ބަނގުލަދޭޝްގައި މިހާރު ހިނގަމުންދާ ސިޔާސީ ހަމަނުޖެހުންތަކުގެ ތެރޭގައި އިހުތިޖާޖުކުރާ ފަރާތްތަކުން ބޮޑުވަޒީރު ހަސީނާގެ ރަސްމީ ގެކޮޅަށްވަނީ ވަދެފައެވެ. ހަސީނާގެ ހެދުންކޮޅުތަކާއި، އެކަމަނާގެ އެހެނިހެން މުހިންމު ތަކެތިވެސް ދަނީ ވަގަށްނެގުމުގެ އިތުރު ހަލާކޮށް ވިދާ ކުދި ކުރަމުންނެވެ.

ބަންގްލަދޭޝްގެ ސަރުކާރު ވަޒީފާތަކަށް މީހުން އައްޔަން ކުރުމުގައި ގެންގުޅޭ އުސޫލާ ދެކޮޅަށް އަޑުއުފުލައި ޖުލައި މަހުން ފެށިގެން މުޒާހަރާ ކުރަމުން އަންނައިރު، މިއަދަކީ މުޒާހަރާތައް އެންމެ ވަރުގަދަކުރި ދުވަހެވެ.

ސިފައިން ނެރެފައިވާ ކަރްފިއު އާ ޚިލާފަށް، އިހުތިޖާޖުކުރާ ފަރާތްތަކުން ގޯނޯ ބަވަން ގަނޑުވަރަށް ވަދެ، ފަރުނީޗަރާއި އެހެނިހެން މުދަލަށް ވަނީ ގެއްލުން ދީފައެވެ. ސޯޝަލް މީޑިއާގައި ފެތުރުނު ވީޑިއޯތަކުން ދައްކާ ގޮތުގައި ބައެއް މީހުން ކާބޯތަކެއްޗާއި ފަރުނީޗަރު އަދި ބޮޑުވަޒީރުގެ އަމިއްލަ ތަކެތި ވަގަށް ނަގަމުން ދިޔައެވެ. ބައެއް އިހުތިޖާޖުކުރާ ފަރާތްތައް ހަސީނާގެ އެނދުގައި އޮށޯވެ އަދި ގެކޮޅުގެ ފާޚާނާ ތަކަށް ފެންވަރަމުންދާ މަންޒަރު ވެސް ފެނުނެވެ.

މި ހަމަނުޖެހުންތައް އެންމެ ބޮޑަށް ވައްތަރުވަނީ 2022 ވަނަ އަހަރު ސްރީލަންކާގައި ހިނގި ހާދިސާތަކާއެވެ. އޭރު ރައީސް ގޮޓަބަޔާ ރާޖަޕަކްސާ ފިލައިވަޑައިގެން ގައުމު ދޫކުރައްވާ ދިޔުމަށްފަހު އިހުތިޖާޖުކުރާ ފަރާތްތަކުން ރިޔާސީ ގަނޑުވަރު ހިފީއެވެ.

އެ ދުވަހުގެ ފޮޓޯތަކާއި ވީޑިއޯތަކުން މީހުން އެ ގަނޑުވަރުގައި އޮތް ސްވިމިން ޕޫލަށް އެރި، އެނދާއި ސޮފާ ފަދަ ފަރުނީޗަރު މަތީ މައްޗަށް އަރައި، ތަކެތި ގެންދާ މަންޒަރު ވެސް ފެނިފައިވެއެވެ.

ލަންކާގެ އިގުތިސާދީ ހާލަތު ދަށްވެ، ރައްޔިތުންނަށް ކާބޯތަކެއްޗާއި ބޭސް ފަދަ އަސާސީ ތަކެތި ނުލިބުމާ ގުޅިގެން ކުރިއަށްގެންދިޔަ އެ މުޒާހަރާތަކާ ގުޅިގެން ގޮތަބަޔަ ފިއްލަވައިގެން ފުރަތަމަ ވަޑައިގަތީ ރާއްޖެއަށެވެ. އެއަށް ފަހު ސިންގަޕޫރަށް ވަޑައިގެން, ޖުލައި 14، 2022ގައި މަގާމުން އިސްތިއުފާ ދެއްވިއެވެ.

ރިޕޯޓުތަކުން ދައްކާ ގޮތުގައި ބޮޑުވަޒީރު ހަސީނާ ވަނީ އަވައްޓެރި އިންޑިއާއަށް ފިލައިވަޑާއިގެން ގޮސް އެ ޤައުމުގައި ހިމާޔަތަށް އެދިފައިވެއެވެ. އިހުތިޖާޖުކުރާ ފަރާތްތަކުން ހަސީނާގެ ވެރިކަމުގެ ނިޝާންތަކަށްވެސް ގެއްލުން ދީފައިވެއެވެ. މީގެ ތެރޭގައި ބަންގްލަދޭޝްގެ ބާނީކަމަށް ބެލެވޭ އޭނާގެ ބައްޕާފުޅު، ޝެއިޚް މުޖީބުއް ރަހުމާންގެ ސްޓެޗޫ އަށް ގެއްލުން ދިނުން ހިމެނެއެވެ.

މިހާރު މި އޮތް ހަމަނުޖެހުން ފެށިގެން އައީ ޖޫން މަހު ސަރުކާރުގެ ސިޔާސަތުތަކާ ދެކޮޅަށް ފެށުނު ސުލްހަވެރި އިހުތިޖާޖުތަކުންނެވެ. މި އިހުތިޖާޖުތައް ފަހުން ޑާކާ ޔުނިވަރސިޓީގައި އިހުތިޖާޖުކުރާ ފަރާތްތަކާއި، ފުލުހުންނާއި، އަދި ސަރުކާރަށް ތާއީދުކުރާ ފަރާތްތަކާ ދެމެދު ހިނގި އަނިޔާވެރި ހަމަނުޖެހުންތަކަކަށް ބަދަލުވެގެން ދިޔައެވެ.

ހަސީނާގެ ބައެއް ހެދުންކޮޅުތައް ހިފައިގެން --- ފޮޓޮ: ސޯޝަލް މީޑިއާ

ބޭރުގެ މީޑިއާތަކާއި ސޯޝަލް މީޑިއާ ފޮޓޯތަކުން ފެންނަ ގޮތުގައި މުޒާހަރާގެ ބައިވެރިން ވަނީ ހަސީނާ އާއި ހަސީނާގެ އަވާމީ ލީގު ޕާޓީއަށް ނިސްބަތްވާ އެހެން ސިޔާސީ ބޭފުޅުންގެ ގެތަކަށްވެސް ވަދެފައެވެ.

މި ހާލަތަކީ ބަންގްލަދޭޝްއަށް ކުރިމަތިވި ވަރަށް ބޮޑު ސިޔާސީ ހަމަނުޖެހުމެކެވެ. އަދި މިކަމުގެ ސަބަބުން މުޅި ސަރަޙައްދަށް އަސަރުކުރުމުގެ ފުރުސަތު އެބައޮތެވެ. ބައިނަލްއަޤްވާމީ މުޖުތަމަޢުން މި ކަންތައްތައް ވަރަށް ގާތުން ބަލަމުން ގެންދެއެވެ.