ހުޅަނގު އެފްރިކާއަށް ނިސްބަތްވާ މާލީން އީޔޫގެ ޤައުމެއްކަމަށްވާ ޔޫކްރެއިނާއެކު އޮތް ސިޔާސީ ގުޅުން ކަނޑާލާފައިވާކަމަށްމާލީގެ ސަރުކާރުން މިއަދު އިއުލާން ކޮށްފިއެވެ.

ޔޫކްރެއިން އާއި މާލީއާ ދެމެދު އޮތް ޑިޕްލޮމެޓިކް ގުޅުން ކަންޑާލާފައިވަނީ ވޯގްނަރ ގްރޫޕްގެ މަރުސެނާރިންނާއި މާލީގެ ސިފައިން ގިނަ އަދަދަކަށް މަރުވި ހަމަލާގައި ޔޫކްރެއިންގެ ދައުރެއް ވާކަމަށް އެގައުމުގެ އިސްއޮފިސަލަކު އިއުތިރާފުވުމުންނެވެ.

މި އަހަރުގެ ޖުލައި މަހު މާލީގެ އުތުރުގައި ހިނގި ހަނގުރާމައެއްގައި ވޯގްނަރ ގްރޫޕްގެ 84 މަރުސެނާރިންނާއި 47 މާލީ ސިފައިން މަރުވެފައިވާކަމަށާއި މިއީ ވޯގްނަރ ގްރޫޕުން މީގެ ދެ އަހަރު ކުރިން މާލީގެ ހަނގުރާމައަށް ނުކުތް ފަހުން އެންމެ ބޮޑު ގެއްލުން ކަމަށް އުތުރުގެ ޓުއަރެގް އަސްކަރީ ބަޣާވާތްތެރިން ބުނެފައިވެއެވެ.

އަދި މީގެ އިތުރުން ޖުލައި 29 ވަނަ ދުވަހު ޔުކްރެއިންގެ އަސްކަރީ އިންޓެލިޖެންސް އޭޖެންސީގެ ތަރުޖަމާނު އެންޑްރީ ޔޫސޮވް ވަނީ މާލީގެ ބަޣާވާތްތެރިންނަށް "ބޭނުންވާ ހުރިހާ މައުލޫމާތެއް" ލިބިފައިވާ ކަމަށް ބުނެފައެވެ. އަދި މި މައުލޫމާތުގެ ސަބަބުން "ރަޝިއާގެ ހަނގުރާމަ ކުށްވެރިންނާ" ދެކޮޅަށް އޮޕަރޭޝަން ހިންގުމަށް މަގުފަހިވި ކަމަށްވެސް ބުނެފައިވެއެވެ.

އަދި މާލީގެ ސަރުކާރުގެ ތަރުޖަމާނު ކާނަލް އަބްދުﷲ މައިގާ ވިދާޅުވީ ޔޫސޮވްގެ މި ބަސްތަކުން ވަރަށް ބޮޑު ޝޮކެއް ލިބުނު ކަމަށާއި  މާލީގެ ސިފައިންނާއި ސަލާމަތީ ބާރުތަކުގެ މެންބަރުން މަރުވި ހަމަލާގައި ޔުކްރެއިންގެ ބައިވެރިވުން އޮތްކަން އިއުތިރާފުވެފައިވާ ކަމަށް ބުނެފައިވެއެވެ.

މީގެ އިތުރުން ސެނެގަލްގައި ހުންނަ ޔުކްރެއިންގެ ސަފީރު ޔޫރީ ޕިވޮވަރޮވް ވަނީ މާލީގައި ދިން ޓެރަރިސްޓް ހަމަލާއަށް ސީދާ ތާއީދުކޮށްފައިވާ ކަމަށް ބުނެ، މާލީގެ ސަރުކާރުން ފާޑުކިޔާފައިވެއެވެ. މި ހުރިހާ ސަބަބުތަކަކާހުރެ ޔުކްރެއިންއާއެކު އޮތް ޑިޕްލޮމެޓިކް ގުޅުން ވަގުތުން ކަނޑާލީ ކަމަށް ވެސް ބުނެފައިވެއެވެ.