ބަންގްލަދޭޝްގެ ކުރީގެ ބޮޑުވަޒީރު އަދި އިދިކޮޅު ލީޑަރު ބޭގަމް ޚާލިދާ ޒިޔާ މިއަދު މިނިވަންކޮށްފިއެވެ. ޚާލިދާ ޒިޔާ މިނިވަންކުރުމަށް އަމުރުކުރެއްވީ ބަންގްލަދޭޝްގެ ރައީސް މުޙައްމަދު ޝަހާބުއްދީންއެވެ.

78 އަހަރުގެ ޚާލިދާ ޒިޔާ ވަނީ ކޮރަޕްޝަންގެ ދަޢުވާތަކަކާ ގުޅިގެން 2018 ވަނަ އަހަރުން ފެށިގެން ޖަލުގައި ބަންދުކުރެވިފައެވެ. ނަމަވެސް، ޞިއްޙީ ހާލަތު ގޯސްވުމާ ގުޅިގެން 2020 ވަނަ އަހަރުން ފެށިގެން އޭނާ ވަނީ ގޭ ބަންދުގައި ބަހައްޓާފައެވެ.

ޚާލިދާ ޒިޔާގެ މިނިވަންކަމަކީ ބަންގްލަދޭޝްގެ ސިޔާސީ މަޝްރަޙުގައި ބޮޑު ބަދަލެއް ގެނެސްދާނެ ކަމެއް ކަމަށް ބެލެވެއެވެ. އޭނާއަކީ ބަންގްލަދޭޝް ނެޝަނަލިސްޓް ޕާޓީ (ބީއެންޕީ)ގެ ޗެއަރޕާސަންކަން ކުރައްވާފައިވާ ބޭފުޅެކެވެ.

އޭނާ ބަންގްލަދޭޝްގެ ފުރަތަމަ އަންހެން ބޮޑުވަޒީރަކަށް ވެވަޑައިގަތީ 1991ގައެވެ. އޭނާ އެ މަގާމަށް ވަޑައިގަތީ 1977އިން 1981 އަށް ބަންގްލަދޭޝްގެ ރައީސްކަން ކުރެއްވި، 1978 ވަނަ އަހަރު ބަންގްލަދޭޝް ނޭޝަނަލިސްޓް ޕާޓީ އުފެއްދެވި ފިރިމީހާ ޒިޔާއުއް ރަހުމާން އަވަހާރަކޮށްލުމުންނެވެ. ޚާލިދާ ދެވަނަ ފަހަރަށް އެގައުމުގެ ބޮޑުވަޒީރުކަން ކުރެއްވީ 2001އިން 2006އަށެވެ.

ޚާލިދާ ޒިޔާ މިނިވަންކުރިއިރު، ބަންގްލަދޭޝްގެ ބޮޑުވަޒީރު ކަމުގައި ހުންނެވި ޝޭޚް ހަސީނާ ވަނީ މަގާމުން އިސްތިއުފާ ދެއްވުމަށް ފަހު، ފިއްލަވައިގެން ހޯމަ ދުވަހު އިންޑިއާ އަށް ވަޑައިގެންފައެވެ.

ހަސީނާ އިސްތިއުފާ ދެއްވާފައި މިވަނީ ބަންގްލާދޭޝްގައި ކުރިއަށް ދިޔަ މުޒާހަރާތަކާ ގުޅިގެން އުފެދުނު ހަމަނެޖެހުންތަކުގައި ސަރުކާރަށް ޕްރެޝަރ ބޮޑުވެގެން ރައްޔިތުން ކޮންޓްރޯލް ނުވެ ސަރުކާރުގެ އޮފީސްތަކަށާއި، ކާރުޚާނާތަކަށް ގެއްލުންދީ ހަސީނާގެ އިސްތިއުފާއަށް ގޮވަމުން ދިޔުމުންނެވެ. 

މިހަމަނުޖެހުންތަކުގައި ފުލުހުން ހިމެނޭގޮތުން 300 އަށްވުރެ ގިނަމީހުންގެ ފުރާނަ ވަނީ ގެއްލިފައެވެ. 

ޚާލިދާ މިނިވަންކުރި ޚަބަރު ދުނިޔޭގެ މީޑިއާތަކަށް އަރާފައިވާއިރު، ޚާލިދާ ޒިޔާގެ ތާއީދުކުރާ ފަރާތްތަކުން ދަނީ މި ޚަބަރާ ގުޅިގެން އުފާފާޅުކުރަމުންނެވެ.