މެދުއިރުމަތީގައި އިތުރު ހަނގުރާމައެއް ފެށުމުގެ ބިރު އޮތް މި ދަނޑިވަޅުގައި، އެމެރިކާގެ ރައީސް ޖޯ ބައިޑަން ވަނީ އެ ސަރަޙައްދުގައި އިތުރު ހަނގުރާމައެއް ފެށުނަ ނުދިނުމަށް ގިނަގުނަ މަސައްކަތްތަކެއް ފަށާފައެވެ. އެގޮތުން ޑިޕްލޮމެޓިކް މަސައްކަތްތަކެއްގެ އިތުރުން މެދުއިރުމަތީގައި އެމެރިކާގެ އަސްކަރީ ބާރުއިތުރުކުރުމުގެ ގޮތުންވެސް ގިނަގުނަ މަސައްކަތްތަކެއް ދަނީ ކުރަމުންނެވެ. މި ރިޕޯޓުގައި ކުރުގޮތަކަށް އަލިއަޅުވާލާނީ އެމެރިކާގެ މި މަސައްކަތްތަކާއި، އޭގެ ނަތީޖާތަކުގެ މައްޗަށެވެ.

އެމެރިކާ ސަރުކާރުން ވަނީ ޑިޕްލޮމެޓިކް ގޮތުން ގިނަގުނަ މަސައްކަތްތަކެއް ފަށާފައެވެ. މީގެ ތެރޭގައި އީރާނާއެކު ސިއްރު މުޢާމަލާތްތައް ކުރުމާއި، އިސްރާއީލުގެ ބޮޑުވަޒީރު ބެންޖަމިން ނެތަންޔާހޫއަށް ހަރުކަށި އިންޒާރުތައް ދިނުން ހިމެނެއެވެ. މި އިންޒާރުތަކުގެ މަޤްޞަދަކީ ޣައްޒާގައި ހިނގަމުންދާ ހަނގުރާމަ ހުއްޓުވުމަށް ކުރެވޭ މަސައްކަތްތަކަށް ހުރަސްއެޅުމުން ދުރުހެލިވުމަށް ނެތަންޔާހޫއަށް ބާރުއެޅުމެވެ. މީގެ އިތުރުން، އެމެރިކާ ވަނީ ސަރަޙައްދުގައި އެ ޤައުމުގެ ކަނޑުގެ އަދި ވައިގެ ބާރުތައް ވެސް އިތުރުކޮށްފައެވެ.

އިސްރާއީލަށް ހަމަލާނުދީ އީރާނުން ލަސްކުރަނީ އެމެރިކާއާއި އިރާނާ ދެމެދު އޮތް ސިއްރު ގުޅުންތަކުގެ ސަބަބެއް ކަމަށް ބައެއް ފަރާތްތަކުން ދެކޭ --

ހަމާސްގެ ލީޑަރު އިސްމާޢީލް ހަނިޔާ ތެހުރާނުގައި ޝަހީދުކޮށްލެވުނު ހާދިސާއާ ގުޅިގެން، އީރާނުން ބޮޑު ރައްދެއް ދޭނެކަމަށް ބެލެވުނެވެ. ނަމަވެސް، ވަރުގަދަ ބަދަލެއް ހިފާނެކަމުގެ އިންޒާރު ދިންތާ ހަފްތާއެއް ހަމަވާން ކައިރިވެފައިވާއިރު، އަދިވެސް އެއްވެސް ހަމަލާއެއް އީރާނުން އިސްރާއީލަށް ނުދީ ލަސްކުރުމަކީ މިހާރު އެ ޤައުމުން ބޮޑު ރައްދެއް ދިނުމުގެ ވިސްނުން ބަދަލުވެދާނެ ކަމެއް ކަމަށް ލަފާކުރެވެއެވެ. ސަބަބަކީ، ހަނިއްޔާގެ މަރާ ގުޅޭގޮތުން އީރާނުގައި އޮޅުންއަރާފައިވާކަން ފާހަގަކުރެވޭތީއެވެ.

ފުރަތަމަ އީރާނުން ބުނީ ހަނިޔާ ޝަހީދުކޮށްލީ އިސްރާއީލުގެ މިސައިލަކުން ކަމަށެވެ. ނަމަވެސް، ފަހުން އެ ޤައުމުން ނިންމީ ހަނިއްޔާ ޝަހީދުކޮށްލީ މާކުރިން އެ އިމާރާތުގައި ހަރުކޮށްފައިވާ ބޮމަކުން ކަމަށެވެ. މިފަދަ ޓާގެޓް ކުރެވިގެން މީހުން މެރުމުގެ ޢަމަލުތައް އީރާނުން ވެސް ހިންގާކަމަށް ބެލެވޭތީ، އެ ޤައުމުން ބޮޑު ރައްދެއް ދިނުމުގެ ވިސްނުން ބަދަލުވެދާނެކަމަށް ލަފާކުރެވެއެވެ.

