ބަންގްލަދޭޝްގެ ފުލުހުންގެ މުވައްޒަފުންގެ ޖަމްޢިއްޔާއިން އެމީހުންގެ ރައްކާތެރިކަމަށްޓަކައި މުއްދަތެއް ނެތް ހަޅުތާލެއް ފަށައިފިއެވެ. މިކަން އެ ޖަމްޢިއްޔާއިން އިޢުލާނުކޮށްފައިވަނީ އަންގާރަ ދުވަހުގެ މެންދުރުފަހު ނެރުނު ނޫސްބަޔާނެއްގައެވެ.

ޝެއިޚް ހަސީނާގެ އަވާމީ ލީގު ސަރުކާރު ވެއްޓުނު ފަހުން، ބަންގްލަދޭޝްގެ އެކި ސަރަޙައްދުތަކުގައި ހުރި ފުލުސް މަރުކަޒުތަކަށް ހަމަނުޖެހުން އުފައްދާ ފަރާތްތަކުން ހަމަލާދޭން ފަށާފައިވާތީ، ފުލުހުންގެ މުވައްޒަފުން ދަނީ ބިރުވެރިކަމާއި ނުރައްކަލުގެ ތެރޭގައި އުޅެމުންނެވެ.

ވޭތުވެދިޔަ ދުވަސްތަކުގައި، ސަރުކާރު ވައްޓާލުމަށް ގޮވާލާ މުޒާހަރާކުރާ ފަރާތްތަކާއި އަވާމީ ލީގުގެ ލީޑަރުންނާއި ތާއީދުކުރާ ފަރާތްތަކާ ފުލުހުންނާ ދެމެދު ހިނގި ގިނަ އަރައިރުންތަކުގައި ގިނަ އަދަދެއްގެ ފުލުހުން މަރުވެފައިވެއެވެ. އަދި ޑާކާ ހިމެނޭގޮތަށް ޤައުމުގެ އެކި ކަންކޮޅުތަކުގައި ހުރި ސަތޭކައަށްވުރެ ގިނަ ފުލުސް މަރުކަޒުތަކަށާއި ފުލުހުންގެ އިމާރާތްތަކަށް ގެއްލުންދީ އަލިފާން ރޯކޮށްފައިވެއެވެ.

Advertisement

އޯގަސްޓް 5 ގައި ކުރީގެ ބޮޑުވަޒީރު ޝެއިޚް ހަސީނާ އިސްތިއުފާދެއްވުމާއި ގުޅިގެން، ފުލުހުންނަށް ދޭ އިންޒާރުތަކާއި، ދުއްތުރާތައް ވަނީ އިތުރު ވެފައެވެ. އެގޮތުން ފުލުހުން މެރުމާއި، މުދަލަށް ގެއްލުންދިނުމާއި އަލިފާން ރޯކުރުމުގެ ހާދިސާތައް ހިނގާފައިވާކަމަށް ނޫސްބަޔާނުގައި ބުނެފައިވެއެވެ.

މިގޮތުން ގާތްގަނޑަކަށް 450 ފުލުސް މަރުކަޒަކަށް ހަމަލާދީފައިވާއިރު، މިކަންކަމަކީ ޓެރަރިސްޓް ޙަރަކާތްތަކާ ގުޅުންހުރި ކަންކަން ކަމަށްވެސް ނޫސްބަޔާނުގައި ފާހަގަކޮށްފައިވެއެވެ.

މި ޙާލަތުގައި ފުލުހުންގެ ރައްކާތެރިކަމަށްޓަކައި، އޯގަސްޓް 6 އިން ފެށިގެން މުޅި ޤައުމަށް ހިނގާގޮތަށް މުއްދަތެއް ނެތްގޮތަށް ހަޅުތާލެއް ފަށާފައިވާކަމަށް ޖަމްޢިއްޔާއިން ބުނެފައިވެއެވެ. މިކަމާ ގުޅޭގޮތުން ފުލުސް މައި މަރުކަޒުގެ އެކި އޮފިސަރުންނާ އެއްވެސް މީޑިއާއަކަށް ކޮމެންޓެއް ކުރަން ބޭނުން ނުވާކަމަށް އެގައުމުގެ މީޑިއާތަކުން ވަނީ ބުނެފައެވެ.