ވިޔަފާރިވެރިޔާ އަހުމަދު ސިޔާމް (ސަން ސިޔާމް) ނަގަން ނިންމާފައިވާ ލޯނަކަށް ސަރުކާރުން ހޯދުމަށް އެދިފައިވާ 165 މިލިއަން ޑޮލަރު، ދިވެހި ފައިސާއިން ބަލާނަމަ، 2.5 ބިލިއަން ރުފިޔާގެ ސަވަރިން ގެރެންޓީ ނުދޭން ސަރުކާރުން ނިންމައިފިއެވެ.
ސަރުކާރުން ސިޔާމަށް ގެރެންޓީ ނުދޭން ނިންމާފައިވަނީ މިދިޔަ ހަފްތާގެ ތެރޭގައި ވަޒީރުންގެ މަޖިލީހުގައި ބޭއްވި ބައްދަލުވުމުގައެވެ. ސަން ސިޔާމަށް މިފަހަރު ސަވަރިން ގެރެންޓީ ނުދޭން ނިންމާފައިވަނީ ރާއްޖޭގެ އިގްތިސާދީ ހާލަތު މިވަގުތު އޮތްގޮތުންކަމަށް މަުއލޫމާތު ލިބެއެވެ.
ސަވަރިން ގެރެންޓީ ހޯދުމަށް ސިޔާމްގެ ކުންފުނިން ނިންމީ، އެމަރަލްޑް ލެގޫންގައި 1500 ކޮޓަރީގެ ރިސޯޓެއް ތަރައްޤީކުރުމަށެވެ. އެ ރިސޯޓް ހެދުމަށް ލޯނު ނެގުމަށް ނިންމާފައިވަނީ ޗައިނާގެ ބޭންކަކުންނެވެ. އެ ބޭންކުން ލޯނު ދިނުމަށް ނިންމާފައިވަނީ ދިވެހި ސަރުކާރުންދޭ ސަވަރިން ގެރެންޓީގެ މައްޗަށެވެ.
މައުލޫމާތު ލިބިފައިވާ ގޮތުގައި ސިޔާމް ވަނީ މިއަހަރުގެ އޭޕްރިލްމަހު މިކަމާ ގުޅޭގޮތުން ރައީސް ޑރ.މުއިއްޒުއަށް ސިޓީއެއްވެސް ފޮނުއްވާފައެވެ.
ސަން ސިޔާމް ވަނީ ކުރީގެ ރައީސް ޔާމީނު ވެރިކަމުގައި ސަރުކާރުން ސަވަރިން ގެރެންޓީ ހޯދައިގެން ރިސޯޓެއް ތަރައްޤީކޮށްފައެވެ. ނ.އަތޮޅުގައި ތަރައްޤީކުރި މި ރިސޯޓަކީ މިވަގުތު ރާއްޖޭގައި އޮތް އެންމެބޮޑު ރިސޯޓެވެ. އެ ރިސޯޓް ހެދުމަށް ސިޔާމް ނެގި ލޯނަށް ސަރުކާރުން ވަނީ 127 މިލިއަން ޑޮލަރުގެ ގެރެންޓީއެއް ދީފައެވެ.
Advertisement
This content is created and paid for by advertisers and does not involve Voice Journalists
