވަހުގެ ނިޔަލަށް އިސްރަށްވެހިންގެ ނާދީގައި 55 އަހަރުން މަތީގެ މީހުންނަށް ގިނަ ހަރަކާތްތަކެއް ބާއްވަން ތައްޔާރުވެއްޖެއެވެ.

އިސްރަށްވެހިންނަށް ޚާއްސަކޮށްގެން އިޖްތިމާއީ ތަރައްގީއާ ބެހޭ ވުޒާރާއިން ކުރިއަށްގެންދާ ހަރަކާތްތަކުގެ ކަލަންޑަރު މިއަދު ވަނީ އާއްމުކޮށްފައެވެ.

އެގޮތުން އާއްމުކުރި ކަލަންޑަރުގައިވާ ގޮތުން،4 އޮގަސްޓް 2024 ވާ އާދިއްތަ ދުވަހުގެ 09:45-10:45 އަށް އިސްރަށްވެހިންނަށް ޚާއްސަ "ވޯކް ވޯކް" ކަސްރަތު ޕްރޮގްރާމް ކުރިއަށްދާނެއެވެ.

Advertisement

އަދި ގޯލްޑް ކަސްރަތު ޕްރޮގްރާމު 16:15-17:30 އަށް އޮންނާނެ ކަމަށްވެސް ބުނެފައެވެ. ހަމައެއާއެކު، އެދުވަހުގެ 16:15-17:30 އަށް މަދަހަ ކިޔުންވެސް ކުރިއަށްގެންދެވޭނެކަން ފާހަގަކޮށްފައިވެއެވެ.

މީގެ އިތުރުން، އޮގަސްޓް ވާ ހޯމަ ދުވަހު އުސްތާޛާ ސާމިޔާ ޒަކަރިއްޔާ އާއެކު ސުވާލާއި ޖަވާބު ސެޝަނެއް ބޭއްވުމަށް ހަމަޖެހިފައިވާއިރު 6 އޮގަސްޓު ވާ އަންގާރަ ދުވަހު 16:15-18:00 އަށް މާޖަހަން ދަސްކޮށްދޭ ކްލާހުގެ އިތުރުން، 16:15-17:30 އަށް މަދަހަ ކިޔުން ކުރިއަށް ގެންދެވޭނެ ކަމަށް ބުނެފައިވެއެވެ. 

އެއަށްފަހު، ހަފްތާގެ ބުދަ ދުވަހުގެ ހެނދުނު 9:45-10:45 އަށް އިސްރަށްވެހިންނަށް ޚާއްސަ "ވޯކް ވޯކް" ކަސްރަތު ޕްރޮގްރާމަކާއި، 16:15-17:30 އަށް ގޯލްޑް ކަސްރަތު ޕްރޮގްރާމް އޮންނާނެ ކަމަށާ، އިސްރަށްވެހިންގެ ނާދީގެ ކްލަބް ހަފްތާ ސައި 17:30-18:00 އަށް ކުރިއަށްގެންދެވޭނެ ކަމަށް ކަލަންޑަރގައި ވެއެވެ. 

މީގެ އިތުރުން، ހަފްތާގެ ހަރަކާތްތައް ނިންމާލުމުގެ ގޮތުން ބުރާސްފަތި ދުވަހުގެ 16:15-17:45އަށް، މުޢާމަލާތްކުރުމުގެ ހުނަރާއި ގުޅޭ ޚާއްސަ ސެޝަނެއް ޢާއިޝަތު ރިޝްތާ ނަންގަވަދެއްވާނެކަންވެސް ފާހަގަކޮށްފައިވެއެވެ. 

އިޖްތިމާޢީ ތަރައްގީއާ ބެހޭ ވުޒާރާއިން ބުނިގޮތުގައި، އިސްރަށްވެހިންގެ ނާދީއަށް ވަޑައިގެން މި ޕްރޮގްރާމުތަކުގައި ކޮންމެ ބޭފުޅަކަށްވެސް ބައިވެރިވެވޭނެއެވެ. އަދި އިތުރު މަޢުލޫމާތު ސާފު ކުރެއްވުމަށް، އިސްރަށްވެހިންގެ ނާދީގެ ނަންބަރު 3027586 ގުޅުއްވުމަށް އިސްރަށްވެހިންގެ ނާދީން ވަނީ އެދިފައެވެ.