އެމެރިކާ ވަނީ އެ ސަރަޙައްދުގައި އެ ޤައުމުގެ ސިފައިންގެ ވަޞީލަތްތައް އިތުރުކޮށްފައެވެ. ޚާއްޞަކޮށް އިސްރާއީލާއި ފަލަސްތީނަށް ބާޜު ފޯރުވޭ ހިސާބުގައި އެމެރިކާގެ މަނަވަރުތައް އަބަދުވެސް ތައްޔާރީ ޙާލަތުގައި އޮވެއެވެ. މިއީ އެ ޤައުމުން ދައްކާ ބާރެކެވެ.

މީގެ އިތުރުން، އެމެރިކާއިން ވަނީ އީރާނަށް ސިއްރު މެސެޖުތަކެއް ވެސް ފޮނުވާފައެވެ. މި މެސެޖުތައް ފޮނުވާފައިވަނީ ސުވިޒަލޭންޑުގެ އެމްބަސީ އާއި އދ. ގައި ހުރި އީރާނުގެ މިޝަން މެދުވެރިކޮށެވެ. މި މެސެޖުތަކުގައި ހަނގުރާމައެއް ފެށުމުގެ ނުރައްކާ ވަރަށް ބޮޑުކަމާއި، އޭގެ ސަބަބުން އީރާނުގެ އާ ސަރުކާރަށް ނޭދެވޭ އަސަރުތަކެއް ކުރާނެކަން ބަޔާންކޮށްފައިވާ ވޮޝިންޓަން ޕޯސްޓުން ރިޕޯޓްކޮށްފައި ވެއެވެ.

އެމެރިކާގެ މަނަވަރުތައް މެދުއިރުމަތީގައި އަބަދުވެސް އޮންނަނީ ތައްޔާރީ ހާލަތުގައި -- ފޮޓޯ: އޭއެފްޕީ

އެމެރިކާ މެދުވެރިވެގެން، ހުށަހެޅިފައިވާ ހަނގުރާމަ ހުއްޓާލުމުގެ އެއްބަސްވުމަކަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ މިހާރު ތާއީދުކުރާކަމަށް ބެލެވެއެވެ. ކުރިން ނަތަންޔާހޫ އެ އެއްބަސްވުމަށް ބަދަލުތަކެއް ގެންނަން ބޭނުންވި ނަމަވެސް، މިހާރު އެ އެއްބަސްވުމަށް ބަދަލެއް ނުގެނެސް ތާއީދުކުރާކަމަށް ބެލެވެއެވެ. އެމެރިކާއިން ވަނީ ހަނގުރާމަ ހުއްޓާލުމާއި ހަނގުރާމައިގައި ދެފަރާތުން ހައްޔަރުކުރި ގައިދީން ބަންދުން ދޫކޮށްލުމުގެ އެއްބަސްވުމަކަށް ވަރަށް ބޮޑަށް ތާއީދުކޮށްފައެވެ.

މެދުއިރުމަތީގައި ނުރައްކާތެރި ހަނގުރާމައެއް ފެށުމުގެ ބިރު އަދިވެސް ވަރަށް ބޮޑު ނަމަވެސް، ރައީސް ޖޯ ބައިޑަންގެ މަސައްކަތްތަކުގެ ސަބަބުން އެކަން ހުއްޓުވުމަށް ގެނައުމަށް ކޮންމެވެސް ވަރަކަށް ކުރިއެރުން ލިބިފައިވާކަމަށް ބެލެވެއެވެ. އެހެންނަމަވެސް، ލުބުނާންގައި ހަރަކާތްތެރިވާ އީރާނުގެ ޕްރޮކްސީ ބާރު ކަމުގައިވާ ހިޒްބުﷲ އަކީ އަދިވެސް ނުރައްކާތެރި ބާރެއްގެ ގޮތުގައި ދެމިއޮތްކަން ފާހަގަކުރެވެއެވެ. އެހެންކަމުން، އަދިވެސް ސަރަޙައްދުގައި ހަނގުރާމައެއް ފެށުމުގެ ނުރައްކާ އެބައޮތް ކަމަށް މީޑިއާ ރިޕޯޓްތައް ބުނެއެވެ.