އިސްތިއުފާދެއްވި ބަންގްލާދޭޝްގެ ބޮޑުވަޒީރު ޝޭޚް ހަސީނާއަށް ހިމާޔަތް ނުދޭނެކަމުގެ އިޝާރާތެއް އިނގިރޭސި ސަރުކާރުންދީފިއެވެ.

ބަންގްލަދޭޝްގެ ކުރީގެ ބޮޑުވަޒީރު ޝެއިޚް ހަސީނާ އިންޑިއާއިން ލަންޑަނަށް ދަތުރުކޮށް އެސައިލަމް ހޯދުމަށް މަސައްކަތް ކުރާކަމުގެ އަޑުތައް ފެތުރެމުންދާ ދަނޑިވަޅެއްގައި، އެ ޤައުމަށް ދަތުރުކޮށް އެސައިލަމް ނުވަތަ ރެފިއުޖީ ސްޓޭޓަސް ހޯދުމުގެ ފުރުސަތު ބްރިޓިޝް ގާނޫނުތަކުން ނުދޭކަމަށް ޔޫކޭ ހޯމް އޮފީހުން ބުނެފައިވާކަމަށް އެންޑީޓީވީއިން ވަނީ ބުނެފައެވެ.

ސަރުކާރާ ދެކޮޅު މުޒާހަރާތަކާ ގުޅިގެން އިއްޔެ އިސްތިއުފާ ދިނުމަށްފަހު، ގައުމު ދޫކުރައްވައި ފިލާވަޑައިގެން ހަސީނާ މިހާރު ހުންނެވީ ދިއްލީގައެވެ.

Advertisement

އެންޑީޓީވީގެ ރިޕޯޓުގައި ބުނެފައިވާ ގޮތުން، ޔޫކޭ ސަރުކާރުން ބުނެފައިވަނީ އެސައިލަމް ހޯދަން ބޭނުންވާ ފަރާތްތަކުން އެކަމަށް އެދެންވާނީ "އެމީހަކު ފުރަތަމަ ދިޔަ ރައްކާތެރި ޤައުމެއްގައި" ކަމަށެވެ.

ލޭބަރ ޕާޓީ މިދިޔަ މަހު ބޮޑު ތަފާތަކުން އިންތިޚާބު ކާމިޔާބު ކުރުމާ ގުޅިގެން މިހާރު ޔޫކޭގެ ވެރިކަން ހިންގަމުން ގެންދަނީ ސަރ ކީރ ސްޓާމަރއެވެ.

"ޔޫކޭއަކީ ރައްކާތެރިކަން ބޭނުންވާ މީހުންނަށް އެކަން ފޯރުކޮށްދިނުމުގެ ފަޚުރުވެރި ރެކޯޑެއް އޮތް ޤައުމެއް. ނަމަވެސް، ޔޫކޭއަށް ދަތުރުކޮށް އެސައިލަމް ނުވަތަ ވަގުތީ ރެފިއުޖީ ސްޓޭޓަސް ހޯދުމުގެ ފުރުސަތެއް ނެތް،" ޔޫކޭ ހޯމް އޮފީހުގެ ތަރުޖަމާނެއް އެންޑީޓީވީއަށް ބުނިކަމަށް އެޓީވީން މިއަދު ވަނީ ރިޕޯޓްކޮށްފައެވެ.

"ބައިނަލްއަޤްވާމީ ރައްކާތެރިކަން ބޭނުންވާ ފަރާތްތަކުން އެސައިލަމަށް އެދެންވާނީ އެމީހަކު ފުރަތަމަ ދިޔަ ރައްކާތެރި ޤައުމެއްގައި - އެއީ އެންމެ އަވަހަށް ރައްކާތެރިކަން ހޯދޭނެ ގޮތް،" އެ ތަރުޖަމާނު އިތުރަށް ބުންޏެވެ.

ނަމަވެސް، ރަސްމީ އެސައިލަމް ރިކުއެސްޓެއް ޕްރޮސެސް ކުރަމުންދާކަމުގެ އަޑުތައް ފެތުރެމުންދާކަމަށް އެންޑީޓީވީގެ ރިޕޯޓުގައި އިތުރަށް ބުނެފައިވެއެވެ.