ސަޢޫދީ ޢަރަބިއްޔާގެ އިސްލާމީ ކަންތައްތަކާ ބެހޭ ވުޒާރާއި، ރާއްޖޭގެ އިސްލާމީ ކަންތައްތަކާ ބެހޭ ވުޒާރާއާ، ގުޅިގެން އިސްލާމީ ދާއިރާއިން ކުރެވިދާނެ ކަންތައްތަކާ ބެހޭ ގޮތުން މަޝްވަރާކޮށްފިއެވެ.

މި މަޝްވަރާތައް ކުރިއަށް ގެންގޮސްފައިވަނީ، އިސްލާމީ ކަންތައްތަކާ ބެހޭ ވަޒީރު ޑރ މުހައްމަދު ޝަހީމް ޢަލީ ސައުދީއަށް ކުރައްވަމުންދާ ދަތުރުފުޅުގެ ތެރެއިން، ސައުދީ އިސްލާަމީ ކަންތައްތަކާބެހޭ ވަޒީރު، ފަޟީލަތުއްޝައިޚު ޑރ. ޢަބްދުއްލަޠީފު އާލުއްޝައިޚާއެކު، ބޭއްވި ބައްދަލުވުމުގެ ތެރެއިންނެވެ.

މި ބައްދަލުވުމާއި ގުޅޭގޮތުން ޝަހީމް ވިދާޅުވީ، ސައުދީ ވަޒީރާ ބައްދަލުވުމަކީ ލިބުނު އުފަލެއް ކަމަށެވެ.

Advertisement

އަދި ބައްދަލުވުމުގައި، ދެ ވުޒާރާ ގުޅިގެން އިސްލާމީ ދާއިރާއިން ކުރެވިދާނެ ކަންތައްތަކާ ބެހޭ ގޮތުން ސައުދީ ވަޒީރާ މަޝްވަރާކުރެވުނު ކަމަށެވެ.

މީގެ އިތުރުން، ރައީސް ޑރ. މުޙައްމަދު މުޢިއްޒުގެ ވެރިކަމުގައި ސަޢޫދީ ޢަރަބިއްޔާގެ އިސްލާމީ ކަންތައްތަކާ ބެހޭ ވުޒާރާއާ ގުޅިގެން މަސައްކަތްކުރުމަށް އެމަނިކުފާނު މުހިންމުކަން ދެއްވާކަމެއްކަމުގައި ދަންނަވާފައިވާނެ ކަމަށް ވަޒީރު ވިދާޅުވިއެވެ.

މި ބައްދަލުވުމުގައި، ސައޫދީ ޢަރަބިއްޔާއިން މިހާތަނަށް ރާއްޖޭގެ އިސްލާމީ ކަންތައްތަކަށް ވެދެއްވި އެހީތެރިކަމަށް ޝުކުރު ދަންނަވާފައިވާނެ ކަމަށާ އަދި ކުރިއަށް އޮތްތަނުގައި ދެވުޒާރާގެ ދާއިރާގައި ގުޅުން އިތުރަށް ބަދަހިވެގެންދާނެ ކަމަށްވެސް ވަޒީރު ޝަހީމް ވިދާޅުވިއެވެ.