އެމްޑީއެން އުވާލަންޖެހުނު ސަބަބު، ބައިނަލްއަޤްވާމީ އެކިއެކި ފަރާތްތަކަށް ވަރަށް ރަނގަޅަށް ސާފުކޮށްދީފައިވާނޭކަމަށް މިދިޔަ ސަރުކާރުގެ ކުޅިވަރާބެހޭ ވަޒީރު އަހުމަދު މަހްލޫފް ވިދާޅުވެއްޖެއެވެ.

އެމްޑީއެން ޖަމިއްޔާ އުވާލަން ނިންމި ނިންމުން ބަދަލުކޮށް، އެ ޖަމިއްޔާ ރުޖޫޢަކުރަން އދ.ގެ މަދަނީ އަދި ސިޔާސީ ހައްގުތަކާ ބެހޭ މުއާހަދާ (އައިސީސީޕީއާރު) އިން ނެރުނު ބަޔާނާ ގުޅޭގޮތުން އެކްސްގައި ކުރެއްވި ޕޯސްޓެއްގައި މަހްލޫފް ވިދާޅުވީ، އެމް.ޑީ.އެން އުވާލާފައިވާނީ ޖަމުޢިއްޔާތަކާބެހޭ ޤާނޫނުގައިވާ ހުރިހާ މަރުހަލާއެއް ފުރިހަމަކުރުމަށްފަހުގައިކަމަށެވެ.

މަހްލޫފް ވިދާޅުވީ، އެމްޑީއެން އުވާލުމަށް ނިންމުމާ ގުޅިގެން ބޭރުގެ އެކި ފަރާތްތަކުން އޭނާއާ ބައްދަލުކޮށް އަދި ފޯނުންކުރި މަޝްވަރާތަކުގައި، އެމްޑީއެން އުވާލުމަށް ނިންމި ސަބަބު ވަރަށް ސާފުކޮށް ބަޔާންކޮށްދީފައިވާނޭކަމަށެވެ. މިގޮތުން އެމް.ޑީ.އެން އުވާލީ ކަނޑައެޅިގެން ކީރިތި ރަސޫލާއަށް ފުރައްސާރަކޮށް އަދި އިސްލާމްދީނުގެ އަސްލުތަކާ ހިލާފު ވާހަކަތަކެއް ހުރުމުންކަމަށް ބޭރުގެ ފަރާތްތަކަށް ދަންނަވާފައިވާނޭކަމަށް މަހްލޫފް ވިދާޅުވިއެވެ.

Advertisement

އެކްސްގައި އިތުރަށް މަހްލޫފް ވިދާޅުވެފައިވަނީ، އިސްލާމްދީނަށް ފުރައްސާރަނުކޮށް އަދި ޤާނޫނާއި ގަވައިދުގެތެރެއިން މިނިވަންކަމާއެކު ޖަމުޢިއްޔާތައް ހިންގުމުގެ މަގުވަނީ ފަހިވެފައިވާނޭ ކަމަށެވެ.

އެމްޑީއެން އުވާލުމަށް ނިންމި ނިންމުމާ ގުޅޭގޮތުން އައިސީސީއާރުން ނެރެފައިވާ މުރާޖައާ ރިޕޯޓެއްގައި ބުނެފައިވަނީ، އެމްޑީއެން އުވާލުމަށް ނިންމާފައިވަނީ އިންސާފުވެރިކޮށް ކުރިއަށްގެންދިއަ ތަހްގީގަކަށްފަހުކަމަށް ގަބޫލުނުކުރެވޭ ކަމަށެވެ.

އެމްޑީއެން އުވާލާފައިވަނީ އިސްލާމް ދީނާ ގުޅޭގޮތުން ނެރުނު ރިޕޯޓެއްގައި ދީނުގެ ބައެއް ކަންކަމަށް ވަރަށްބޮޑަށް ހަޖޫޖަހާފައި ހުރުމުގެ ސަބަބުންނެވެ. އެމްޑީއެން ރިޕޯޓްގައި ޖިހާދުކުރުމާއި، އިސްލާމްދީނުގައި ކަނޑައަޅާފައިވާ ބައެއް އަދަބުތަކަކީ އިންސާނިއްޔަތާ ހިލާފް އަދަބުތަކެއްގެ ގޮތުގައި ވަނީ ސިފަކޮށްފައެވެ.