ޣައްޒާ ސިޓީގައި ގެދޮރު ގެއްލިފައިވާ މީހުން ހިމާޔަތްހޯދަމުންދިޔަ 2 ސްކޫލަކަށް ބުރާސްފަތި ދުވަހު އިސްރާއީލުން ދިން ވައިގެ ހަމަލާތަކުގައި ކުޑަކުދިންނާއެކު ފަލަސްތީނުގެ 15 މީހަކު ޝަހީދުވެ އެތައް ބަޔަކު ޒަޚަމްވެފައިވާ ކަމަށް ސިވިލް ޑިފެންސް އެޖެންސީން ބުނެފިއެވެ.

އިސްރާއީލުގެ ހަނގުރާމަމަތީ މަތިންދާބޯޓުތަކުން ހަމަލާ ދީފައިވަނީ އަލްތަފްފާ އަވަށުގެ އަލް ޒަހްރާ އާއި އަބްދުލް ފައްތާހު ހަމޫދު ސްކޫލަށް ކަމަށް މަންޒަރު ދުށް މީހުން ބުނެއެވެ.

މެޑިކަލް މަސްދަރުތަކުން ބުނި ގޮތުގައި މަރުވި މީހުންގެ ތެރޭގައި ކުޑަކުދިން ވެސް ހިމެނެއެވެ.

އިސްރާއީލުގެ އަސްކަރިއްޔާއިން ބުނީ މި ހަމަލާދީފައިވާ ދެ ސްކޫލަކީ ހަމާސްއިން ހަނގުރާވެރިން ފޮރުވުމަށް ބޭނުންކުރާ ތަންކަމުގައެވެ. އަދި އެތަންތަނުގައި ހަތިޔާރުވެސް ފޮރުވައިގެން ގެންގުޅޭކަމަށެވެ.  

އިސްރާއީލުގެ މި ވާހަކަތަކާ ގުޅިގެން ހަމާސްއިން އަދި ވަކިއެއްޗެއް ނުބުނެއެވެ.  

އޮކްޓޯބަރު 7، ވަނަ ދުވަހުން ފެށިގެން އިސްރާއީލުން ދަނީ ޣައްޒާގައި ވަރުގަދަ އަސްކަރީ ހަމަލާތަކެއް ދެމުންނެވެ. އެ ހަމަލާތަކުގައި ފަލަސްތީނުގެ ގާތްގަނޑަކަށް 39،700 މީހުން ޝަހީދުވެފައިވާއިރު އޭގެ ތެރޭގައި ގިނައީ އަންހެނުންނާއި ކުޑަކުދިން ކަމަށާއި 91،700 އަށް ވުރެ ގިނަ މީހުން ޒަހަމްވެފައިވާ ކަމަށް އެ ގައުމުގެ ސިއްހީ އިދާރާތަކުން ބުނެއެވެ.

އިސްރާއީލު ހަނގުރާމައަށް 10 މަހަށްވުރެ ގިނަ ދުވަސް ވެފައިވާއިރު، ޣައްޒާގެ ބޮޑު ބައެއް ވަނީ ކާބޯތަކެއްޗާއި ސާފު ފެނާއި ބޭސްވެރިކަން ހުއްޓުމަކަށް އައިސްފައެވެ.